౩౨. ఆరక్ఖదాయకవగ్గో

౧. ఆరక్ఖదాయకత్థేరఅపదానం

౧. ‘‘ధమ్మదస్సిస్స మునినో, వతి కారాపితా మయా;

ఆరక్ఖో చ మయా దిన్నో, ద్విపదిన్దస్స తాదినో.

౨. ‘‘అట్ఠారసే కప్పసతే, యం కమ్మమకరిం తదా;

తేన కమ్మవిసేసేన, పత్తో మే ఆసవక్ఖయో.

౩. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా ఆరక్ఖదాయకో థేరో ఇమా గాథాయో అభాసిత్థాతి.

ఆరక్ఖదాయకత్థేరస్సాపదానం పఠమం.

౨. భోజనదాయకత్థేరఅపదానం

౪. ‘‘సుజాతో సాలలట్ఠీవ, సోభఞ్జనమివుగ్గతో;

ఇన్దలట్ఠిరివాకాసే, విరోచతి సదా జినో.

౫. ‘‘తస్స దేవాతిదేవస్స, వేస్సభుస్స మహేసినో;

అదాసి భోజనమహం, విప్పసన్నేన చేతసా.

౬. ‘‘తం మే బుద్ధో అనుమోది, సయమ్భూ అపరాజితో;

భవే నిబ్బత్తమానమ్హి, ఫలం నిబ్బత్తతూ తవ.

౭. ‘‘ఏకత్తింసే ఇతో కప్పే, యం దానమదదిం తదా;

దుగ్గతిం నాభిజానామి, భోజనస్స ఇదం ఫలం.

౮. ‘‘పఞ్చవీసే ఇతో కప్పే, ఏకో ఆసిం అమిత్తకో;

సత్తరతనసమ్పన్నో, చక్కవత్తీ మహబ్బలో.

౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా భోజనదాయకో థేరో ఇమా గాథాయో అభాసిత్థాతి.

భోజనదాయకత్థేరస్సాపదానం దుతియం.

౩. గతసఞ్ఞకత్థేరఅపదానం

౧౦. ‘‘ఆకాసేవ పదం నత్థి, అమ్బరే అనిలఞ్జసే;

సిద్ధత్థం జినమద్దక్ఖిం, గచ్ఛన్తం తిదివఙ్గణే [తిదివఙ్గణం (స్యా. క.)].

౧౧. ‘‘అనిలేనేరితం దిస్వా, సమ్మాసమ్బుద్ధచీవరం;

విత్తి మమాహు తావదే [విత్తి మే పాహుణా తావ (స్యా.), విత్తి మే తావదే జాతా (సీ.)], దిస్వాన గమనం మునిం [మునే (సీ.)].

౧౨. ‘‘చతున్నవుతితో కప్పే, యం సఞ్ఞమలభిం తదా;

దుగ్గతిం నాభిజానామి, బుద్ధసఞ్ఞాయిదం ఫలం.

౧౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా గతసఞ్ఞకో థేరో ఇమా గాథాయో అభాసిత్థాతి.

గతసఞ్ఞకత్థేరస్సాపదానం తతియం.

౪. సత్తపదుమియత్థేరఅపదానం

౧౪. ‘‘నదీకూలే వసామహం, నేసాదో నామ బ్రాహ్మణో;

సతపత్తేహి పుప్ఫేహి, సమ్మజ్జిత్వాన అస్సమం.

౧౫. ‘‘సువణ్ణవణ్ణం సమ్బుద్ధం, సిద్ధత్థం లోకనాయకం;

దిస్వా నభేన [వనేన (స్యా. క.)] గచ్ఛన్తం, హాసో మే ఉదపజ్జథ.

౧౬. ‘‘పచ్చుగ్గన్త్వాన సమ్బుద్ధం, లోకజేట్ఠం నరాసభం;

అస్సమం అతినామేత్వా, జలజగ్గేహి ఓకిరిం.

౧౭. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౧౮. ‘‘ఇతో తే సత్తమే కప్పే, చతురో పాదపావరా;

సత్తరతనసమ్పన్నా, చక్కవత్తీ మహబ్బలా.

౧౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సత్తపదుమియో థేరో ఇమా గాథాయో అభాసిత్థాతి.

సత్తపదుమియత్థేరస్సాపదానం చతుత్థం.

౫. పుప్ఫాసనదాయకత్థేరఅపదానం

౨౦. ‘‘సువణ్ణవణ్ణం సమ్బుద్ధం, పీతరంసింవ [సతరంసింవ (సీ. స్యా.)] భాణుమం;

అవిదూరేన గచ్ఛన్తం, సిద్ధత్థం అపరాజితం.

౨౧. ‘‘తస్స పచ్చుగ్గమిత్వాన, పవేసేత్వాన అస్సమం;

పుప్ఫాసనం మయా దిన్నం, విప్పసన్నేన చేతసా.

౨౨. ‘‘అఞ్జలిం పగ్గహేత్వాన, వేదజాతో తదా అహం;

బుద్ధే చిత్తం పసాదేత్వా, తం కమ్మం పరిణామయిం.

౨౩. ‘‘యం మే అత్థి కతం పుఞ్ఞం, సయమ్భుమ్హపరాజితే;

సబ్బేన తేన కుసలేన, విమలో హోమి సాసనే.

౨౪. ‘‘చతున్నవుతితో కప్పే, పుప్ఫాసనమదం తదా;

దుగ్గతిం నాభిజానామి, పుప్ఫాసనస్సిదం ఫలం.

౨౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పుప్ఫాసనదాయకో థేరో ఇమా గాథాయో అభాసిత్థాతి.

పుప్ఫాసనదాయకత్థేరస్సాపదానం పఞ్చమం.

౬. ఆసనసన్థవికత్థేరఅపదానం

౨౬. ‘‘చేతియం ఉత్తమం నామ, సిఖినో లోకబన్ధునో;

అరఞ్ఞే ఇరీణే వనే, అన్ధాహిణ్డామహం తదా.

౨౭. ‘‘పవనా నిక్ఖమన్తేన, దిట్ఠం సీహాసనం మయా;

ఏకంసం అఞ్జలిం కత్వా, సన్థవిం [థవిస్సం (సీ.)] లోకనాయకం.

౨౮. ‘‘దివసభాగం థవిత్వాన, బుద్ధం లోకగ్గనాయకం;

హట్ఠో హట్ఠేన చిత్తేన, ఇమం వాచం ఉదీరయిం.

౨౯. ‘‘‘నమో తే పురిసాజఞ్ఞ, నమో తే పురిసుత్తమ;

సబ్బఞ్ఞూసి మహావీర, లోకజేట్ఠ నరాసభ’.

౩౦. ‘‘అభిత్థవిత్వా సిఖినం, నిమిత్తకరణేనహం;

ఆసనం అభివాదేత్వా, పక్కామిం ఉత్తరాముఖో.

౩౧. ‘‘ఏకత్తింసే ఇతో కప్పే, యం థవిం వదతం వరం;

దుగ్గతిం నాభిజానామి, థోమనాయ ఇదం ఫలం.

౩౨. ‘‘సత్తవీసే ఇతో కప్పే, అతులా సత్త ఆసు తే;

సత్తరతనసమ్పన్నా, చక్కవత్తీ మహబ్బలా.

౩౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఆసనసన్థవికో [ఆసనసన్థవకో (?), ఆసనథవికో (క.), ఆసనత్థవికో (సీ. స్యా.)] థేరో ఇమా గాథాయో అభాసిత్థాతి.

ఆసనసన్థవికత్థేరస్సాపదానం ఛట్ఠం.

౭. సద్దసఞ్ఞకత్థేరఅపదానం

౩౪. ‘‘సుదస్సనో మహావీరో, దేసేతి అమతం పదం;

పరివుతో సావకేహి, వసతి ఘరముత్తమే.

౩౫. ‘‘తాయ వాచాయ మధురాయ, సఙ్గణ్హాతి [సఙ్గణ్హన్తే (సీ.)] మహాజనం;

ఘోసో చ విపులో ఆసి, ఆసీసో [ఆసంసో (సీ.)] దేవమానుసే.

౩౬. ‘‘నిగ్ఘోససద్దం సుత్వాన, సిద్ధత్థస్స మహేసినో;

సద్దే చిత్తం పసాదేత్వా, అవన్దిం లోకనాయకం.

౩౭. ‘‘చతున్నవుతితో కప్పే, యం సఞ్ఞమలభిం తదా;

దుగ్గతిం నాభిజానామి, బుద్ధసఞ్ఞాయిదం ఫలం.

౩౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సద్దసఞ్ఞకో థేరో ఇమా గాథాయో అభాసిత్థాతి.

సద్దసఞ్ఞకత్థేరస్సాపదానం సత్తమం.

౮. తిరంసియత్థేరఅపదానం

౩౯. ‘‘కేసరిం అభిజాతంవ, అగ్గిక్ఖన్ధంవ పబ్బతే;

ఓభాసేన్తం దిసా సబ్బా [నివాసేన్తం (క.), దిసాసిన్నం (స్యా.)], సిద్ధత్థం పబ్బతన్తరే.

౪౦. ‘‘సూరియస్స చ ఆలోకం, చన్దాలోకం తథేవ చ;

బుద్ధాలోకఞ్చ దిస్వాన, విత్తి మే ఉదపజ్జథ.

౪౧. ‘‘తయో ఆలోకే దిస్వాన, సమ్బుద్ధం [బుద్ధఞ్చ (సీ.)] సావకుత్తమం;

ఏకంసం అజినం కత్వా, సన్థవిం లోకనాయకం.

౪౨. ‘‘తయో హి ఆలోకకరా, లోకే లోకతమోనుదా;

చన్దో చ సూరియో చాపి, బుద్ధో చ లోకనాయకో.

౪౩. ‘‘ఓపమ్మం ఉపదస్సేత్వా, కిత్తితో మే మహాముని;

బుద్ధస్స వణ్ణం కిత్తేత్వా, కప్పం సగ్గమ్హి మోదహం.

౪౪. ‘‘చతున్నవుతితో కప్పే, యం బుద్ధమభికిత్తయిం;

దుగ్గతిం నాభిజానామి, కిత్తనాయ ఇదం ఫలం.

౪౫. ‘‘ఏకసట్ఠిమ్హితో కప్పే, ఏకో ఞాణధరో అహు;

సత్తరతనసమ్పన్నో, చక్కవత్తీ మహబ్బలో.

౪౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిరంసియో థేరో ఇమా గాథాయో అభాసిత్థాతి.

తిరంసియత్థేరస్సాపదానం అట్ఠమం.

౯. కన్దలిపుప్ఫియత్థేరఅపదానం

౪౭. ‘‘సిన్ధుయా నదియా తీరే, అహోసిం కస్సకో తదా;

పరకమ్మాయనే యుత్తో, పరభత్తం అపస్సితో.

౪౮. ‘‘సిన్ధుం అనుచరన్తోహం, సిద్ధత్థం జినమద్దసం;

సమాధినా నిసిన్నంవ, సతపత్తంవ పుప్ఫితం.

౪౯. ‘‘సత్త కన్దలిపుప్ఫాని, వణ్టే ఛేత్వానహం తదా;

మత్థకే అభిరోపేసిం, బుద్ధస్సాదిచ్చబన్ధునో.

౫౦. ‘‘సువణ్ణవణ్ణం సమ్బుద్ధం, అనుకూలే సమాహితం;

తిధాపభిన్నమాతఙ్గం, కుఞ్జరంవ దురాసదం.

౫౧. ‘‘తమహం ఉపగన్త్వాన, నిపకం భావితిన్ద్రియం;

అఞ్జలిం పగ్గహేత్వాన, అవన్దిం సత్థునో అహం.

౫౨. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౫౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కన్దలిపుప్ఫియో థేరో ఇమా గాథాయో అభాసిత్థాతి.

కన్దలిపుప్ఫియత్థేరస్సాపదానం నవమం.

౧౦. కుముదమాలియత్థేరఅపదానం

౫౪. ‘‘ఉసభం పవరం వీరం, మహేసిం విజితావినం;

విపస్సినం మహావీరం, అభిజాతంవ కేసరిం.

౫౫. ‘‘రథియం పటిపజ్జన్తం, ఆహుతీనం పటిగ్గహం;

గహేత్వా కుముదం మాలం, బుద్ధసేట్ఠం సమోకిరిం.

౫౬. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౫౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కుముదమాలియో థేరో ఇమా గాథాయో అభాసిత్థాతి.

కుముదమాలియత్థేరస్సాపదానం దసమం.

ఆరక్ఖదాయకవగ్గో బాత్తింసతిమో [బత్తింసతిమో (సీ. స్యా.)].