౩. ఛత్తదాయకత్థేరఅపదానం

౧౧. ‘‘పుత్తో మమ పబ్బజితో, కాసాయవసనో తదా;

సో చ బుద్ధత్తం సమ్పత్తో, నిబ్బుతో లోకపూజితో.

౧౨. ‘‘విచినన్తో సకం పుత్తం, అగమం పచ్ఛతో అహం;

నిబ్బుతస్స మహన్తస్స, చితకం అగమాసహం.

౧౩. ‘‘పగ్గయ్హ అఞ్జలిం తత్థ, వన్దిత్వా చితకం అహం;

సేతచ్ఛత్తఞ్చ పగ్గయ్హ, ఆరోపేసిం అహం తదా.

౧౪. ‘‘చతున్నవుతితో కప్పే, యం ఛత్తమభిరోపయిం;

దుగ్గతిం నాభిజానామి, ఛత్తదానస్సిదం ఫలం.

౧౫. ‘‘పఞ్చవీసే ఇతో కప్పే, సత్త ఆసుం జనాధిపా;

మహారహసనామా తే, చక్కవత్తీ మహబ్బలా.

౧౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఛత్తదాయకో థేరో ఇమా గాథాయో అభాసిత్థాతి.

ఛత్తదాయకత్థేరస్సాపదానం తతియం.