౩౯. అవటఫలవగ్గో

౧. అవటఫలదాయకత్థేరఅపదానం

౧. ‘‘సతరంసి నామ భగవా, సయమ్భూ అపరాజితో;

వివేకకామో సమ్బుద్ధో, గోచరాయాభినిక్ఖమి.

౨. ‘‘ఫలహత్థో అహం దిస్వా, ఉపగచ్ఛిం నరాసభం;

పసన్నచిత్తో సుమనో, అవటం [అవణ్టం (సీ.), అమ్బటం (స్యా.)] అదదిం ఫలం.

౩. ‘‘చతున్నవుతితో కప్పే, యం ఫలమదదిం అహం;

దుగ్గతిం నాభిజానామి, ఫలదానస్సిదం ఫలం.

౪. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౫. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౬. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా అవటఫలదాయకో థేరో ఇమా గాథాయో అభాసిత్థాతి.

అవటఫలదాయకత్థేరస్సాపదానం పఠమం.

౨. లబుజదాయకత్థేరఅపదానం

౭. ‘‘నగరే బన్ధుమతియా, ఆసిం ఆరామికో తదా;

అద్దసం విరజం బుద్ధం, గచ్ఛన్తం అనిలఞ్జసే.

౮. ‘‘లబుజస్స ఫలం గయ్హ, బుద్ధసేట్ఠస్సదాసహం;

ఆకాసే ఠితకో సన్తో, పటిగణ్హి మహాయసో.

౯. ‘‘విత్తిసఞ్జననం మయ్హం, దిట్ఠధమ్మసుఖావహం;

ఫలం బుద్ధస్స దత్వాన, విప్పసన్నేన చేతసా.

౧౦. ‘‘అధిగచ్ఛిం తదా పీతిం, విపులఞ్చ సుఖుత్తమం;

ఉప్పజ్జతేవ రతనం, నిబ్బత్తస్స తహిం తహిం.

౧౧. ‘‘ఏకనవుతితో కప్పే, యం ఫలమదదిం తదా;

దుగ్గతిం నాభిజానామి, ఫలదానస్సిదం ఫలం.

౧౨. ‘‘కిలేసా ఝాపితా మయ్హం…పే… విహరామి అనాసవో.

౧౩. ‘‘స్వాగతం వత మే ఆసి…పే… కతం బుద్ధస్స సాసనం.

౧౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా లబుజదాయకో థేరో ఇమా గాథాయో అభాసిత్థాతి.

లబుజదాయకత్థేరస్సాపదానం దుతియం.

౩. ఉదుమ్బరఫలదాయకత్థేరఅపదానం

౧౫. ‘‘వినతానదియా తీరే, విహాసి పురిసుత్తమో;

అద్దసం విరజం బుద్ధం, ఏకగ్గం సుసమాహితం.

౧౬. ‘‘తస్మిం పసన్నమానసో, కిలేసమలధోవనే;

ఉదుమ్బరఫలం గయ్హ, బుద్ధసేట్ఠస్సదాసహం.

౧౭. ‘‘ఏకనవుతితో కప్పే, యం ఫలమదదిం తదా;

దుగ్గతిం నాభిజానామి, ఫలదానస్సిదం ఫలం.

౧౮. ‘‘కిలేసా ఝాపితా మయ్హం…పే… విహరామి అనాసవో.

౧౯. ‘‘స్వాగతం వత మే ఆసి…పే… కతం బుద్ధస్స సాసనం.

౨౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉదుమ్బరఫలదాయకో థేరో ఇమా గాథాయో అభాసిత్థాతి.

ఉదుమ్బరఫలదాయకత్థేరస్సాపదానం తతియం.

౪. పిలక్ఖఫలదాయకత్థేరఅపదానం

౨౧. ‘‘వనన్తరే బుద్ధం దిస్వా, అత్థదస్సిం మహాయసం;

పసన్నచిత్తో సుమనో, పిలక్ఖస్సాదదిం ఫలం [పిలక్ఖస్స ఫలం అదం (సీ.), పిలక్ఖుస్స ఫలం అదం (స్యా.)].

౨౨. ‘‘అట్ఠారసే కప్పసతే, యం ఫలమదదిం తదా;

దుగ్గతిం నాభిజానామి, ఫలదానస్సిదం ఫలం.

౨౩. ‘‘కిలేసా ఝాపితా మయ్హం…పే… విహరామి అనాసవో.

౨౪. ‘‘స్వాగతం వత మే ఆసి…పే… కతం బుద్ధస్స సాసనం.

౨౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పిలక్ఖఫలదాయకో థేరో ఇమా గాథాయో అభాసిత్థాతి.

పిలక్ఖఫలదాయకత్థేరస్సాపదానం చతుత్థం.

౫. ఫారుసఫలదాయకత్థేరఅపదానం

౨౬. ‘‘సువణ్ణవణ్ణం సమ్బుద్ధం, ఆహుతీనం పటిగ్గహం;

రథియం పటిపజ్జన్తం, ఫారుసఫలమదాసహం.

౨౭. ‘‘ఏకనవుతితో కప్పే, యం ఫలమదదిం అహం;

దుగ్గతిం నాభిజానామి, ఫలదానస్సిదం ఫలం.

౨౮. ‘‘కిలేసా ఝాపితా మయ్హం…పే… విహరామి అనాసవో.

౨౯. ‘‘స్వాగతం వత మే ఆసి…పే… కతం బుద్ధస్స సాసనం.

౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఫారుసఫలదాయకో థేరో ఇమా గాథాయో అభాసిత్థాతి.

ఫారుసఫలదాయకత్థేరస్సాపదానం పఞ్చమం.

౬. వల్లిఫలదాయకత్థేరఅపదానం

౩౧. ‘‘సబ్బే జనా సమాగమ్మ, అగమింసు వనం తదా;

ఫలమన్వేసమానా తే, అలభింసు ఫలం తదా.

౩౨. ‘‘తత్థద్దసాసిం సమ్బుద్ధం, సయమ్భుం అపరాజితం;

పసన్నచిత్తో సుమనో, వల్లిఫలమదాసహం.

౩౩. ‘‘ఏకత్తింసే ఇతో కప్పే, యం ఫలమదదిం తదా;

దుగ్గతిం నాభిజానామి, ఫలదానస్సిదం ఫలం.

౩౪. ‘‘కిలేసా ఝాపితా మయ్హం…పే… విహరామి అనాసవో.

౩౫. ‘‘స్వాగతం వత మే ఆసి…పే… కతం బుద్ధస్స సాసనం.

౩౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వల్లిఫలదాయకో థేరో ఇమా గాథాయో అభాసిత్థాతి.

వల్లిఫలదాయకత్థేరస్సాపదానం ఛట్ఠం.

౭. కదలిఫలదాయకత్థేరఅపదానం

౩౭. ‘‘కణికారంవ జలితం, పుణ్ణమాయేవ [పుణ్ణమాసేవ (సీ. క.)] చన్దిమం;

జలన్తం దీపరుక్ఖంవ, అద్దసం లోకనాయకం.

౩౮. ‘‘కదలిఫలం పగ్గయ్హ, అదాసిం సత్థునో అహం;

పసన్నచిత్తో సుమనో, వన్దిత్వాన అపక్కమిం.

౩౯. ‘‘ఏకత్తింసే ఇతో కప్పే, యం ఫలమదదిం తదా;

దుగ్గతిం నాభిజానామి, ఫలదానస్సిదం ఫలం.

౪౦. ‘‘కిలేసా ఝాపితా మయ్హం…పే… విహరామి అనాసవో.

౪౧. ‘‘స్వాగతం వత మే ఆసి…పే… కతం బుద్ధస్స సాసనం.

౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కదలిఫలదాయకో థేరో ఇమా గాథాయో అభాసిత్థాతి.

కదలిఫలదాయకత్థేరస్సాపదానం సత్తమం.

౮. పనసఫలదాయకత్థేరఅపదానం

౪౩. ‘‘అజ్జునో నామ సమ్బుద్ధో, హిమవన్తే వసీ తదా;

చరణేన చ సమ్పన్నో, సమాధికుసలో ముని.

౪౪. ‘‘కుమ్భమత్తం గహేత్వాన, పనసం జీవజీవకం [దేవగన్ధికం (౪౧ వగ్గే, ౫ అపదానే)];

ఛత్తపణ్ణే ఠపేత్వాన, అదాసిం సత్థునో అహం.

౪౫. ‘‘ఏకత్తింసే ఇతో కప్పే, యం ఫలమదదిం తదా;

దుగ్గతిం నాభిజానామి, ఫలదానస్సిదం ఫలం.

౪౬. ‘‘కిలేసా ఝాపితా మయ్హం…పే… విహరామి అనాసవో.

౪౭. ‘‘స్వాగతం వత మే ఆసి…పే… కతం బుద్ధస్స సాసనం.

౪౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పనసఫలదాయకో థేరో ఇమా గాథాయో అభాసిత్థాతి.

పనసఫలదాయకత్థేరస్సాపదానం అట్ఠమం.

౯. సోణకోటివీసత్థేరఅపదానం

౪౯. ‘‘విపస్సినో పావచనే, ఏకం లేణం మయా కతం;

చాతుద్దిసస్స సఙ్ఘస్స, బన్ధుమారాజధానియా.

౫౦. ‘‘దుస్సేహి భూమిం లేణస్స, సన్థరిత్వా పరిచ్చజిం;

ఉదగ్గచిత్తో సుమనో, అకాసిం పణిధిం తదా.

౫౧. ‘‘ఆరాధయేయ్యం సమ్బుద్ధం, పబ్బజ్జఞ్చ లభేయ్యహం;

అనుత్తరఞ్చ నిబ్బానం, ఫుసేయ్యం సన్తిముత్తమం.

౫౨. ‘‘తేనేవ సుక్కమూలేన, కప్పే [కప్పం (సీ.), కప్ప (క.)] నవుతి సంసరిం;

దేవభూతో మనుస్సో చ, కతపుఞ్ఞో విరోచహం.

౫౩. ‘‘తతో కమ్మావసేసేన, ఇధ పచ్ఛిమకే భవే;

చమ్పాయం అగ్గసేట్ఠిస్స, జాతోమ్హి ఏకపుత్తకో.

౫౪. ‘‘జాతమత్తస్స మే సుత్వా, పితు ఛన్దో అయం అహు;

దదామహం కుమారస్స, వీసకోటీ అనూనకా.

౫౫. ‘‘చతురఙ్గులా చ మే లోమా, జాతా పాదతలే ఉభో;

సుఖుమా ముదుసమ్ఫస్సా, తూలాపిచుసమా సుభా.

౫౬. ‘‘అతీతా నవుతి కప్పా, అయం ఏకో చ ఉత్తరి;

నాభిజానామి నిక్ఖిత్తే, పాదే భూమ్యా అసన్థతే.

౫౭. ‘‘ఆరాధితో మే సమ్బుద్ధో, పబ్బజిం అనగారియం;

అరహత్తఞ్చ మే పత్తం, సీతిభూతోమ్హి నిబ్బుతో.

౫౮. ‘‘అగ్గో ఆరద్ధవీరియానం, నిద్దిట్ఠో సబ్బదస్సినా;

ఖీణాసవోమ్హి అరహా, ఛళభిఞ్ఞో మహిద్ధికో.

౫౯. ‘‘ఏకనవుతితో కప్పే, యం దానమదదిం తదా;

దుగ్గతిం నాభిజానామి, లేణదానస్సిదం ఫలం.

౬౦. ‘‘కిలేసా ఝాపితా మయ్హం…పే… విహరామి అనాసవో.

౬౧. ‘‘స్వాగతం వత మే ఆసి…పే… కతం బుద్ధస్స సాసనం.

౬౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

౬౩. ‘‘థేరో కోటివీసో [కోటివిసో (స్యా. క.), కోళివిసో (అఞ్ఞట్ఠానేసు)] సోణో, భిక్ఖుసఙ్ఘస్స అగ్గతో;

పఞ్హం పుట్ఠో వియాకాసి, అనోతత్తే మహాసరే’’తి.

ఇత్థం సుదం ఆయస్మా సోణో కోటివీసో థేరో ఇమా గాథాయో అభాసిత్థాతి.

సోణకోటివీసత్థేరస్సాపదానం నవమం.

౧౦. పుబ్బకమ్మపిలోతికబుద్ధఅపదానం

౬౪. ‘‘అనోతత్తసరాసన్నే, రమణీయే సిలాతలే;

నానారతనపజ్జోతే, నానాగన్ధవనన్తరే.

౬౫. ‘‘మహతా భిక్ఖుసఙ్ఘేన, పరేతో [ఉపేతో (ఉదానట్ఠకథాయం ౪ వగ్గే, ౮ సుత్తే)] లోకనాయకో;

ఆసీనో బ్యాకరీ తత్థ, పుబ్బకమ్మాని అత్తనో.

౬౬. [సుణాథ భిక్ఖవే మయ్హం, యం కమ్మం పకతం మయా; ఏకం అరఞ్ఞికం భిక్ఖుం, దిస్వా దిన్నం పిలోతికం; పత్థితం పఠమం బుద్ధం, బుద్ధత్తాయ మయా తదా; పిలోతియస్స కమ్మస్స, బుద్ధత్తేపి విపచ్చతి; గోపాలకో పురే ఆసిం, గావిం పాజేతి గోచరం; పివన్తిం ఉదకం ఆవిలం, గావిం దిస్వా నివారయిం; తేన కమ్మవిపాకేన, ఇధ పచ్ఛిమకే భవే; విపాసితో యదిచ్ఛకం, న హి పాతుం లభామహం (స్యా.)] ‘‘సుణాథ భిక్ఖవో మయ్హం, యం కమ్మం పకతం మయా;

పిలోతికస్స కమ్మస్స, బుద్ధత్తేపి విపచ్చతి [సుణాథ భిక్ఖవే మయ్హం, యం కమ్మం పకతం మయా; ఏకం అరఞ్ఞికం భిక్ఖుం, దిస్వా దిన్నం పిలోతికం; పత్థితం పఠమం బుద్ధం, బుద్ధత్తాయ మయా తదా; పిలోతియస్స కమ్మస్స, బుద్ధత్తేపి విపచ్చతి; గోపాలకో పురే ఆసిం, గావిం పాజేతి గోచరం; పివన్తిం ఉదకం ఆవిలం, గావిం దిస్వా నివారయిం; తేన కమ్మవిపాకేన, ఇధ పచ్ఛిమకే భవే; విపాసితో యదిచ్ఛకం, న హి పాతుం లభామహం (స్యా.)].

[౧]

౬౭. ‘‘మునాళి నామహం ధుత్తో, పుబ్బే అఞ్ఞాసు జాతిసు [అఞ్ఞాయ జాతియా (ఉదాన అట్ఠ.)];

పచ్చేకబుద్ధం సురభిం [సరభుం (సీ.)], అబ్భాచిక్ఖిం అదూసకం.

౬౮. ‘‘తేన కమ్మవిపాకేన, నిరయే సంసరిం చిరం;

బహూవస్ససహస్సాని, దుక్ఖం వేదేసి వేదనం.

౬౯. ‘‘తేన కమ్మావసేసేన, ఇధ పచ్ఛిమకే భవే;

అబ్భక్ఖానం మయా లద్ధం, సున్దరికాయ కారణా.

[౨]

౭౦. ‘‘సబ్బాభిభుస్స బుద్ధస్స, నన్దో నామాసి సావకో;

తం అబ్భక్ఖాయ నిరయే, చిరం సంసరితం మయా.

౭౧. ‘‘దసవస్ససహస్సాని, నిరయే సంసరిం చిరం;

మనుస్సభావం లద్ధాహం, అబ్భక్ఖానం బహుం లభిం.

౭౨. ‘‘తేన కమ్మావసేసేన, చిఞ్చమానవికా మమం;