౩౩. ఉమాపుప్ఫియవగ్గో

౧. ఉమాపుప్ఫియత్థేరఅపదానం

౧. ‘‘సమాహితం సమాపన్నం, సిద్ధత్థమపరాజితం;

సమాధినా ఉపవిట్ఠం, అద్దసాహం నరుత్తమం.

౨. ‘‘ఉమాపుప్ఫం గహేత్వాన, బుద్ధస్స అభిరోపయిం;

సబ్బపుప్ఫా ఏకసీసా, ఉద్ధంవణ్టా అధోముఖా.

౩. ‘‘సుచిత్తా వియ తిట్ఠన్తే, ఆకాసే పుప్ఫసన్థరా;

తేన చిత్తప్పసాదేన, తుసితం ఉపపజ్జహం.

౪. ‘‘చతున్నవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౫. ‘‘పఞ్చపఞ్ఞాసితో కప్పే, ఏకో ఆసిం మహీపతి;

సమన్తఛదనో నామ, చక్కవత్తీ మహబ్బలో.

౬. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం.

ఇత్థం సుదం ఆయస్మా ఉమాపుప్ఫియో థేరో ఇమా గాథాయో అభాసిత్థాతి.

ఉమాపుప్ఫియత్థేరస్సాపదానం పఠమం.

౨. పులినపూజకత్థేరఅపదానం

౭. ‘‘కకుధం విలసన్తంవ, నిసభాజానియం యథా;

ఓసధింవ విరోచన్తం, ఓభాసన్తం నరాసభం.

౮. ‘‘అఞ్జలిం పగ్గహేత్వాన, అవన్దిం సత్థునో అహం;

సత్థారం పరివణ్ణేసిం, సకకమ్మేన తోసయిం [తోసితో (సీ.)].

౯. ‘‘సుసుద్ధం పులినం గయ్హ, గతమగ్గే సమోకిరిం;

ఉచ్ఛఙ్గేన గహేత్వాన, విపస్సిస్స మహేసినో.

౧౦. ‘‘తతో ఉపడ్ఢపులినం, విప్పసన్నేన చేతసా;

దివావిహారే ఓసిఞ్చిం, ద్విపదిన్దస్స తాదినో.

౧౧. ‘‘ఏకనవుతితో కప్పే, పులినం యమసిఞ్చహం;

దుగ్గతిం నాభిజానామి, పులినస్స ఇదం ఫలం.

౧౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పులినపూజకో థేరో ఇమా గాథాయో అభాసిత్థాతి.

పులినపూజకత్థేరస్సాపదానం దుతియం.

౩. హాసజనకత్థేరఅపదానం

౧౩. ‘‘దుమగ్గే పంసుకూలకం [పంసుకూలికం (స్యా. క.)], లగ్గం దిస్వాన సత్థునో;

అఞ్జలిం పగ్గహేత్వాన, భియ్యో ఉచ్చారితం మయా.

౧౪. ‘‘దూరతో పన దిస్వాన [పతిదిస్వాన (సీ. స్యా.)], హాసో మే ఉదపజ్జథ;

అఞ్జలిం పగ్గహేత్వాన, భియ్యో చిత్తం పసాదయిం.

౧౫. ‘‘ఏకనవుతితో కప్పే, యం సఞ్ఞమలభిం తదా;

దుగ్గతిం నాభిజానామి, బుద్ధసఞ్ఞాయిదం ఫలం.

౧౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా హాసజనకో థేరో ఇమా గాథాయో అభాసిత్థాతి.

హాసజనకత్థేరస్సాపదానం తతియం.

౪. యఞ్ఞసామికత్థేరఅపదానం

౧౭. ‘‘జాతియా సత్తవస్సోహం, అహోసిం మన్తపారగూ;

కులవత్తం [కులవంసం (సీ. స్యా.)] అధారేసిం, యఞ్ఞో ఉస్సాహితో మయా.

౧౮. ‘‘చుల్లాసీతిసహస్సాని, పసూ హఞ్ఞన్తి మే తదా;

సారథమ్భుపనీతాని [తారస్మీహి ఉపనీతాని (క.), సారస్మింహి ఉపనీతాని (స్యా.)], యఞ్ఞత్థాయ ఉపట్ఠితా.

౧౯. ‘‘ఉక్కాముఖపహట్ఠోవ, ఖదిరఙ్గారసన్నిభో;

ఉదయన్తోవ సూరియో, పుణ్ణమాయేవ [పుణ్ణమాసేవ (సీ.)] చన్దిమా.

౨౦. ‘‘సిద్ధత్థో సబ్బసిద్ధత్థో, తిలోకమహితో హితో;

ఉపగన్త్వాన సమ్బుద్ధో, ఇదం వచనమబ్రవి.

౨౧. ‘‘‘అహింసా సబ్బపాణీనం, కుమార మమ రుచ్చతి;

థేయ్యా చ అతిచారా చ, మజ్జపానా చ ఆరతి.

౨౨. ‘‘‘రతి చ సమచరియాయ, బాహుసచ్చం కతఞ్ఞుతా;

దిట్ఠే ధమ్మే పరత్థ చ, ధమ్మా ఏతే పసంసియా.

౨౩. ‘‘‘ఏతే ధమ్మే భావయిత్వా, సబ్బసత్తహితే రతో [హితేసితో (క.)];

బుద్ధే చిత్తం పసాదేత్వా, భావేహి మగ్గముత్తమం’.

౨౪. ‘‘ఇదం వత్వాన సబ్బఞ్ఞూ, లోకజేట్ఠో నరాసభో;

మమేవం అనుసాసిత్వా, వేహాసం ఉగ్గతో గతో.

౨౫. ‘‘పుబ్బే చిత్తం విసోధేత్వా, పచ్ఛా చిత్తం పసాదయిం;

తేన చిత్తప్పసాదేన, తుసితం ఉపపజ్జహం.

౨౬. ‘‘చతున్నవుతితో కప్పే, యదా చిత్తం పసాదయిం;

దుగ్గతిం నాభిజానామి, బుద్ధసఞ్ఞాయిదం ఫలం.

౨౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా యఞ్ఞసామికో థేరో ఇమా గాథాయో అభాసిత్థాతి.

యఞ్ఞసామికత్థేరస్సాపదానం చతుత్థం.

౫. నిమిత్తసఞ్ఞకత్థేరఅపదానం

౨౮. ‘‘చన్దభాగానదీతీరే, వసామి అస్సమే అహం;

సువణ్ణమిగమద్దక్ఖిం, చరన్తం విపినే అహం.

౨౯. ‘‘మిగే చిత్తం పసాదేత్వా, లోకజేట్ఠం అనుస్సరిం;

తేన చిత్తప్పసాదేన, అఞ్ఞే బుద్ధే అనుస్సరిం.

౩౦. ‘‘అబ్భతీతా చ యే బుద్ధా, వత్తమానా అనాగతా;

ఏవమేవం విరోచన్తి, మిగరాజావ తే తయో.

౩౧. ‘‘చతున్నవుతితో కప్పే, యం సఞ్ఞమలభిం తదా;

దుగ్గతిం నాభిజానామి, బుద్ధసఞ్ఞాయిదం ఫలం.

౩౨. ‘‘సత్తవీసే ఇతో కప్పే, ఏకో ఆసిం మహీపతి;

అరఞ్ఞసత్థో నామేన, చక్కవత్తీ మహబ్బలో.

౩౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నిమిత్తసఞ్ఞకో థేరో ఇమా గాథాయో అభాసిత్థాతి.

నిమిత్తసఞ్ఞకత్థేరస్సాపదానం పఞ్చమం.

౬. అన్నసంసావకత్థేరఅపదానం

౩౪. ‘‘సువణ్ణవణ్ణం సమ్బుద్ధం, గచ్ఛన్తం అన్తరాపణే;

కఞ్చనగ్ఘియసఙ్కాసం, బాత్తింసవరలక్ఖణం.

౩౫. ‘‘సిద్ధత్థం సబ్బసిద్ధత్థం, అనేజం అపరాజితం;

సమ్బుద్ధం అతినామేత్వా, భోజయిం తం మహామునిం.

౩౬. ‘‘ముని కారుణికో లోకే, ఓభాసయి మమం తదా;

బుద్ధే చిత్తం పసాదేత్వా, కప్పం సగ్గమ్హి మోదహం.

౩౭. ‘‘చతున్నవుతితో కప్పే, యం దానమదదిం తదా;

దుగ్గతిం నాభిజానామి, భిక్ఖాదానస్సిదం ఫలం.

౩౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అన్నసంసావకో థేరో ఇమా గాథాయో అభాసిత్థాతి;

అన్నసంసావకత్థేరస్సాపదానం ఛట్ఠం.

౭. నిగ్గుణ్డిపుప్ఫియత్థేరఅపదానం

౩౯. ‘‘యదా దేవో దేవకాయా, చవతే ఆయుసఙ్ఖయా;

తయో సద్దా నిచ్ఛరన్తి, దేవానం అనుమోదతం.

౪౦. ‘‘‘ఇతో భో సుగతిం గచ్ఛ, మనుస్సానం సహబ్యతం;

మనుస్సభూతో సద్ధమ్మే, లభ సద్ధం అనుత్తరం.

౪౧. ‘‘‘సా తే సద్ధా నివిట్ఠాస్స, మూలజాతా పతిట్ఠితా;

యావజీవం అసంహీరా, సద్ధమ్మే సుప్పవేదితే.

౪౨. ‘‘‘కాయేన కుసలం కత్వా, వాచాయ కుసలం బహుం;

మనసా కుసలం కత్వా, అబ్యాపజ్జం నిరూపధిం.

౪౩. ‘‘‘తతో ఓపధికం పుఞ్ఞం, కత్వా దానేన తం బహుం;

అఞ్ఞేపి మచ్చే సద్ధమ్మే, బ్రహ్మచరియే నివేసయ’.

౪౪. ‘‘ఇమాయ అనుకమ్పాయ, దేవాదేవం యదా విదూ;

చవన్తం అనుమోదన్తి, ఏహి దేవ పునప్పునం [దేవపురం పున (సీ.)].

౪౫. ‘‘సంవేగో మే [సంవిగ్గోహం (స్యా.)] తదా ఆసి, దేవసఙ్ఘే సమాగతే;

కంసు నామ అహం యోనిం, గమిస్సామి ఇతో చుతో.

౪౬. ‘‘మమ సంవేగమఞ్ఞాయ, సమణో భావితిన్ద్రియో;

మముద్ధరితుకామో సో, ఆగచ్ఛి మమ సన్తికం.

౪౭. ‘‘సుమనో నామ నామేన, పదుముత్తరసావకో;

అత్థధమ్మానుసాసిత్వా, సంవేజేసి మమం తదా.

ద్వాదసమం భాణవారం.

౪౮. ‘‘తస్సాహం వచనం సుత్వా, బుద్ధే చిత్తం పసాదయిం;

తం ధీరం అభివాదేత్వా, తత్థ కాలంకతో అహం.

౪౯. ‘‘ఉపపజ్జిం స [ఉపపజ్జిస్సం (సీ.)] తత్థేవ, సుక్కమూలేన చోదితో;

వసన్తో మాతుకుచ్ఛిమ్హి, పున ధారేతి మాతుయా.

౫౦. ‘‘తమ్హా కాయా చవిత్వాన, తిదసే ఉపపజ్జహం;

ఏత్థన్తరే న పస్సామి, దోమనస్సమహం తదా.

౫౧. ‘‘తావతింసా చవిత్వాన, మాతుకుచ్ఛిం సమోక్కమిం;

నిక్ఖమిత్వాన కుచ్ఛిమ్హా, కణ్హసుక్కం అజానహం.

౫౨. ‘‘జాతియా సత్తవస్సోవ [జాతియా సత్తవస్సేన (స్యా.)], ఆరామం పావిసిం అహం;

గోతమస్స భగవతో, సక్యపుత్తస్స తాదినో.

౫౩. ‘‘విత్థారికే [విత్థారితే (సీ. క.)] పావచనే, బాహుజఞ్ఞమ్హి సాసనే;

అద్దసం సాసనకరే, భిక్ఖవో తత్థ సత్థునో.

౫౪. ‘‘సావత్థి నామ నగరం, రాజా తత్థాసి కోసలో;

రథేన నాగయుత్తేన, ఉపేసి బోధిముత్తమం.

౫౫. ‘‘తస్సాహం నాగం దిస్వాన, పుబ్బకమ్మం అనుస్సరిం;

అఞ్జలిం పగ్గహేత్వాన, సమయం అగమాసహం.

౫౬. ‘‘జాతియా సత్తవస్సోవ, పబ్బజిం అనగారియం;

యో సో బుద్ధం ఉపట్ఠాసి, ఆనన్దో నామ సావకో.

౫౭. ‘‘గతిమా ధితిమా చేవ, సతిమా చ బహుస్సుతో;

రఞ్ఞో చిత్తం పసాదేన్తో, నియ్యాదేసి మహాజుతి.

౫౮. ‘‘తస్సాహం ధమ్మం సుత్వాన, పుబ్బకమ్మం అనుస్సరిం;

తత్థేవ ఠితకో సన్తో, అరహత్తమపాపుణిం.

౫౯. ‘‘ఏకంసం చీవరం కత్వా, సిరే కత్వాన అఞ్జలిం;

సమ్బుద్ధం అభివాదేత్వా, ఇమం వాచం ఉదీరయిం.

౬౦. ‘‘‘పదుముత్తరబుద్ధస్స, ద్విపదిన్దస్స సత్థునో;

నిగ్గుణ్డిపుప్ఫం పగ్గయ్హ, సీహాసనే ఠపేసహం.

౬౧. ‘‘‘తేన కమ్మేన ద్విపదిన్ద, లోకజేట్ఠ నరాసభ;

పత్తోమ్హి అచలం ఠానం, హిత్వా జయపరాజయం’.

౬౨. ‘‘పఞ్చవీససహస్సమ్హి, కప్పానం మనుజాధిపా;

అబ్బుదనిరబ్బుదాని, అట్ఠట్ఠాసింసు ఖత్తియా.

౬౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నిగ్గుణ్డిపుప్ఫియో థేరో ఇమా గాథాయో అభాసిత్థాతి.

నిగ్గుణ్డిపుప్ఫియత్థేరస్సాపదానం సత్తమం.

౮. సుమనావేళియత్థేరఅపదానం

౬౪. ‘‘వేస్సభుస్స భగవతో, లోకజేట్ఠస్స తాదినో;

సబ్బే జనా సమాగమ్మ, మహాపూజం కరోన్తి తే.

౬౫. ‘‘సుధాయ పిణ్డం కత్వాన, ఆవేళం సుమనాయహం;

సీహాసనస్స పురతో, అభిరోపేసహం తదా.

౬౬. ‘‘సబ్బే జనా సమాగమ్మ, పేక్ఖన్తి పుప్ఫముత్తమం;

కేనిదం పూజితం పుప్ఫం, బుద్ధసేట్ఠస్స తాదినో.