౫. ఫుసితకమ్పియత్థేరఅపదానం

౩౮. ‘‘విపస్సీ నామ [సబ్బత్థపి ఏవమేవ దిస్సతి]

సమ్బుద్ధో, లోకజేట్ఠో నరాసభో.

ఖీణాసవేహి సహితో, సఙ్ఘారామే వసీ తదా.

౩౯. ‘‘ఆరామద్వారా నిక్ఖమ్మ, విపస్సీ [సబ్బత్థపి ఏవమేవ దిస్సతి] లోకనాయకో;

సహ సతసహస్సేహి, అట్ఠ [సహస్ససతసిస్సేహి, అట్ఠ (క.), అట్ఠ సతసహస్సేహి, సహ (?)] ఖీణాసవేహి సో.

౪౦. ‘‘అజినేన నివత్థోహం, వాకచీరధరోపి చ;

కుసుమోదకమాదాయ [కుసుమ్భోదక… (సీ. స్యా.)], సమ్బుద్ధం ఉపసఙ్కమిం.

౪౧. ‘‘సకం చిత్తం పసాదేత్వా, వేదజాతో కతఞ్జలీ;

కుసుమోదకమాదాయ, బుద్ధమబ్భుక్కిరిం అహం.

౪౨. ‘‘తేన కమ్మేన సమ్బుద్ధో, జలజుత్తమనామకో [సబ్బత్థపి ఏవమేవ దిస్సతి];

మమ కమ్మం పకిత్తేత్వా, అగమా యేన పత్థితం.

౪౩. ‘‘ఫుసితా పఞ్చసహస్సా, యేహి పూజేసహం జినం;

అడ్ఢతేయ్యసహస్సేహి, దేవరజ్జం అకారయిం.

౪౪. ‘‘అడ్ఢతేయ్యసహస్సేహి, చక్కవత్తీ అహోసహం;

అవసేసేన కమ్మేన, అరహత్తమపాపుణిం.

౪౫. ‘‘దేవరాజా యదా హోమి [అహోసిం (స్యా. క.)], మనుజాధిపతీ యదా [తదా (స్యా. క.)];

తమేవ నామధేయ్యం మే, ఫుసితో నామ హోమహం.

౪౬. ‘‘దేవభూతస్స సన్తస్స, అథాపి మానుసస్స వా;

సమన్తా బ్యామతో మయ్హం, ఫుసితంవ పవస్సతి.

౪౭. ‘‘భవా ఉగ్ఘాటితా మయ్హం, కిలేసా ఝాపితా మమ;

సబ్బాసవపరిక్ఖీణో, ఫుసితస్స ఇదం ఫలం.

౪౮. ‘‘చన్దనస్సేవ మే కాయా, తథా గన్ధో పవాయతి;

సరీరతో మమ గన్ధో, అడ్ఢకోసే పవాయతి.

౪౯. ‘‘దిబ్బగన్ధం సమ్పవన్తం, పుఞ్ఞకమ్మసమఙ్గినం;

గన్ధం ఘత్వాన జానన్తి, ఫుసితో ఆగతో ఇధ.

౫౦. ‘‘సాఖాపలాసకట్ఠాని, తిణానిపి చ సబ్బసో;

మమ సఙ్కప్పమఞ్ఞాయ, గన్ధో సమ్పజ్జతే ఖణే.

౫౧. ‘‘సతసహస్సితో [సబ్బత్థపి ఏవమేవ దిస్సతి] కప్పే, చన్దనం అభిపూజయిం;

దుగ్గతిం నాభిజానామి, ఫుసితస్స ఇదం ఫలం.

౫౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఫుసితకమ్పియో థేరో ఇమా గాథాయో అభాసిత్థాతి.

ఫుసితకమ్పియత్థేరస్సాపదానం పఞ్చమం.