౩౦. చితకపూజకవగ్గో

౧. చితకపూజకత్థేరఅపదానం

౧. ‘‘అజితో నామ నామేన, అహోసిం బ్రాహ్మణో తదా;

ఆహుతిం యిట్ఠుకామోహం, నానాపుప్ఫం సమానయిం.

౨. ‘‘జలన్తం చితకం దిస్వా, సిఖినో లోకబన్ధునో;

తఞ్చ పుప్ఫం సమానేత్వా, చితకే ఓకిరిం అహం.

౩. ‘‘ఏకత్తింసే ఇతో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౪. ‘‘సత్తవీసే [సత్తతింసే (క.)] ఇతో కప్పే, సత్తాసుం మనుజాధిపా;

సుపజ్జలితనామా తే, చక్కవత్తీ మహబ్బలా.

౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా చితకపూజకో థేరో ఇమా గాథాయో అభాసిత్థాతి.

చితకపూజకత్థేరస్సాపదానం పఠమం.

౨. పుప్ఫధారకత్థేరఅపదానం

౬. ‘‘వాకచీరధరో ఆసిం, అజినుత్తరవాసనో;

అభిఞ్ఞా పఞ్చ నిబ్బత్తా, చన్దస్స పరిమజ్జకో.

౭. ‘‘విపస్సిం లోకపజ్జోతం, దిస్వా అభిగతం మమం;

పారిచ్ఛత్తకపుప్ఫాని, ధారేసిం సత్థునో అహం.

౮. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, ధారణాయ ఇదం ఫలం.

౯. ‘‘సత్తాసీతిమ్హితో కప్పే, ఏకో ఆసిం మహీపతి;

సమన్తధారణో నామ, చక్కవత్తీ మహబ్బలో.

౧౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పుప్ఫధారకో థేరో ఇమా గాథాయో అభాసిత్థాతి.

పుప్ఫధారకత్థేరస్సాపదానం దుతియం.

౩. ఛత్తదాయకత్థేరఅపదానం

౧౧. ‘‘పుత్తో మమ పబ్బజితో, కాసాయవసనో తదా;

సో చ బుద్ధత్తం సమ్పత్తో, నిబ్బుతో లోకపూజితో.

౧౨. ‘‘విచినన్తో సకం పుత్తం, అగమం పచ్ఛతో అహం;

నిబ్బుతస్స మహన్తస్స, చితకం అగమాసహం.

౧౩. ‘‘పగ్గయ్హ అఞ్జలిం తత్థ, వన్దిత్వా చితకం అహం;

సేతచ్ఛత్తఞ్చ పగ్గయ్హ, ఆరోపేసిం అహం తదా.

౧౪. ‘‘చతున్నవుతితో కప్పే, యం ఛత్తమభిరోపయిం;

దుగ్గతిం నాభిజానామి, ఛత్తదానస్సిదం ఫలం.

౧౫. ‘‘పఞ్చవీసే ఇతో కప్పే, సత్త ఆసుం జనాధిపా;

మహారహసనామా తే, చక్కవత్తీ మహబ్బలా.

౧౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఛత్తదాయకో థేరో ఇమా గాథాయో అభాసిత్థాతి.

ఛత్తదాయకత్థేరస్సాపదానం తతియం.

౪. సద్దసఞ్ఞకత్థేరఅపదానం

౧౭. ‘‘అనుగ్గతమ్హి ఆదిచ్చే, పనాదో [పసాదో (స్యా. అట్ఠ.)] విపులో అహు;

బుద్ధసేట్ఠస్స లోకమ్హి, పాతుభావో మహేసినో.

౧౮. ‘‘ఘోస [సద్ద (సీ. స్యా.)] మస్సోసహం తత్థ, న చ పస్సామి తం జినం;

మరణఞ్చ అనుప్పత్తో, బుద్ధసఞ్ఞమనుస్సరిం.

౧౯. ‘‘చతున్నవుతితో కప్పే, యం సఞ్ఞమలభిం తదా;

దుగ్గతిం నాభిజానామి, బుద్ధపూజాయిదం ఫలం.

౨౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సద్దసఞ్ఞకో థేరో ఇమా గాథాయో అభాసిత్థాతి.

సద్దసఞ్ఞకత్థేరస్సాపదానం చతుత్థం.

౫. గోసీసనిక్ఖేపకత్థేరఅపదానం

౨౧. ‘‘ఆరామద్వారా నిక్ఖమ్మ, గోసీసం సన్థతం మయా;

అనుభోమి సకం కమ్మం, పుబ్బకమ్మస్సిదం ఫలం.

౨౨. ‘‘ఆజానియా వాతజవా, సిన్ధవా సీఘవాహనా;

అనుభోమి సబ్బమేతం, గోసీసస్స ఇదం ఫలం.

౨౩. ‘‘అహో కారం పరమకారం, సుఖత్తే సుకతం మయా;

సఙ్ఘే కతస్స కారస్స, న అఞ్ఞం కలమగ్ఘతి.

౨౪. ‘‘చతున్నవుతితో కప్పే, యం సీసం సన్థరిం అహం;

దుగ్గతిం నాభిజానామి, సన్థరస్స ఇదం ఫలం.

౨౫. ‘‘పఞ్చసత్తతికప్పమ్హి, సుప్పతిట్ఠితనామకో;

ఏకో ఆసిం మహాతేజో, చక్కవత్తీ మహబ్బలో.

౨౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా గోసీసనిక్ఖేపకో థేరో ఇమా గాథాయో అభాసిత్థాతి.

గోసీసనిక్ఖేపకత్థేరస్సాపదానం పఞ్చమం.

౬. పాదపూజకత్థేరఅపదానం

౨౭. ‘‘పబ్బతే హిమవన్తమ్హి, అహోసిం కిన్నరో తదా;

అద్దసం విరజం బుద్ధం, పీతరంసింవ భాణుమం.

౨౮. ‘‘ఉపేతం తమహం [ఉపేతోపి తదా (స్యా.), ఉపేసిం తమహం (?)] బుద్ధం, విపస్సిం లోకనాయకం;

చన్దనం తగరఞ్చాపి, పాదే ఓసిఞ్చహం తదా.

౨౯. ‘‘ఏకనవుతితో కప్పే, యం పాదం అభిపూజయిం;

దుగ్గతిం నాభిజానామి, పాదపూజాయిదం ఫలం.

౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పాదపూజకో థేరో ఇమా గాథాయో అభాసిత్థాతి.

పాదపూజకత్థేరస్సాపదానం ఛట్ఠం.

౭. దేసకిత్తకత్థేరఅపదానం

౩౧. ‘‘ఉపసాలకనామోహం, అహోసిం బ్రాహ్మణో తదా;

కాననం వనమోగాళ్హం, లోకజేట్ఠం నరాసభం.

౩౨. ‘‘దిస్వాన వన్దిం పాదేసు, లోకాహుతిపటిగ్గహం;

పసన్నచిత్తం మం ఞత్వా, బుద్ధో అన్తరధాయథ.

౩౩. ‘‘కాననా అభినిక్ఖమ్మ, బుద్ధసేట్ఠమనుస్సరిం;

తం దేసం కిత్తయిత్వాన, కప్పం సగ్గమ్హి మోదహం.

౩౪. ‘‘ద్వేనవుతే ఇతో కప్పే, యం దేసమభికిత్తయిం;

దుగ్గతిం నాభిజానామి, కిత్తనాయ ఇదం ఫలం.

౩౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా దేసకిత్తకో థేరో ఇమా గాథాయో అభాసిత్థాతి.

దేసకిత్తకత్థేరస్సాపదానం సత్తమం.

౮. సరణగమనియత్థేరఅపదానం

౩౬. ‘‘పబ్బతే హిమవన్తమ్హి, అహోసిం లుద్దకో తదా;

విపస్సిం అద్దసం బుద్ధం, లోకజేట్ఠం నరాసభం.

౩౭. ‘‘ఉపాసిత్వాన సమ్బుద్ధం, వేయ్యావచ్చమకాసహం;

సరణఞ్చ ఉపాగచ్ఛిం, ద్విపదిన్దస్స తాదినో.

౩౮. ‘‘ఏకనవుతితో కప్పే, సరణం ఉపగచ్ఛహం;

దుగ్గతిం నాభిజానామి, సరణాగమనప్ఫలం.

౩౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సరణగమనియో థేరో ఇమా గాథాయో అభాసిత్థాతి.

సరణగమనియత్థేరస్సాపదానం అట్ఠమం.

౯. అమ్బపిణ్డియత్థేరఅపదానం

౪౦. ‘‘రోమసో నామ నామేన, దానవో ఇతి విస్సుతో;

అమ్బపిణ్డీ మయా దిన్నా [అమ్బపిణ్డో మయా దిన్నో (స్యా.)], విపస్సిస్స మహేసినో.

౪౧. ‘‘ఏకనవుతితో కప్పే, యమమ్బమదదిం తదా;

దుగ్గతిం నాభిజానామి, అమ్బదానస్సిదం ఫలం.

౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అమ్బపిణ్డియో థేరో ఇమా గాథాయో అభాసిత్థాతి.

అమ్బపిణ్డియత్థేరస్సాపదానం నవమం.

౧౦. అనుసంసావకత్థేరఅపదానం

౪౩. ‘‘పిణ్డాయ చరమానాహం, విపస్సిమద్దసం జినం;

ఉళుఙ్గభిక్ఖం పాదాసిం, ద్విపదిన్దస్స తాదినో.

౪౪. ‘‘పసన్నచిత్తో సుమనో, అభివాదేసహం తదా;

అనుసంసావయిం బుద్ధం, ఉత్తమత్థస్స పత్తియా.

౪౫. ‘‘ఏకనవుతితో కప్పే, అనుసంసావయిం అహం;

దుగ్గతిం నాభిజానామి, అనుసంసావనా ఫలం.

౪౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అనుసంసావకో థేరో ఇమా గాథాయో అభాసిత్థాతి.

అనుసంసావకత్థేరస్సాపదానం దసమం.

చితకపూజకవగ్గో తింసతిమో.

తస్సుద్దానం –

చితకం పారిఛత్తో చ, సద్దగోసీససన్థరం;

పాదో పదేసం సరణం, అమ్బో సంసావకోపి చ;

అట్ఠతాలీస గాథాయో, గణితాయో విభావిభి.

అథ వగ్గుద్దానం –

కణికారో హత్థిదదో, ఆలమ్బణుదకాసనం;

తువరం థోమకో చేవ, ఉక్ఖేపం సీసుపధానం.

పణ్ణదో చితపూజీ చ, గాథాయో చేవ సబ్బసో;

చత్తారి చ సతానీహ, ఏకపఞ్ఞాసమేవ చ.

పఞ్చవీససతా సబ్బా, ద్వాసత్తతి తదుత్తరి;

తిసతం అపదానానం, గణితా అత్థదస్సిభి.

కణికారవగ్గదసకం.