౧౦. సపరివారఛత్తదాయకత్థేరఅపదానం

౮౨. ‘‘పదుముత్తరో లోకవిదూ, ఆహుతీనం పటిగ్గహో;

ఆకాసే జలవుట్ఠీవ వస్సతే [వస్సతి (సీ. స్యా.), వస్సేతి (?)] ధమ్మవుట్ఠియా.

౮౩. ‘‘తమద్దసాసిం సమ్బుద్ధం, దేసేన్తం అమతం పదం;

సకం చిత్తం పసాదేత్వా, అగమాసిం సకం ఘరం.

౮౪. ‘‘ఛత్తం అలఙ్కతం గయ్హ, ఉపగచ్ఛిం నరుత్తమం;

హట్ఠో హట్ఠేన చిత్తేన, ఆకాసే ఉక్ఖిపిం అహం.

౮౫. ‘‘సుసఙ్గహితయానంవ, దన్తోవ సావకుత్తమో;

ఉపగన్త్వాన సమ్బుద్ధం, మత్థకే సమ్పతిట్ఠహి.

౮౬. ‘‘అనుకమ్పకో కారుణికో, బుద్ధో లోకగ్గనాయకో;

భిక్ఖుసఙ్ఘే నిసీదిత్వా, ఇమా గాథా అభాసథ.

౮౭. ‘‘‘యేన ఛత్తమిదం దిన్నం, అలఙ్కతం మనోరమం;

తేన చిత్తప్పసాదేన, దుగ్గతిం సో న గచ్ఛతి.

౮౮. ‘‘‘సత్తక్ఖత్తుఞ్చ దేవేసు, దేవరజ్జం కరిస్సతి;

బాత్తింసక్ఖత్తుఞ్చ రాజా, చక్కవత్తీ భవిస్సతి.

౮౯. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౯౦. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

సబ్బాసవే పరిఞ్ఞాయ, నిబ్బాయిస్సతినాసవో’.

౯౧. ‘‘బుద్ధస్స గిరమఞ్ఞాయ, వాచాసభిముదీరితం;

పసన్నచిత్తో సుమనో, భియ్యో హాసం జనేసహం.

౯౨. ‘‘జహిత్వా మానుసం యోనిం, దిబ్బం యోనిం [దేవయోనిం (సీ.), దిబ్బయోనిం (స్యా.)] మజ్ఝగం;

విమానముత్తమం మయ్హం, అబ్భుగ్గతం మనోరమం.

౯౩. ‘‘విమానా నిక్ఖమన్తస్స, సేతచ్ఛత్తం ధరీయతి;

తదా సఞ్ఞం పటిలభిం, పుబ్బకమ్మస్సిదం ఫలం.

౯౪. ‘‘దేవలోకా చవిత్వాన, మనుస్సత్తఞ్చ ఆగమిం;

ఛత్తింసక్ఖత్తుం చక్కవత్తీ, సత్తకప్పసతమ్హితో.

౯౫. ‘‘తమ్హా కాయా చవిత్వాన, ఆగచ్ఛిం [అగఞ్ఛిం (?)] తిదసం పురం;

సంసరిత్వానుపుబ్బేన, మానుసం పునరాగమిం.

౯౬. ‘‘ఓక్కన్తం మాతుకుచ్ఛిం మం, సేత్తచ్ఛత్తం అధారయుం;

జాతియా సత్తవస్సోహం, పబ్బజిం అనగారియం.

౯౭. ‘‘సునన్దో నామ నామేన, బ్రాహ్మణో మన్తపారగూ;

ఫలికం ఛత్తమాదాయ, సావకగ్గస్స సో తదా.

౯౮. ‘‘అనుమోది మహావీరో, సారిపుత్తో మహాకథీ;

సుత్వానుమోదనం తస్స, పుబ్బకమ్మమనుస్సరిం.

౯౯. ‘‘అఞ్జలిం పగ్గహేత్వాన, సకం చిత్తం పసాదయిం;

సరిత్వా పురిమం కమ్మం, అరహత్తమపాపుణిం.

౧౦౦. ‘‘ఉట్ఠాయ ఆసనా తమ్హా, సిరే కత్వాన అఞ్జలిం;

సమ్బుద్ధం అభివాదేత్వా, ఇమం వాచం ఉదీరియిం.

౧౦౧. ‘‘సతసహస్సితో కప్పే, బుద్ధో లోకే అనుత్తరో;

పదుముత్తరో లోకవిదూ, ఆహుతీనం పటిగ్గహో.

౧౦౨. ‘‘తస్స ఛత్తం మయా దిన్నం, విచిత్తం సమలఙ్కతం;

ఉభో హత్థేహి పగ్గణ్హి, సయమ్భూ అగ్గపుగ్గలో.

౧౦౩. ‘‘అహో బుద్ధో అహో ధమ్మో, అహో నో సత్థుసమ్పదా;

ఏకచ్ఛత్తస్స దానేన, దుగ్గతిం నుపపజ్జహం.

౧౦౪. ‘‘కిలేసా ఝాపితా మయ్హం, భవా సబ్బే సమూహతా;

సబ్బాసవే పరిఞ్ఞాయ, విహరామి అనాసవో.

౧౦౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సపరివారఛత్తదాయకో థేరో ఇమా గాథాయో అభాసిత్థాతి.

సపరివారఛత్తదాయకత్థేరస్సాపదానం దసమం.

ఉమాపుప్ఫియవగ్గో తేత్తింసతిమో.