౭. నిగ్గుణ్డిపుప్ఫియత్థేరఅపదానం

౩౯. ‘‘యదా దేవో దేవకాయా, చవతే ఆయుసఙ్ఖయా;

తయో సద్దా నిచ్ఛరన్తి, దేవానం అనుమోదతం.

౪౦. ‘‘‘ఇతో భో సుగతిం గచ్ఛ, మనుస్సానం సహబ్యతం;

మనుస్సభూతో సద్ధమ్మే, లభ సద్ధం అనుత్తరం.

౪౧. ‘‘‘సా తే సద్ధా నివిట్ఠాస్స, మూలజాతా పతిట్ఠితా;

యావజీవం అసంహీరా, సద్ధమ్మే సుప్పవేదితే.

౪౨. ‘‘‘కాయేన కుసలం కత్వా, వాచాయ కుసలం బహుం;

మనసా కుసలం కత్వా, అబ్యాపజ్జం నిరూపధిం.

౪౩. ‘‘‘తతో ఓపధికం పుఞ్ఞం, కత్వా దానేన తం బహుం;

అఞ్ఞేపి మచ్చే సద్ధమ్మే, బ్రహ్మచరియే నివేసయ’.

౪౪. ‘‘ఇమాయ అనుకమ్పాయ, దేవాదేవం యదా విదూ;

చవన్తం అనుమోదన్తి, ఏహి దేవ పునప్పునం [దేవపురం పున (సీ.)].

౪౫. ‘‘సంవేగో మే [సంవిగ్గోహం (స్యా.)] తదా ఆసి, దేవసఙ్ఘే సమాగతే;

కంసు నామ అహం యోనిం, గమిస్సామి ఇతో చుతో.

౪౬. ‘‘మమ సంవేగమఞ్ఞాయ, సమణో భావితిన్ద్రియో;

మముద్ధరితుకామో సో, ఆగచ్ఛి మమ సన్తికం.

౪౭. ‘‘సుమనో నామ నామేన, పదుముత్తరసావకో;

అత్థధమ్మానుసాసిత్వా, సంవేజేసి మమం తదా.

ద్వాదసమం భాణవారం.

౪౮. ‘‘తస్సాహం వచనం సుత్వా, బుద్ధే చిత్తం పసాదయిం;

తం ధీరం అభివాదేత్వా, తత్థ కాలంకతో అహం.

౪౯. ‘‘ఉపపజ్జిం స [ఉపపజ్జిస్సం (సీ.)] తత్థేవ, సుక్కమూలేన చోదితో;

వసన్తో మాతుకుచ్ఛిమ్హి, పున ధారేతి మాతుయా.

౫౦. ‘‘తమ్హా కాయా చవిత్వాన, తిదసే ఉపపజ్జహం;

ఏత్థన్తరే న పస్సామి, దోమనస్సమహం తదా.

౫౧. ‘‘తావతింసా చవిత్వాన, మాతుకుచ్ఛిం సమోక్కమిం;

నిక్ఖమిత్వాన కుచ్ఛిమ్హా, కణ్హసుక్కం అజానహం.

౫౨. ‘‘జాతియా సత్తవస్సోవ [జాతియా సత్తవస్సేన (స్యా.)], ఆరామం పావిసిం అహం;

గోతమస్స భగవతో, సక్యపుత్తస్స తాదినో.

౫౩. ‘‘విత్థారికే [విత్థారితే (సీ. క.)] పావచనే, బాహుజఞ్ఞమ్హి సాసనే;

అద్దసం సాసనకరే, భిక్ఖవో తత్థ సత్థునో.

౫౪. ‘‘సావత్థి నామ నగరం, రాజా తత్థాసి కోసలో;

రథేన నాగయుత్తేన, ఉపేసి బోధిముత్తమం.

౫౫. ‘‘తస్సాహం నాగం దిస్వాన, పుబ్బకమ్మం అనుస్సరిం;

అఞ్జలిం పగ్గహేత్వాన, సమయం అగమాసహం.

౫౬. ‘‘జాతియా సత్తవస్సోవ, పబ్బజిం అనగారియం;

యో సో బుద్ధం ఉపట్ఠాసి, ఆనన్దో నామ సావకో.

౫౭. ‘‘గతిమా ధితిమా చేవ, సతిమా చ బహుస్సుతో;

రఞ్ఞో చిత్తం పసాదేన్తో, నియ్యాదేసి మహాజుతి.

౫౮. ‘‘తస్సాహం ధమ్మం సుత్వాన, పుబ్బకమ్మం అనుస్సరిం;

తత్థేవ ఠితకో సన్తో, అరహత్తమపాపుణిం.

౫౯. ‘‘ఏకంసం చీవరం కత్వా, సిరే కత్వాన అఞ్జలిం;

సమ్బుద్ధం అభివాదేత్వా, ఇమం వాచం ఉదీరయిం.

౬౦. ‘‘‘పదుముత్తరబుద్ధస్స, ద్విపదిన్దస్స సత్థునో;

నిగ్గుణ్డిపుప్ఫం పగ్గయ్హ, సీహాసనే ఠపేసహం.

౬౧. ‘‘‘తేన కమ్మేన ద్విపదిన్ద, లోకజేట్ఠ నరాసభ;

పత్తోమ్హి అచలం ఠానం, హిత్వా జయపరాజయం’.

౬౨. ‘‘పఞ్చవీససహస్సమ్హి, కప్పానం మనుజాధిపా;

అబ్బుదనిరబ్బుదాని, అట్ఠట్ఠాసింసు ఖత్తియా.

౬౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నిగ్గుణ్డిపుప్ఫియో థేరో ఇమా గాథాయో అభాసిత్థాతి.

నిగ్గుణ్డిపుప్ఫియత్థేరస్సాపదానం సత్తమం.