౮. సుమనావేళియత్థేరఅపదానం

౬౪. ‘‘వేస్సభుస్స భగవతో, లోకజేట్ఠస్స తాదినో;

సబ్బే జనా సమాగమ్మ, మహాపూజం కరోన్తి తే.

౬౫. ‘‘సుధాయ పిణ్డం కత్వాన, ఆవేళం సుమనాయహం;

సీహాసనస్స పురతో, అభిరోపేసహం తదా.

౬౬. ‘‘సబ్బే జనా సమాగమ్మ, పేక్ఖన్తి పుప్ఫముత్తమం;

కేనిదం పూజితం పుప్ఫం, బుద్ధసేట్ఠస్స తాదినో.

౬౭. ‘‘తేన చిత్తప్పసాదేన, నిమ్మానం ఉపపజ్జహం;

అనుభోమి [అనుభోసిం (సీ.)] సకం కమ్మం, పుబ్బే సుకతమత్తనో.

౬౮. ‘‘యం యం యోనుపపజ్జామి, దేవత్తం అథ మానుసం;

సబ్బేసానం పియో హోమి, పుప్ఫపూజాయిదం ఫలం.

౬౯. ‘‘నాభిజానామి కాయేన, వాచాయ ఉద చేతసా;

సంయతానం తపస్సీనం, కతం అక్కోసితం మయా.

౭౦. ‘‘తేన సుచరితేనాహం, చిత్తస్స పణిధీహి చ;

సబ్బేసం పూజితో హోమి, అనక్కోసస్సిదం ఫలం.

౭౧. ‘‘ఇతో ఏకాదసే కప్పే, సహస్సారోసి ఖత్తియో;

సత్తరతనసమ్పన్నో, చక్కవత్తీ మహబ్బలో.

౭౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సుమనావేళియో థేరో ఇమా గాథాయో అభాసిత్థాతి.

సుమనావేళియత్థేరస్సాపదానం అట్ఠమం.