౨౯. పణ్ణదాయకవగ్గో
౧. పణ్ణదాయకత్థేరఅపదానం
౧. ‘‘పణ్ణసాలే నిసిన్నోమ్హి, పణ్ణభోజనభోజనో;
ఉపవిట్ఠఞ్చ మం సన్తం, ఉపాగచ్ఛి మహాఇసి [మహాముని (సీ.)].
౨. ‘‘సిద్ధత్థో లోకపజ్జోతో, సబ్బలోకతికిచ్ఛకో;
తస్స పణ్ణం మయా దిన్నం, నిసిన్నం [నిసిన్నస్స (స్యా. అట్ఠ.)] పణ్ణసన్థరే.
౩. ‘‘చతున్నవుతితో కప్పే, యం పణ్ణమదదిం తదా;
దుగ్గతిం నాభిజానామి, పణ్ణదానస్సిదం ఫలం.
౪. ‘‘పటిసమ్భిదా చతస్సో, విమోక్ఖాపి చ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనం’’.
ఇత్థం సుదం ఆయస్మా పణ్ణదాయకో థేరో ఇమా గాథాయో అభాసిత్థాతి.
పణ్ణదాయకత్థేరస్సాపదానం పఠమం.
౨. ఫలదాయకత్థేరఅపదానం
౫. ‘‘సినేరుసమసన్తోసో, ధరణీసమ [ధరణీధర (సీ. స్యా.)] సాదిసో;
వుట్ఠహిత్వా సమాధిమ్హా, భిక్ఖాయ మముపట్ఠితో.
౬. ‘‘హరీతకం [హరీతకిం (స్యా.)] ఆమలకం, అమ్బజమ్బువిభీతకం;
కోలం భల్లాతకం బిల్లం, ఫారుసకఫలాని చ.
౭. ‘‘సిద్ధత్థస్స మహేసిస్స, సబ్బలోకానుకమ్పినో;
తఞ్చ సబ్బం మయా దిన్నం, విప్పసన్నేన చేతసా.
౮. ‘‘చతున్నవుతితో కప్పే, యం ఫలం అదదిం తదా;
దుగ్గతిం నాభిజానామి, ఫలదానస్సిదం ఫలం.
౯. ‘‘సత్తపఞ్ఞాసితో కప్పే, ఏకజ్ఝో నామ ఖత్తియో;
సత్తరతనసమ్పన్నో, చక్కవత్తీ మహబ్బలో.
౧౦. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఫలదాయకో థేరో ఇమా గాథాయో అభాసిత్థాతి.
ఫలదాయకత్థేరస్సాపదానం దుతియం.
౩. పచ్చుగ్గమనియత్థేరఅపదానం
౧౧. ‘‘సీహం యథా వనచరం, నిసభాజానియం యథా;
కకుధం విలసన్తంవ, ఆగచ్ఛన్తం నరాసభం.
౧౨. ‘‘సిద్ధత్థం లోకపజ్జోతం, సబ్బలోకతికిచ్ఛకం;
అకాసిం పచ్చుగ్గమనం, విప్పసన్నేన చేతసా.
౧౩. ‘‘చతున్నవుతితో కప్పే, పచ్చుగ్గచ్ఛిం నరాసభం;
దుగ్గతిం నాభిజానామి, పచ్చుగ్గమనే ఇదం ఫలం.
౧౪. ‘‘సత్తతింసే [సత్తవీసే (సీ. స్యా.)] ఇతో కప్పే, ఏకో ఆసిం జనాధిపో;
సపరివారోతి నామేన, చక్కవత్తీ మహబ్బలో.
౧౫. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా పచ్చుగ్గమనియో థేరో ఇమా గాథాయో అభాసిత్థాతి.
పచ్చుగ్గమనియత్థేరస్సాపదానం తతియం.
౪. ఏకపుప్ఫియత్థేరఅపదానం
౧౬. ‘‘దక్ఖిణమ్హి దువారమ్హి, పిసాచో ఆసహం తదా;
అద్దసం విరజం బుద్ధం, పీతరంసింవ భాణుమం.
౧౭. ‘‘విపస్సిస్స నరగ్గస్స, సబ్బలోకహితేసినో;
ఏకపుప్ఫం మయా దిన్నం, ద్విపదిన్దస్స తాదినో.
౧౮. ‘‘ఏకనవుతితో కప్పే, యం పుప్ఫమదదిం తదా;
దుగ్గతిం నాభిజానామి, బుద్ధపూజాయిదం ఫలం.
౧౯. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఏకపుప్ఫియో థేరో ఇమా గాథాయో అభాసిత్థాతి.
ఏకపుప్ఫియత్థేరస్సాపదానం చతుత్థం.
౫. మఘవపుప్ఫియత్థేరఅపదానం
౨౦. ‘‘నమ్మదానదియా తీరే, సయమ్భూ అపరాజితో;
సమాధిం సో సమాపన్నో, విప్పసన్నో అనావిలో.
౨౧. ‘‘దిస్వా పసన్నసుమనో, సమ్బుద్ధం అపరాజితం;
తాహం మఘవపుప్ఫేన, సయమ్భుం పూజయిం తదా.
౨౨. ‘‘ఏకనవుతితో కప్పే, యం పుప్ఫమభిపూజయిం;
దుగ్గతిం నాభిజానామి, బుద్ధపూజాయిదం ఫలం.
౨౩. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా మఘవపుప్ఫియో థేరో ఇమా గాథాయో అభాసిత్థాతి.
మఘవపుప్ఫియత్థేరస్సాపదానం పఞ్చమం.
౬. ఉపట్ఠాకదాయకత్థేరఅపదానం
౨౪. ‘‘రథియం పటిపజ్జన్తం, ఆహుతీనం పటిగ్గహం;
ద్విపదిన్దం మహానాగం, లోకజేట్ఠం నరాసభం.
౨౫. ‘‘పక్కోసాపియ తస్సాహం, సబ్బలోకహితేసినో;
ఉపట్ఠాకో మయా దిన్నో, సిద్ధత్థస్స మహేసినో.
౨౬. ‘‘పటిగ్గహేత్వా [పటిగ్గహేసి (క.)] సమ్బుద్ధో, నియ్యాదేసి మహాముని [మహాఇసి (క.)];
ఉట్ఠాయ ఆసనా తమ్హా, పక్కామి పాచినాముఖో.
౨౭. ‘‘చతున్నవుతితో కప్పే, ఉపట్ఠాకమదం తదా;
దుగ్గతిం నాభిజానామి, ఉపట్ఠానస్సిదం ఫలం.
౨౮. ‘‘సత్తపఞ్ఞాసితో కప్పే, బలసేనసనామకో;
సత్తరతనసమ్పన్నో, చక్కవత్తీ మహబ్బలో.
౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఉపట్ఠాకదాయకో థేరో ఇమా గాథాయో అభాసిత్థాతి.
ఉపట్ఠాకదాయకత్థేరస్సాపదానం ఛట్ఠం.
౭. అపదానియత్థేరఅపదానం
౩౦. ‘‘అపదానం సుగతానం, కిత్తయింహం మహేసినం;
పాదే చ సిరసా వన్దిం, పసన్నో సేహి పాణిభి.
౩౧. ‘‘ద్వేనవుతే ఇతో కప్పే, అపదానం పకిత్తయిం;
దుగ్గతిం నాభిజానామి, కిత్తనాయ ఇదం ఫలం.
౩౨. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా అపదానియో థేరో ఇమా గాథాయో అభాసిత్థాతి.
అపదానియత్థేరస్సాపదానం సత్తమం.
౮. సత్తాహపబ్బజితత్థేరఅపదానం
౩౩. ‘‘విపస్సిస్స భగవతో, సఙ్ఘో సక్కతమానితో;
బ్యసనం మే అనుప్పత్తం, ఞాతిభేదో పురే అహు.
౩౪. ‘‘పబ్బజ్జం ఉపగన్త్వాన, బ్యసనుపసమాయహం;
సత్తాహాభిరతో తత్థ, సత్థుసాసనకమ్యతా.
౩౫. ‘‘ఏకనవుతితో కప్పే, యమహం పబ్బజిం తదా;
దుగ్గతిం నాభిజానామి, పబ్బజ్జాయ ఇదం ఫలం.
౩౬. ‘‘సత్తసట్ఠిమ్హితో కప్పే, సత్త ఆసుం మహీపతీ;
సునిక్ఖమాతి ఞాయన్తి, చక్కవత్తీ మహబ్బలా.
౩౭. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా సత్తాహపబ్బజితో థేరో ఇమా గాథాయో అభాసిత్థాతి.
సత్తాహపబ్బజితత్థేరస్సాపదానం అట్ఠమం.
౯. బుద్ధుపట్ఠాయికత్థేరఅపదానం
౩౮. ‘‘వేటమ్భినీతి [వేటమ్బరీతి (సీ.), వేధమ్భినీతి (స్యా.)] మే నామం, పితుసన్తం [పితా’సన్తం (?)] మమం తదా;
మమ హత్థం గహేత్వాన, ఉపానయి మహామునిం.
౩౯. ‘‘ఇమేమం ఉద్దిసిస్సన్తి, బుద్ధా లోకగ్గనాయకా;
తేహం ఉపట్ఠిం సక్కచ్చం, పసన్నో సేహి పాణిభి.
౪౦. ‘‘ఏకత్తింసే ఇతో కప్పే, బుద్ధే ఉపట్ఠహిం [పరిచరిం (సీ. స్యా.)] తదా;
దుగ్గతిం నాభిజానామి, ఉపట్ఠానస్సిదం ఫలం.
౪౧. ‘‘తేవీసమ్హి ఇతో కప్పే, చతురో ఆసు ఖత్తియా;
సమణుపట్ఠాకా నామ, చక్కవత్తీ మహబ్బలా.
౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా బుద్ధుపట్ఠాయికో థేరో ఇమా గాథాయో అభాసిత్థాతి.
బుద్ధుపట్ఠాయికత్థేరస్సాపదానం నవమం.
౧౦. పుబ్బఙ్గమియత్థేరఅపదానం
౪౩. ‘‘చుల్లాసీతిసహస్సాని, పబ్బజిమ్హ అకిఞ్చనా;
తేసం పుబ్బఙ్గమో ఆసిం, ఉత్తమత్థస్స పత్తియా.
౪౪. ‘‘సరాగా సభవా [సమోహా (స్యా.)] చేతే, విప్పసన్నమనావిలా;
ఉపట్ఠహింసు సక్కచ్చం, పసన్నా సేహి పాణిభి.
౪౫. ‘‘ఖీణాసవా వన్తదోసా, కతకిచ్చా అనాసవా;
ఫరింసు మేత్తచిత్తేన, సయమ్భూ అపరాజితా.
౪౬. ‘‘తేసం ఉపట్ఠహిత్వాన, సమ్బుద్ధానం పతిస్సతో;
మరణఞ్చ అనుప్పత్తో, దేవత్తఞ్చ అగమ్హసే.
౪౭. ‘‘చతున్నవుతితో కప్పే, యం సీలమనుపాలయిం;
దుగ్గతిం నాభిజానామి, సఞ్ఞమస్స ఇదం ఫలం.
౪౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా పుబ్బఙ్గమియో థేరో ఇమా గాథాయో అభాసిత్థాతి.
పుబ్బఙ్గమియత్థేరస్సాపదానం దసమం.
పణ్ణదాయకవగ్గో ఏకూనతింసతిమో.