౮. ఉత్తరేయ్యదాయకత్థేరఅపదానం

౯౦. ‘‘నగరే హంసవతియా, అహోసిం బ్రాహ్మణో తదా;

అజ్ఝాయకో మన్తధరో, తిణ్ణం వేదాన పారగూ.

౯౧. ‘‘పురక్ఖతో ససిస్సేహి, జాతిమా చ సుసిక్ఖితో;

తోయాభిసేచనత్థాయ, నగరా నిక్ఖమిం తదా.

౯౨. ‘‘పదుముత్తరో నామ జినో, సబ్బధమ్మాన పారగూ;

ఖీణాసవసహస్సేహి, పావిసీ నగరం జినో.

౯౩. ‘‘సుచారురూపం దిస్వాన, ఆనేఞ్జకారితం వియ;

పరివుతం అరహన్తేహి, దిస్వా చిత్తం పసాదయిం.

౯౪. ‘‘సిరస్మిం అఞ్జలిం కత్వా, నమస్సిత్వాన సుబ్బతం;

పసన్నచిత్తో సుమనో, ఉత్తరీయమదాసహం.

౯౫. ‘‘ఉభో హత్థేహి పగ్గయ్హ, సాటకం ఉక్ఖిపిం అహం;

యావతా బుద్ధపరిసా, తావ ఛాదేసి సాటకో.

౯౬. ‘‘పిణ్డచారం చరన్తస్స, మహాభిక్ఖుగణాదినో;

ఛదం కరోన్తో అట్ఠాసి, హాసయన్తో మమం తదా.

౯౭. ‘‘ఘరతో నిక్ఖమన్తస్స, సయమ్భూ అగ్గపుగ్గలో;

వీథియంవ ఠితో సత్థా, అకా మే [అకాసి (స్యా.)] అనుమోదనం.

౯౮. ‘‘పసన్నచిత్తో సుమనో, యో మే అదాసి సాటకం;

తమహం కిత్తయిస్సామి, సుణోథ మమ భాసతో.

౯౯. ‘‘‘తింసకప్పసహస్సాని, దేవలోకే రమిస్సతి;

పఞ్ఞాసక్ఖత్తుం దేవిన్దో, దేవరజ్జం కరిస్సతి.

౧౦౦. ‘‘‘దేవలోకే వసన్తస్స, పుఞ్ఞకమ్మసమఙ్గినో;

సమన్తా యోజనసతం, దుస్సచ్ఛన్నం భవిస్సతి.

౧౦౧. ‘‘‘ఛత్తింసక్ఖత్తుం రాజా చ, చక్కవత్తీ భవిస్సతి;

పదేసరజ్జం విపులం, గణనాతో అసఙ్ఖియం.

౧౦౨. ‘‘‘భవే సంసరమానస్స, పుఞ్ఞకమ్మసమఙ్గినో;

మనసా పత్థితం సబ్బం, నిబ్బత్తిస్సతి తావదే.

౧౦౩. ‘‘‘కోసేయ్యకమ్బలియాని [కోసేయ్యకమ్బలీయాని (సీ.)], ఖోమకప్పాసికాని చ;

మహగ్ఘాని చ దుస్సాని, పటిలచ్ఛతియం నరో.

౧౦౪. ‘‘‘మనసా పత్థితం సబ్బం, పటిలచ్ఛతియం నరో;

ఏకదుస్సస్స విపాకం, అనుభోస్సతి సబ్బదా.

౧౦౫. ‘‘‘సో పచ్ఛా పబ్బజిత్వాన, సుక్కమూలేన చోదితో;

గోతమస్స భగవతో, ధమ్మం సచ్ఛికరిస్సతి’.

౧౦౬. ‘‘అహో మే సుకతం కమ్మం, సబ్బఞ్ఞుస్స మహేసినో;

ఏకాహం సాటకం దత్వా, పత్తోమ్హి అమతం పదం.

౧౦౭. ‘‘మణ్డపే రుక్ఖమూలే వా, వసతో సుఞ్ఞకే ఘరే;

ధారేతి దుస్సఛదనం, సమన్తా బ్యామతో మమ.

౧౦౮. ‘‘అవిఞ్ఞత్తం నివాసేమి [అవిఞ్ఞత్తాని సేవామి (?)], చీవరం పచ్చయఞ్చహం;

లాభీ [లాభిమ్హి (స్యా.)] అన్నస్స పానస్స, ఉత్తరేయ్యస్సిదం ఫలం.

౧౦౯. ‘‘సతసహస్సితో కప్పే, యం కమ్మమకరిం తదా;

దుగ్గతిం నాభిజానామి, వత్థదానస్సిదం ఫలం.

౧౧౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉత్తరేయ్యదాయకో థేరో ఇమా గాథాయో అభాసిత్థాతి.

ఉత్తరేయ్యదాయకత్థేరస్సాపదానం అట్ఠమం.