౧౦. అనుసంసావకత్థేరఅపదానం

౪౩. ‘‘పిణ్డాయ చరమానాహం, విపస్సిమద్దసం జినం;

ఉళుఙ్గభిక్ఖం పాదాసిం, ద్విపదిన్దస్స తాదినో.

౪౪. ‘‘పసన్నచిత్తో సుమనో, అభివాదేసహం తదా;

అనుసంసావయిం బుద్ధం, ఉత్తమత్థస్స పత్తియా.

౪౫. ‘‘ఏకనవుతితో కప్పే, అనుసంసావయిం అహం;

దుగ్గతిం నాభిజానామి, అనుసంసావనా ఫలం.

౪౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అనుసంసావకో థేరో ఇమా గాథాయో అభాసిత్థాతి.

అనుసంసావకత్థేరస్సాపదానం దసమం.

చితకపూజకవగ్గో తింసతిమో.

తస్సుద్దానం –

చితకం పారిఛత్తో చ, సద్దగోసీససన్థరం;

పాదో పదేసం సరణం, అమ్బో సంసావకోపి చ;

అట్ఠతాలీస గాథాయో, గణితాయో విభావిభి.

అథ వగ్గుద్దానం –

కణికారో హత్థిదదో, ఆలమ్బణుదకాసనం;

తువరం థోమకో చేవ, ఉక్ఖేపం సీసుపధానం.

పణ్ణదో చితపూజీ చ, గాథాయో చేవ సబ్బసో;

చత్తారి చ సతానీహ, ఏకపఞ్ఞాసమేవ చ.

పఞ్చవీససతా సబ్బా, ద్వాసత్తతి తదుత్తరి;

తిసతం అపదానానం, గణితా అత్థదస్సిభి.

కణికారవగ్గదసకం.