౯. పుప్ఫచ్ఛత్తియత్థేరఅపదానం

౭౩. ‘‘సిద్ధత్థస్స భగవతో, లోకజేట్ఠస్స తాదినో;

సచ్చం పకాసయన్తస్స, నిబ్బాపేన్తస్స పాణినో.

౭౪. ‘‘జలజం ఆహరిత్వాన, సతపత్తం మనోరమం;

పుప్ఫస్స ఛత్తం కత్వాన, బుద్ధస్స అభిరోపయిం.

౭౫. ‘‘సిద్ధత్థో చ లోకవిదూ, ఆహుతీనం పటిగ్గహో;

భిక్ఖుసఙ్ఘే ఠితో సత్థా, ఇమం గాథం అభాసథ.

౭౬. ‘‘‘యో మే చిత్తం పసాదేత్వా, పుప్ఫచ్ఛత్తం అధారయిం;

తేన చిత్తప్పసాదేన, దుగ్గతిం సో న గచ్ఛతి’.

౭౭. ‘‘ఇదం వత్వాన సమ్బుద్ధో, సిద్ధత్థో లోకనాయకో;

ఉయ్యోజేత్వాన పరిసం, వేహాసం నభముగ్గమి.

౭౮. ‘‘వుట్ఠితే నరదేవమ్హి, సేతచ్ఛత్తమ్పి వుట్ఠహి;

పురతో బుద్ధసేట్ఠస్స, గచ్ఛతి ఛత్తముత్తమం.

౭౯. ‘‘చతున్నవుతితో కప్పే, యం ఛత్తం అభిరోపయిం;

దుగ్గతిం నాభిజానామి, పుప్ఫచ్ఛత్తస్సిదం ఫలం.

౮౦. ‘‘చతుసత్తతికప్పమ్హి, అట్ఠ జలసిఖా అహూ;

సత్తరతనసమ్పన్నా, చక్కవత్తీ మహబ్బలా.

౮౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పుప్ఫచ్ఛత్తియో థేరో ఇమా గాథాయో అభాసిత్థాతి.

పుప్ఫచ్ఛత్తియత్థేరస్సాపదానం నవమం.