౧౦. పుబ్బఙ్గమియత్థేరఅపదానం

౪౩. ‘‘చుల్లాసీతిసహస్సాని, పబ్బజిమ్హ అకిఞ్చనా;

తేసం పుబ్బఙ్గమో ఆసిం, ఉత్తమత్థస్స పత్తియా.

౪౪. ‘‘సరాగా సభవా [సమోహా (స్యా.)] చేతే, విప్పసన్నమనావిలా;

ఉపట్ఠహింసు సక్కచ్చం, పసన్నా సేహి పాణిభి.

౪౫. ‘‘ఖీణాసవా వన్తదోసా, కతకిచ్చా అనాసవా;

ఫరింసు మేత్తచిత్తేన, సయమ్భూ అపరాజితా.

౪౬. ‘‘తేసం ఉపట్ఠహిత్వాన, సమ్బుద్ధానం పతిస్సతో;

మరణఞ్చ అనుప్పత్తో, దేవత్తఞ్చ అగమ్హసే.

౪౭. ‘‘చతున్నవుతితో కప్పే, యం సీలమనుపాలయిం;

దుగ్గతిం నాభిజానామి, సఞ్ఞమస్స ఇదం ఫలం.

౪౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పుబ్బఙ్గమియో థేరో ఇమా గాథాయో అభాసిత్థాతి.

పుబ్బఙ్గమియత్థేరస్సాపదానం దసమం.

పణ్ణదాయకవగ్గో ఏకూనతింసతిమో.