౧౦. పుబ్బకమ్మపిలోతికబుద్ధఅపదానం

౬౪. ‘‘అనోతత్తసరాసన్నే, రమణీయే సిలాతలే;

నానారతనపజ్జోతే, నానాగన్ధవనన్తరే.

౬౫. ‘‘మహతా భిక్ఖుసఙ్ఘేన, పరేతో [ఉపేతో (ఉదానట్ఠకథాయం ౪ వగ్గే, ౮ సుత్తే)] లోకనాయకో;

ఆసీనో బ్యాకరీ తత్థ, పుబ్బకమ్మాని అత్తనో.

౬౬. [సుణాథ భిక్ఖవే మయ్హం, యం కమ్మం పకతం మయా; ఏకం అరఞ్ఞికం భిక్ఖుం, దిస్వా దిన్నం పిలోతికం; పత్థితం పఠమం బుద్ధం, బుద్ధత్తాయ మయా తదా; పిలోతియస్స కమ్మస్స, బుద్ధత్తేపి విపచ్చతి; గోపాలకో పురే ఆసిం, గావిం పాజేతి గోచరం; పివన్తిం ఉదకం ఆవిలం, గావిం దిస్వా నివారయిం; తేన కమ్మవిపాకేన, ఇధ పచ్ఛిమకే భవే; విపాసితో యదిచ్ఛకం, న హి పాతుం లభామహం (స్యా.)] ‘‘సుణాథ భిక్ఖవో మయ్హం, యం కమ్మం పకతం మయా;

పిలోతికస్స కమ్మస్స, బుద్ధత్తేపి విపచ్చతి [సుణాథ భిక్ఖవే మయ్హం, యం కమ్మం పకతం మయా; ఏకం అరఞ్ఞికం భిక్ఖుం, దిస్వా దిన్నం పిలోతికం; పత్థితం పఠమం బుద్ధం, బుద్ధత్తాయ మయా తదా; పిలోతియస్స కమ్మస్స, బుద్ధత్తేపి విపచ్చతి; గోపాలకో పురే ఆసిం, గావిం పాజేతి గోచరం; పివన్తిం ఉదకం ఆవిలం, గావిం దిస్వా నివారయిం; తేన కమ్మవిపాకేన, ఇధ పచ్ఛిమకే భవే; విపాసితో యదిచ్ఛకం, న హి పాతుం లభామహం (స్యా.)].

[౧]

౬౭. ‘‘మునాళి నామహం ధుత్తో, పుబ్బే అఞ్ఞాసు జాతిసు [అఞ్ఞాయ జాతియా (ఉదాన అట్ఠ.)];

పచ్చేకబుద్ధం సురభిం [సరభుం (సీ.)], అబ్భాచిక్ఖిం అదూసకం.

౬౮. ‘‘తేన కమ్మవిపాకేన, నిరయే సంసరిం చిరం;

బహూవస్ససహస్సాని, దుక్ఖం వేదేసి వేదనం.

౬౯. ‘‘తేన కమ్మావసేసేన, ఇధ పచ్ఛిమకే భవే;

అబ్భక్ఖానం మయా లద్ధం, సున్దరికాయ కారణా.

[౨]

౭౦. ‘‘సబ్బాభిభుస్స బుద్ధస్స, నన్దో నామాసి సావకో;

తం అబ్భక్ఖాయ నిరయే, చిరం సంసరితం మయా.

౭౧. ‘‘దసవస్ససహస్సాని, నిరయే సంసరిం చిరం;

మనుస్సభావం లద్ధాహం, అబ్భక్ఖానం బహుం లభిం.

౭౨. ‘‘తేన కమ్మావసేసేన, చిఞ్చమానవికా మమం;

అబ్భాచిక్ఖి అభూతేన, జనకాయస్స అగ్గతో.

[౩]

౭౩. ‘‘బ్రాహ్మణో సుతవా ఆసిం, అహం సక్కతపూజితో;

మహావనే పఞ్చసతే, మన్తే వాచేమి మాణవే.

౭౪. ‘‘తత్థాగతో [తమాగతో (క.)] ఇసి భీమో, పఞ్చాభిఞ్ఞో మహిద్ధికో;

తం చాహం ఆగతం దిస్వా, అబ్భాచిక్ఖిం అదూసకం.

౭౫. ‘‘తతోహం అవచం సిస్సే, కామభోగీ అయం ఇసి;

మయ్హమ్పి భాసమానస్స, అనుమోదింసు మాణవా.

౭౬. ‘‘తతో మాణవకా సబ్బే, భిక్ఖమానం కులే కులే;

మహాజనస్స ఆహంసు, కామభోగీ అయం ఇసి.

౭౭. ‘‘తేన కమ్మవిపాకేన, పఞ్చ భిక్ఖుసతా ఇమే;

అబ్భక్ఖానం లభుం సబ్బే, సున్దరికాయ కారణా.

[౪]

౭౮. ‘‘వేమాతుభాతరం పుబ్బే, ధనహేతు హనిం అహం;

పక్ఖిపిం గిరిదుగ్గస్మిం, సిలాయ చ అపింసయిం.

౭౯. ‘‘తేన కమ్మవిపాకేన, దేవదత్తో సిలం ఖిపి;

అఙ్గుట్ఠం పింసయీ పాదే, మమ పాసాణసక్ఖరా.

[౫]

౮౦. ‘‘పురేహం దారకో హుత్వా, కీళమానో మహాపథే;

పచ్చేకబుద్ధం దిస్వాన, మగ్గే సకలికం [సక్ఖలికం (క.)] ఖిపిం [దహిం (స్యా.)].

౮౧. ‘‘తేన కమ్మవిపాకేన, ఇధ పచ్ఛిమకే భవే;

వధత్థం మం దేవదత్తో, అభిమారే పయోజయి.

[౬]

౮౨. ‘‘హత్థారోహో పురే ఆసిం, పచ్చేకమునిముత్తమం;

పిణ్డాయ విచరన్తం తం, ఆసాదేసిం గజేనహం.

౮౩. ‘‘తేన కమ్మవిపాకేన, భన్తో [దన్తో (క.)] నాళాగిరీ గజో;

గిరిబ్బజే పురవరే, దారుణో సముపాగమి [మం ఉపాగమి (సీ.)].

[౭]

౮౪. ‘‘రాజాహం పత్థివో [పత్తికో (స్యా. క.), ఖత్తియో (ఉదాన అట్ఠ.)] ఆసిం, సత్తియా పురిసం హనిం;

తేన కమ్మవిపాకేన, నిరయే పచ్చిసం భుసం.

౮౫. ‘‘కమ్మునో తస్స సేసేన, ఇదాని సకలం మమ;

పాదే ఛవిం పకప్పేసి [పకోపేసి (సీ.)], న హి కమ్మం వినస్సతి.

[౮]

౮౬. ‘‘అహం కేవట్టగామస్మిం, అహుం కేవట్టదారకో;

మచ్ఛకే ఘాతితే దిస్వా, జనయిం సోమనస్సకం [సోమనస్సహం (ఉదాన అట్ఠ.)].

౮౭. ‘‘తేన కమ్మవిపాకేన, సీసదుక్ఖం అహూ మమ;

సబ్బే సక్కా చ హఞ్ఞింసు, యదా హని విటటూభో [విటటుభో (స్యా. క.)].

[౯]

౮౮. ‘‘ఫుస్సస్సాహం పావచనే, సావకే పరిభాసయిం;

యవం ఖాదథ భుఞ్జథ, మా చ భుఞ్జథ సాలయో.

౮౯. ‘‘తేన కమ్మవిపాకేన, తేమాసం ఖాదితం యవం;

నిమన్తితో బ్రాహ్మణేన, వేరఞ్జాయం వసిం తదా.

[౧౦]

౯౦. ‘‘నిబ్బుద్ధే వత్తమానమ్హి, మల్లపుత్తం నిహేఠయిం [నిసేధయిం (స్యా. క.)];

తేన కమ్మవిపాకేన, పిట్ఠిదుక్ఖం అహూ మమ.

[౧౧]

౯౧. ‘‘తికిచ్ఛకో అహం ఆసిం, సేట్ఠిపుత్తం విరేచయిం;

తేన కమ్మవిపాకేన, హోతి పక్ఖన్దికా మమ.

[౧౨]

౯౨. ‘‘అవచాహం జోతిపాలో, సుగతం కస్సపం తదా;

కుతో ను బోధి ముణ్డస్స, బోధి పరమదుల్లభా.

౯౩. ‘‘తేన కమ్మవిపాకేన, అచరిం దుక్కరం బహుం;

ఛబ్బస్సానురువేళాయం, తతో బోధిమపాపుణిం.

౯౪. ‘‘నాహం ఏతేన మగ్గేన, పాపుణిం బోధిముత్తమం;

కుమ్మగ్గేన గవేసిస్సం, పుబ్బకమ్మేన వారితో.

౯౫. ‘‘పుఞ్ఞపాపపరిక్ఖీణో, సబ్బసన్తాపవజ్జితో;

అసోకో అనుపాయాసో, నిబ్బాయిస్సమనాసవో.

౯౬. ‘‘ఏవం జినో వియాకాసి, భిక్ఖుసఙ్ఘస్స అగ్గతో;

సబ్బాభిఞ్ఞాబలప్పత్తో, అనోతత్తే మహాసరే’’తి.

ఇత్థం సుదం భగవా అత్తనో పుబ్బచరితం కమ్మపిలోతికం నామ బుద్ధాపదానధమ్మపరియాయం అభాసిత్థాతి.

పుబ్బకమ్మపిలోతికం నామ బుద్ధాపదానం దసమం.

అవటఫలవగ్గో ఏకూనచత్తాలీసమో.