౩౧. పదుమకేసరవగ్గో
౧. పదుమకేసరియత్థేరఅపదానం
౧. ‘‘ఇసిసఙ్ఘే అహం పుబ్బే, ఆసిం మాతఙ్గవారణో;
మహేసీనం పసాదేన, పద్మకేసరమోకిరిం.
౨. ‘‘పచ్చేకజినసేట్ఠేసు, ధుతరాగేసు తాదిసు;
తేసు చిత్తం పసాదేత్వా, కప్పం సగ్గమ్హి మోదహం.
౩. ‘‘ఏకనవుతితో కప్పే, కేసరం ఓకిరిం తదా;
దుగ్గతిం నాభిజానామి, బుద్ధపూజాయిదం ఫలం.
౪. ‘‘పటిసమ్భిదా చతస్సో, విమోక్ఖాపి చ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనం’’.
ఇత్థం సుదం ఆయస్మా పదుమకేసరియో థేరో ఇమా గాథాయో అభాసిత్థాతి.
పదుమకేసరియత్థేరస్సాపదానం పఠమం.
౨. సబ్బగన్ధియత్థేరఅపదానం
౫. ‘‘గన్ధమాలం మయా దిన్నం, విపస్సిస్స మహేసినో;
అదాసిం ఉజుభూతస్స, కోసేయ్యవత్థముత్తమం.
౬. ‘‘ఏకనవుతితో కప్పే, యం వత్థమదదిం [గన్ధమదదిం (స్యా.)] పురే;
దుగ్గతిం నాభిజానామి, గన్ధదానస్సిదం ఫలం.
౭. ‘‘ఇతో పన్నరసే కప్పే, సుచేళో నామ ఖత్తియో;
సత్తరతనసమ్పన్నో, చక్కవత్తీ మహబ్బలో.
౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా సబ్బగన్ధియో థేరో ఇమా గాథాయో అభాసిత్థాతి.
సబ్బగన్ధియత్థేరస్సాపదానం దుతియం.
౩. పరమన్నదాయకత్థేరఅపదానం
౯. ‘‘కణికారంవ జోతన్తం, ఉదయన్తంవ భాణుమం;
విపస్సిం అద్దసం బుద్ధం, లోకజేట్ఠం నరాసభం.
౧౦. ‘‘అఞ్జలిం పగ్గహేత్వాన, అభినేసిం సకం ఘరం;
అభినేత్వాన సమ్బుద్ధం, పరమన్నమదాసహం.
౧౧. ‘‘ఏకనవుతితో కప్పే, పరమన్నమదిం [పరమన్నం దదిం (సీ.), పరమన్నమదం (స్యా.)] తదా;
దుగ్గతిం నాభిజానామి, పరమన్నస్సిదం ఫలం.
౧౨. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా పరమన్నదాయకో థేరో ఇమా గాథాయో అభాసిత్థాతి.
పరమన్నదాయకత్థేరస్సాపదానం తతియం.
౪. ధమ్మసఞ్ఞకత్థేరఅపదానం
౧౩. ‘‘విపస్సినో భగవతో, మహాబోధిమహో అహు;
రుక్ఖట్ఠస్సేవ సమ్బుద్ధో, [రుక్ఖట్ఠేయేవ సమ్బుద్ధే (సీ.), రుక్ఖట్ఠో ఇవ సమ్బుద్ధో (అట్ఠ.) ఏత్థ రుక్ఖట్ఠస్సేవ బోధిమహకారజనస్స సమ్బుద్ధో చతుసచ్చం పకాసేతీతి అత్థోపి సక్కా ఞాతుం] లోకజేట్ఠో నరాసభో [లోకజేట్ఠే నరాసభే (సీ.)].
౧౪. ‘‘భగవా తమ్హి సమయే, భిక్ఖుసఙ్ఘపురక్ఖతో;
చతుసచ్చం పకాసేతి, వాచాసభిముదీరయం.
౧౫. ‘‘సఙ్ఖిత్తేన చ దేసేన్తో, విత్థారేన చ దేసయం [దేసయి (స్యా.), భాసతి (క.)];
వివట్టచ్ఛదో సమ్బుద్ధో, నిబ్బాపేసి మహాజనం.
౧౬. ‘‘తస్సాహం ధమ్మం సుత్వాన, లోకజేట్ఠస్స తాదినో;
వన్దిత్వా సత్థునో పాదే, పక్కామిం ఉత్తరాముఖో.
౧౭. ‘‘ఏకనవుతితో కప్పే, యం ధమ్మమసుణిం తదా;
దుగ్గతిం నాభిజానామి, ధమ్మసవస్సిదం ఫలం.
౧౮. ‘‘తేత్తింసమ్హి ఇతో కప్పే, ఏకో ఆసిం మహీపతి;
సుతవా నామ నామేన, చక్కవత్తీ మహబ్బలో.
౧౯. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ధమ్మసఞ్ఞకో థేరో ఇమా గాథాయో అభాసిత్థాతి.
ధమ్మసఞ్ఞకత్థేరస్సాపదానం చతుత్థం.
౫. ఫలదాయకత్థేరఅపదానం
౨౦. ‘‘భాగీరథీనదీతీరే, అహోసి అస్సమో తదా;
తమహం అస్సమం గచ్ఛిం, ఫలహత్థో అపేక్ఖవా.
౨౧. ‘‘విపస్సిం తత్థ అద్దక్ఖిం, పీతరంసింవ భాణుమం;
యం మే అత్థి ఫలం సబ్బం, అదాసిం సత్థునో అహం.
౨౨. ‘‘ఏకనవుతితో కప్పే, యం ఫలం అదదిం తదా;
దుగ్గతిం నాభిజానామి, ఫలదానస్సిదం ఫలం.
౨౩. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఫలదాయకో థేరో ఇమా గాథాయో అభాసిత్థాతి.
ఫలదాయకత్థేరస్సాపదానం పఞ్చమం.
౬. సమ్పసాదకత్థేరఅపదానం
౨౪. ‘‘‘నమో తే బుద్ధ వీరత్థు, విప్పముత్తోసి సబ్బధి;
బ్యసనమ్హి [బ్యసనం హి (సీ.)] అనుప్పత్తో, తస్స మే సరణం భవ’.
౨౫. ‘‘సిద్ధత్థో తస్స బ్యాకాసి, లోకే అప్పటిపుగ్గలో;
‘మహోదధిసమో సఙ్ఘో, అప్పమేయ్యో అనుత్తరో.
౨౬. ‘‘‘తత్థ త్వం విరజే ఖేత్తే, అనన్తఫలదాయకే;
సఙ్ఘే చిత్తం పసాదేత్వా, సుబీజం వాప [చాపి (సీ.), వాపి (స్యా.)] రోపయ.
౨౭. ‘‘ఇదం వత్వాన సబ్బఞ్ఞూ, లోకజేట్ఠో నరాసభో;
మమేవ అనుసాసిత్వా, వేహాసం నభముగ్గమి.
౨౮. ‘‘అచిరం గతమత్తమ్హి, సబ్బఞ్ఞుమ్హి నరాసభే;
మరణం సమనుప్పత్తో, తుసితం ఉపపజ్జహం.
౨౯. ‘‘తదాహం విరజే ఖేత్తే, అనన్తఫలదాయకే;
సఙ్ఘే చిత్తం పసాదేత్వా, కప్పం సగ్గమ్హి మోదహం.
౩౦. ‘‘చతున్నవుతితో కప్పే, పసాదమలభిం తదా;
దుగ్గతిం నాభిజానామి, పసాదస్స ఇదం ఫలం.
౩౧. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా సమ్పసాదకో థేరో ఇమా గాథాయో అభాసిత్థాతి.
సమ్పసాదకత్థేరస్సాపదానం ఛట్ఠం.
౭. ఆరామదాయకత్థేరఅపదానం
౩౨. ‘‘సిద్ధత్థస్స భగవతో, ఆరామో రోపితో మయా;
సన్దచ్ఛాయేసు [సీతఛాయేసు (స్యా.), సన్తచ్ఛాయేసు (క.)] రుక్ఖేసు, ఉపాసన్తేసు పక్ఖిసు.
౩౩. ‘‘అద్దసం విరజం బుద్ధం, ఆహుతీనం పటిగ్గహం;
ఆరామం అభినామేసిం, లోకజేట్ఠం నరాసభం.
౩౪. ‘‘హట్ఠో హట్ఠేన చిత్తేన, ఫలం పుప్ఫమదాసహం;
తతో జాతప్పసాదోవ, తం వనం పరిణామయిం.
౩౫. ‘‘బుద్ధస్స యమిదం దాసిం, విప్పసన్నేన చేతసా;
భవే నిబ్బత్తమానమ్హి, నిబ్బత్తతి ఫలం మమ.
౩౬. ‘‘చతున్నవుతితో కప్పే, యం ఆరామమదం తదా;
దుగ్గతిం నాభిజానామి, ఆరామస్స ఇదం ఫలం.
౩౭. ‘‘సత్తతింసే ఇతో కప్పే, సత్తాసుం ముదుసీతలా;
సత్తరతనసమ్పన్నా, చక్కవత్తీ మహబ్బలా.
౩౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఆరామదాయకో థేరో ఇమా గాథాయో అభాసిత్థాతి.
ఆరామదాయకత్థేరస్సాపదానం సత్తమం.
౮. అనులేపదాయకత్థేరఅపదానం
౩౯. ‘‘అత్థదస్సిస్స మునినో, అద్దసం సావకం అహం;
నవకమ్మం కరోన్తస్స, సీమాయ ఉపగచ్ఛహం.
౪౦. ‘‘నిట్ఠితే నవకమ్మే చ, అనులేపమదాసహం;
పసన్నచిత్తో సుమనో, పుఞ్ఞక్ఖేత్తే అనుత్తరే.
౪౧. ‘‘అట్ఠారసే కప్పసతే, యం కమ్మమకరిం తదా;
దుగ్గతిం నాభిజానామి, అనులేపస్సిదం ఫలం.
౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా అనులేపదాయకో థేరో ఇమా గాథాయో అభాసిత్థాతి.
అనులేపదాయకత్థేరస్సాపదానం అట్ఠమం.
౯. బుద్ధసఞ్ఞకత్థేరఅపదానం
౪౩. ‘‘ఉదేన్తం సతరంసింవ, పీతరంసింవ భాణుమం;
వనన్తరగతం సన్తం, లోకజేట్ఠం నరాసభం.
౪౪. ‘‘అద్దసం సుపినన్తేన, సిద్ధత్థం లోకనాయకం;
తత్థ చిత్తం పసాదేత్వా, సుగతిం ఉపపజ్జహం.
౪౫. ‘‘చతున్నవుతితో కప్పే, యం సఞ్ఞమలభిం తదా;
దుగ్గతిం నాభిజానామి, బుద్ధసఞ్ఞాయిదం ఫలం.
౪౬. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా బుద్ధసఞ్ఞకో థేరో ఇమా గాథాయో అభాసిత్థాతి.
బుద్ధసఞ్ఞకత్థేరస్సాపదానం నవమం.
౧౦. పబ్భారదాయకత్థేరఅపదానం
౪౭. ‘‘పియదస్సినో భగవతో, పబ్భారో సోధితో మయా;
ఘటకఞ్చ ఉపట్ఠాసిం, పరిభోగాయ తాదినో.
౪౮. ‘‘తం మే బుద్ధో వియాకాసి, పియదస్సీ మహాముని;
సహస్సకణ్డో సతభేణ్డు [సతగేణ్డు (స్యా. క.)], ధజాలు హరితామయో.
౪౯. ‘‘నిబ్బత్తిస్సతి సో యూపో, రతనఞ్చ అనప్పకం;
పబ్భారదానం దత్వాన, కప్పం సగ్గమ్హి మోదహం.
౫౦. ‘‘ఇతో బాత్తింసకప్పమ్హి, సుసుద్ధో నామ ఖత్తియో;
సత్తరతనసమ్పన్నో, చక్కవత్తీ మహబ్బలో.
౫౧. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా పబ్భారదాయకో థేరో ఇమా గాథాయో అభాసిత్థాతి.
పబ్భారదాయకత్థేరస్సాపదానం దసమం.
పదుమకేసరవగ్గో ఏకతింసతిమో.