౪. ఏకదుస్సదాయకత్థేరఅపదానం

౧౯. ‘‘నగరే హంసవతియా, అహోసిం తిణహారకో;

తిణహారేన జీవామి, తేన పోసేమి దారకే.

౨౦. ‘‘పదుముత్తరో నామ జినో, సబ్బధమ్మాన పారగూ;

తమన్ధకారం నాసేత్వా, ఉప్పజ్జి లోకనాయకో.

౨౧. ‘‘సకే ఘరే నిసీదిత్వా, ఏవం చిన్తేసహం తదా;

‘బుద్ధో లోకే సముప్పన్నో, దేయ్యధమ్మో చ నత్థి మే.

౨౨. ‘‘‘ఇదం మే సాటకం ఏకం, నత్థి మే కోచి దాయకో;

దుక్ఖో నిరయసమ్ఫస్సో, రోపయిస్సామి దక్ఖిణం’.

౨౩. ‘‘ఏవాహం చిన్తయిత్వాన, సకం చిత్తం పసాదయిం;

ఏకం దుస్సం గహేత్వాన, బుద్ధసేట్ఠస్సదాసహం.

౨౪. ‘‘ఏకం దుస్సం దదిత్వాన, ఉక్కుట్ఠిం సమ్పవత్తయిం;

యది బుద్ధో తువం వీర, తారేహి మం మహాముని.

౨౫. ‘‘పదుముత్తరో లోకవిదూ, ఆహుతీనం పటిగ్గహో;

మమ దానం పకిత్తేన్తో, అకా మే అనుమోదనం.

౨౬. ‘‘‘ఇమినా ఏకదుస్సేన, చేతనాపణిధీహి చ;

కప్పసతసహస్సాని, వినిపాతం న గచ్ఛతి.

౨౭. ‘‘‘ఛత్తింసక్ఖత్తుం దేవిన్దో, దేవరజ్జం కరిస్సతి;

తేత్తింసక్ఖత్తుం రాజా చ, చక్కవత్తీ భవిస్సతి;

పదేసరజ్జం విపులం, గణనాతో అసఙ్ఖియం.

౨౮. ‘‘‘దేవలోకే మనుస్సే వా, సంసరన్తో తువం భవే;

రూపవా గుణసమ్పన్నో, అనవక్కన్తదేహవా;

అక్ఖోభం అమితం దుస్సం, లభిస్ససి యదిచ్ఛకం’.

౨౯. ‘‘ఇదం వత్వాన సమ్బుద్ధో, జలజుత్తమనామకో;

నభం అబ్భుగ్గమీ ధీరో, హంసరాజావ అమ్బరే.

౩౦. ‘‘యం యం యోనుపపజ్జామి, దేవత్తం అథ మానుసం;

భోగే మే ఊనతా నత్థి, ఏకదుస్సస్సిదం ఫలం.

౩౧. ‘‘పదుద్ధారే పదుద్ధారే, దుస్సం నిబ్బత్తతే మమం;

హేట్ఠా దుస్సమ్హి తిట్ఠామి, ఉపరి ఛదనం మమ.

౩౨. ‘‘చక్కవాళముపాదాయ, సకాననం సపబ్బతం;

ఇచ్ఛమానో చహం అజ్జ, దుస్సేహి ఛాదయేయ్యహం.

౩౩. ‘‘తేనేవ ఏకదుస్సేన, సంసరన్తో భవాభవే;

సువణ్ణవణ్ణో హుత్వాన, సంసరామి భవాభవే.

౩౪. ‘‘విపాకం ఏకదుస్సస్స, నజ్ఝగం కత్థచిక్ఖయం;

అయం మే అన్తిమా జాతి, విపచ్చతి ఇధాపి మే.

౩౫. ‘‘సతసహస్సితో కప్పే, యం దుస్సమదదిం తదా;

దుగ్గతిం నాభిజానామి, ఏకదుస్సస్సిదం ఫలం.

౩౬. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౩౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఏకదుస్సదాయకో థేరో ఇమా గాథాయో అభాసిత్థాతి.

ఏకదుస్సదాయకత్థేరస్సాపదానం చతుత్థం.