౭. తిన్దుకదాయకత్థేరఅపదానం

౩౫. ‘‘గిరిదుగ్గచరో ఆసిం, మక్కటో థామవేగికో;

ఫలినం తిన్దుకం దిస్వా, బుద్ధసేట్ఠం అనుస్సరిం.

౩౬. ‘‘నిక్ఖమిత్వా కతిపాహం, విచినిం లోకనాయకం;

పసన్నచిత్తో సుమనో, సిద్ధత్థం తిభవన్తగుం.

౩౭. ‘‘మమ సఙ్కప్పమఞ్ఞాయ, సత్థా లోకే అనుత్తరో;

ఖీణాసవసహస్సేహి, ఆగచ్ఛి మమ సన్తికం.

౩౮. ‘‘పామోజ్జం జనయిత్వాన, ఫలహత్థో ఉపాగమిం;

పటిగ్గహేసి భగవా, సబ్బఞ్ఞూ వదతం వరో.

౩౯. ‘‘చతున్నవుతితో కప్పే, యం ఫలం అదదిం తదా;

దుగ్గతిం నాభిజానామి, ఫలదానస్సిదం ఫలం.

౪౦. ‘‘సత్తపఞ్ఞాసకప్పమ్హి, ఉపనన్దసనామకో;

సత్తరతనసమ్పన్నో, చక్కవత్తీ మహబ్బలో.

౪౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిన్దుకదాయకో థేరో ఇమా గాథాయో అభాసిత్థాతి.

తిన్దుకదాయకత్థేరస్సాపదానం సత్తమం.