౨౦. తమాలపుప్ఫియవగ్గో

౧. తమాలపుప్ఫియత్థేరఅపదానం

౧. ‘‘చుల్లాసీతిసహస్సాని, థమ్భా సోవణ్ణయా అహూ;

దేవలట్ఠిపటిభాగం, విమానం మే సునిమ్మితం.

౨. ‘‘తమాలపుప్ఫం పగ్గయ్హ, విప్పసన్నేన చేతసా;

బుద్ధస్స అభిరోపయిం, సిఖినో లోకబన్ధునో.

౩. ‘‘ఏకత్తింసే ఇతో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౪. ‘‘ఇతో వీసతిమే కప్పే, చన్దతిత్తోతి ఏకకో;

సత్తరతనసమ్పన్నో, చక్కవత్తీ మహబ్బలో.

౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా తమాలపుప్ఫియో థేరో ఇమా గాథాయో అభాసిత్థాతి.

తమాలపుప్ఫియత్థేరస్సాపదానం పఠమం.

౨. తిణసన్థారకత్థేరఅపదానం

౬. ‘‘యదా వనవాసీ [యం దాయవాసికో (సీ.)] ఇసి, తిణం లాయతి సత్థునో;

సబ్బే పదక్ఖిణావట్టా [పదక్ఖిణావత్తా (సీ. స్యా.)], పథబ్యా [పుథవ్యా (సీ.)] నిపతింసు తే.

౭. ‘‘తమహం తిణమాదాయ, సన్థరిం ధరణుత్తమే;

తీణేవ తాలపత్తాని, ఆహరిత్వానహం తదా.

౮. ‘‘తిణేన ఛదనం కత్వా, సిద్ధత్థస్స అదాసహం;

సత్తాహం ధారయుం తస్స [తత్థ (స్యా.)], దేవమానుససత్థునో.

౯. ‘‘చతున్నవుతితో కప్పే, యం తిణం అదదిం తదా;

దుగ్గతిం నాభిజానామి, తిణదానస్సిదం ఫలం.

౧౦. ‘‘పఞ్చసట్ఠిమ్హితో కప్పే, చత్తారోసుం మహద్ధనా;

సత్తరతనసమ్పన్నా, చక్కవత్తీ మహబ్బలా.

౧౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిణసన్థారకో థేరో ఇమా గాథాయో అభాసిత్థాతి.

తిణసన్థారకత్థేరస్సాపదానం దుతియం.

౩. ఖణ్డపుల్లియత్థేరఅపదానం

౧౨. ‘‘ఫుస్సస్స ఖో భగవతో, థూపో ఆసి మహావనే;

కుఞ్జరేహి తదా భిన్నో, పరూళ్హో పాదపో [పరూళ్హపాదపో (సీ.), సంరూళ్హో పాదపో (స్యా.)] తహిం.

౧౩. ‘‘విసమఞ్చ సమం కత్వా, సుధాపిణ్డం అదాసహం;

తిలోకగరునో తస్స, గుణేహి పరితోసితో [పరితో సుతో (క.)].

౧౪. ‘‘ద్వేనవుతే ఇతో కప్పే, యం కమ్మమకరిం తదా;

దుగ్గతిం నాభిజానామి, సుధాపిణ్డస్సిదం ఫలం.

౧౫. ‘‘సత్తసత్తతికప్పమ్హి, జితసేనాసుం సోళస;

సత్తరతనసమ్పన్నా, చక్కవత్తీ మహబ్బలా.

౧౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఖణ్డఫుల్లియో థేరో ఇమా గాథాయో అభాసిత్థాతి.

ఖణ్డపుల్లియత్థేరస్సాపదానం తతియం.

౪. అసోకపూజకత్థేరఅపదానం

౧౭. ‘‘తివరాయం [తిపురాయం (స్యా.)] పురే రమ్మే, రాజుయ్యానం అహు తదా;

ఉయ్యానపాలో తత్థాసిం, రఞ్ఞో బద్ధచరో అహం.

౧౮. ‘‘పదుమో నామ నామేన, సయమ్భూ సప్పభో అహు;

నిసిన్నం [నిసిన్నో (క.)] పుణ్డరీకమ్హి, ఛాయా న జహి తం మునిం.

౧౯. ‘‘అసోకం పుప్ఫితం దిస్వా, పిణ్డిభారం సుదస్సనం;

బుద్ధస్స అభిరోపేసిం, జలజుత్తమనామినో.

౨౦. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౨౧. ‘‘సత్తతింసమ్హితో కప్పే, సోళస అరణఞ్జహా [అరుణఞ్జహా (సీ.)];

సత్తరతనసమ్పన్నా, చక్కవత్తీ మహబ్బలా.

౨౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అసోకపూజకో థేరో ఇమా గాథాయో అభాసిత్థాతి.

అసోకపూజకత్థేరస్సాపదానం చతుత్థం.

౫. అఙ్కోలకత్థేరఅపదానం

౨౩. ‘‘అఙ్కోలం పుప్ఫితం దిస్వా, మాలావరం సకోసకం [సమోగధం (స్యా.)];

ఓచినిత్వాన తం పుప్ఫం, అగమం బుద్ధసన్తికం.

౨౪. ‘‘సిద్ధత్థో తమ్హి సమయే, పతిలీనో మహాముని;

ముహుత్తం పటిమానేత్వా, గుహాయం పుప్ఫమోకిరిం.

౨౫. ‘‘చతున్నవుతితో కప్పే, యం పుప్ఫమభిపూజయిం;

దుగ్గతిం నాభిజానామి, పుప్ఫదానస్సిదం [బుద్ధపూజాయిదం (సీ. స్యా.)] ఫలం.

౨౬. ‘‘ఛత్తింసమ్హి ఇతో కప్పే, ఆసేకో దేవగజ్జితో;

సత్తరతనసమ్పన్నో, చక్కవత్తీ మహబ్బలో.

౨౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అఙ్కోలకో థేరో ఇమా గాథాయో అభాసిత్థాతి.

అఙ్కోలకత్థేరస్సాపదానం పఞ్చమం.

౬. కిసలయపూజకత్థేరఅపదానం

౨౮. ‘‘నగరే ద్వారవతియా, మాలావచ్ఛో మమం అహు;

ఉదపానో చ తత్థేవ, పాదపానం విరోహనో.

౨౯. ‘‘సబలేన ఉపత్థద్ధో, సిద్ధత్థో అపరాజితో;

మమానుకమ్పమానో సో, గచ్ఛతే అనిలఞ్జసే.

౩౦. ‘‘అఞ్ఞం కిఞ్చి న పస్సామి, పూజాయోగ్గం మహేసినో;

అసోకం పల్లవం దిస్వా, ఆకాసే ఉక్ఖిపిం అహం.

౩౧. ‘‘బుద్ధస్స తే కిసలయా, గచ్ఛతో యన్తి పచ్ఛతో;

తాహం దిస్వాన సంవిజిం [సోహం దిస్వాన తం ఇద్ధిం (సీ. స్యా.)], అహో బుద్ధస్సుళారతా.

౩౨. ‘‘చతున్నవుతితో కప్పే, పల్లవం అభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౩౩. ‘‘సత్తతింసే [సత్తవీసే (సీ. స్యా.)] ఇతో కప్పే, ఏకో ఏకిస్సరో అహు;

సత్తరతనసమ్పన్నో, చక్కవత్తీ మహబ్బలో.

౩౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కిసలయపూజకో థేరో ఇమా గాథాయో అభాసిత్థాతి.

కిసలయపూజకత్థేరస్సాపదానం ఛట్ఠం.

౭. తిన్దుకదాయకత్థేరఅపదానం

౩౫. ‘‘గిరిదుగ్గచరో ఆసిం, మక్కటో థామవేగికో;

ఫలినం తిన్దుకం దిస్వా, బుద్ధసేట్ఠం అనుస్సరిం.

౩౬. ‘‘నిక్ఖమిత్వా కతిపాహం, విచినిం లోకనాయకం;

పసన్నచిత్తో సుమనో, సిద్ధత్థం తిభవన్తగుం.

౩౭. ‘‘మమ సఙ్కప్పమఞ్ఞాయ, సత్థా లోకే అనుత్తరో;

ఖీణాసవసహస్సేహి, ఆగచ్ఛి మమ సన్తికం.

౩౮. ‘‘పామోజ్జం జనయిత్వాన, ఫలహత్థో ఉపాగమిం;

పటిగ్గహేసి భగవా, సబ్బఞ్ఞూ వదతం వరో.

౩౯. ‘‘చతున్నవుతితో కప్పే, యం ఫలం అదదిం తదా;

దుగ్గతిం నాభిజానామి, ఫలదానస్సిదం ఫలం.

౪౦. ‘‘సత్తపఞ్ఞాసకప్పమ్హి, ఉపనన్దసనామకో;

సత్తరతనసమ్పన్నో, చక్కవత్తీ మహబ్బలో.

౪౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిన్దుకదాయకో థేరో ఇమా గాథాయో అభాసిత్థాతి.

తిన్దుకదాయకత్థేరస్సాపదానం సత్తమం.

౮. ముట్ఠిపూజకత్థేరఅపదానం

౪౨. ‘‘సుమేధో నామ భగవా, లోకజేట్ఠో నరాసభో;

పచ్ఛిమే అనుకమ్పాయ, పధానం పదహీ జినో.

౪౩. ‘‘తస్స చఙ్కమమానస్స, ద్విపదిన్దస్స తాదినో;

గిరినేలస్స పుప్ఫానం, ముట్ఠిం బుద్ధస్స రోపయిం.

౪౪. ‘‘తేన చిత్తప్పసాదేన, సుక్కమూలేన చోదితో;

తింసకప్పసహస్సాని, దుగ్గతిం నుపపజ్జహం.

౪౫. ‘‘తేవీసతికప్పసతే, సునేలో నామ ఖత్తియో;

సత్తరతనసమ్పన్నో, ఏకో ఆసిం మహబ్బలో.

౪౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ముట్ఠిపూజకో థేరో ఇమా గాథాయో అభాసిత్థాతి.

ముట్ఠిపూజకత్థేరస్సాపదానం అట్ఠమం.

౯. కింకణికపుప్ఫియత్థేరఅపదానం

౪౭. ‘‘సుమఙ్గలోతి నామేన, సయమ్భూ అపరాజితో;

పవనా నిక్ఖమిత్వాన, నగరం పావిసీ జినో.

౪౮. ‘‘పిణ్డచారం చరిత్వాన, నిక్ఖమ్మ నగరా ముని;

కతకిచ్చోవ సమ్బుద్ధో, సో వసీ వనమన్తరే.

౪౯. ‘‘కింకణిపుప్ఫం పగ్గయ్హ, బుద్ధస్స అభిరోపయిం;

పసన్నచిత్తో సుమనో, సయమ్భుస్స మహేసినో.

౫౦. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౫౧. ‘‘ఛళాసీతిమ్హితో కప్పే, అపిలాసిసనామకో;

సత్తరతనసమ్పన్నో, చక్కవత్తీ మహబ్బలో.

౫౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కింకణికపుప్ఫియో థేరో ఇమా గాథాయో అభాసిత్థాతి.

కింకణికపుప్ఫియత్థేరస్సాపదానం నవమం.

౧౦. యూథికపుప్ఫియత్థేరఅపదానం

౫౩. ‘‘పదుముత్తరో నామ జినో, ఆహుతీనం పటిగ్గహో;

పవనా నిక్ఖమిత్వాన, విహారం యాతి చక్ఖుమా.

౫౪. ‘‘ఉభో హత్థేహి పగ్గయ్హ, యూథికం పుప్ఫముత్తమం;

బుద్ధస్స అభిరోపయిం, మేత్తచిత్తస్స తాదినో.

౫౫. ‘‘తేన చిత్తప్పసాదేన, అనుభోత్వాన సమ్పదా;

కప్పానం సతసహస్సం, దుగ్గతిం నుపపజ్జహం.

౫౬. ‘‘ఇతో పఞ్ఞాసకప్పేసు, ఏకో ఆసిం జనాధిపో;

సమిత్తనన్దనో నామ, చక్కవత్తీ మహబ్బలో.

౫౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా యూథికపుప్ఫియో థేరో ఇమా గాథాయో అభాసిత్థాతి;

యూథికపుప్ఫియత్థేరస్సాపదానం దసమం.

తమాలపుప్ఫియవగ్గో వీసతిమో.

తస్సుద్దానం –

తమాలతిణసన్థారో, ఖణ్డఫుల్లి అసోకియో;

అఙ్కోలకీ కిసలయో, తిన్దుకో నేలపుప్ఫియో;

కింకణికో యూథికో చ, గాథా పఞ్ఞాస అట్ఠ చాతి.

అథ వగ్గుద్దానం –

భిక్ఖాదాయీ పరివారో, సేరేయ్యో సోభితో తథా;

ఛత్తఞ్చ బన్ధుజీవీ చ, సుపారిచరియోపి చ.

కుముదో కుటజో చేవ, తమాలి దసమో కతో;

ఛసతాని చ గాథాని, ఛసట్ఠి చ తతుత్తరి.

భిక్ఖావగ్గదసకం.