౨౧. కణికారపుప్ఫియవగ్గో

౧. కణికారపుప్ఫియత్థేరఅపదానం

౧. ‘‘కణికారం పుప్ఫితం దిస్వా, ఓచినిత్వానహం తదా;

తిస్సస్స అభిరోపేసిం, ఓఘతిణ్ణస్స తాదినో.

౨. ‘‘ద్వేనవుతే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౩. ‘‘పఞ్చత్తింసే ఇతో కప్పే, అరుణపాణీతి విస్సుతో;

సత్తరతనసమ్పన్నో, చక్కవత్తీ మహబ్బలో.

౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా కణికారపుప్ఫియో థేరో ఇమా గాథాయో అభాసిత్థాతి.

కణికారపుప్ఫియత్థేరస్సాపదానం పఠమం.

౨. మినేలపుప్ఫియత్థేరఅపదానం

౫. ‘‘సువణ్ణవణ్ణో భగవా, సతరంసీ పతాపవా;

చఙ్కమనం సమారూళ్హో, మేత్తచిత్తో సిఖీసభో.

౬. ‘‘పసన్నచిత్తో సుమనో, వన్దిత్వా [థోమేత్వా (స్యా.)] ఞాణముత్తమం;

మినేలపుప్ఫం పగ్గయ్హ, బుద్ధస్స అభిరోపయిం.

౭. ‘‘ఏకత్తింసే ఇతో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౮. ‘‘ఏకూనతింసకప్పమ్హి, సుమేఘఘననామకో;

సత్తరతనసమ్పన్నో, చక్కవత్తీ మహబ్బలో.

౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మినేలపుప్ఫియో థేరో ఇమా గాథాయో అభాసిత్థాతి.

మినేలపుప్ఫియత్థేరస్సాపదానం దుతియం.

౩. కిఙ్కణిపుప్ఫియత్థేరఅపదానం

౧౦. ‘‘కఞ్చనగ్ఘియసఙ్కాసో, సబ్బఞ్ఞూ లోకనాయకో;

ఓదకం దహమోగ్గయ్హ, సినాయి లోకనాయకో.

౧౧. ‘‘పగ్గయ్హ కిఙ్కణిం [కిఙ్కిణిం (సీ.)] పుప్ఫం, విపస్సిస్సాభిరోపయిం;

ఉదగ్గచిత్తో సుమనో, ద్విపదిన్దస్స తాదినో.

౧౨. ‘‘ఏకనవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౧౩. ‘‘సత్తవీసతికప్పమ్హి, రాజా భీమరథో అహు;

సత్తరతనసమ్పన్నో, చక్కవత్తీ మహబ్బలో.

౧౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కిఙ్కణిపుప్ఫియో [కిఙ్కిణికపుప్ఫియో (సీ.)] థేరో ఇమా గాథాయో అభాసిత్థాతి.

కిఙ్కణిపుప్ఫియత్థేరస్సాపదానం తతియం.

౪. తరణియత్థేరఅపదానం

౧౫. ‘‘అత్థదస్సీ తు భగవా, ద్విపదిన్దో నరాసభో;

పురక్ఖతో సావకేహి, గఙ్గాతీరముపాగమి.

౧౬. ‘‘సమతిత్తి కాకపేయ్యా, గఙ్గా ఆసి దురుత్తరా;

ఉత్తారయిం భిక్ఖుసఙ్ఘం, బుద్ధఞ్చ ద్విపదుత్తమం.

౧౭. ‘‘అట్ఠారసే కప్పసతే, యం కమ్మమకరిం తదా;

దుగ్గతిం నాభిజానామి, తరణాయ ఇదం ఫలం.

౧౮. ‘‘తేరసేతో కప్పసతే, పఞ్చ సబ్బోభవా [సబ్భోగవా (సీ.)] అహుం;

సత్తరతనసమ్పన్నా, చక్కవత్తీ మహబ్బలా.

౧౯. ‘‘పచ్ఛిమే చ భవే అస్మిం, జాతోహం బ్రాహ్మణే కులే;

సద్ధిం తీహి సహాయేహి, పబ్బజిం సత్థు సాసనే.

౨౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తరణియో థేరో ఇమా గాథాయో అభాసిత్థాతి;

తరణియత్థేరస్సాపదానం చతుత్థం.

౫. నిగ్గుణ్డిపుప్ఫియత్థేరఅపదానం

౨౧. ‘‘విపస్సిస్స భగవతో, ఆసిమారామికో అహం;

నిగ్గుణ్డిపుప్ఫం పగ్గయ్హ, బుద్ధస్స అభిరోపయిం.

౨౨. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౨౩. ‘‘పఞ్చవీసే [పఞ్చతింసే (సీ. స్యా.)] ఇతో కప్పే, ఏకో ఆసిం జనాధిపో;

మహాపతాపనామేన, చక్కవత్తీ మహబ్బలో.

౨౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నిగ్గుణ్డిపుప్ఫియో థేరో ఇమా గాథాయో అభాసిత్థాతి.

నిగ్గుణ్డిపుప్ఫియత్థేరస్సాపదానం పఞ్చమం.

౬. ఉదకదాయకత్థేరఅపదానం

౨౫. ‘‘భుఞ్జన్తం సమణం దిస్వా, విప్పసన్నమనావిలం;

ఘటేనోదకమాదాయ, సిద్ధత్థస్స అదాసహం.

౨౬. ‘‘నిమ్మలో హోమహం అజ్జ, విమలో ఖీణసంసయో;

భవే నిబ్బత్తమానమ్హి, ఫలం నిబ్బత్తతే మమ [సుభం (సీ.)].

౨౭. ‘‘చతున్నవుతితో కప్పే, ఉదకం యమదాసహం [యం తదా అదం (సీ.), అదదిం తదా (స్యా.)];

దుగ్గతిం నాభిజానామి, దకదానస్సిదం ఫలం.

౨౮. ‘‘ఏకసట్ఠిమ్హితో కప్పే, ఏకోవ విమలో అహు;

సత్తరతనసమ్పన్నో, చక్కవత్తీ మహబ్బలో.

౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉదకదాయకో థేరో ఇమా గాథాయో అభాసిత్థాతి.

ఉదకదాయకత్థేరస్సాపదానం ఛట్ఠం.

౭. సలలమాలియత్థేరఅపదానం

౩౦. ‘‘కణికారంవ జోతన్తం, నిసిన్నం పబ్బతన్తరే;

ఓభాసేన్తం దిసా సబ్బా, సిద్ధత్థం నరసారథిం.

౩౧. ‘‘ధనుం అద్వేజ్ఝం కత్వాన, ఉసుం సన్నయ్హహం తదా;

పుప్ఫం సవణ్టం ఛేత్వాన, బుద్ధస్స అభిరోపయిం.

౩౨. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౩౩. ‘‘ఏకపఞ్ఞాసితో కప్పే, ఏకో ఆసిం జుతిన్ధరో;

సత్తరతనసమ్పన్నో, చక్కవత్తీ మహబ్బలో.

౩౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సలలమాలియో థేరో ఇమా గాథాయో అభాసిత్థాతి.

సలలమాలియత్థేరస్సాపదానం సత్తమం.

౮. కోరణ్డపుప్ఫియత్థేరఅపదానం

౩౫. ‘‘అక్కన్తఞ్చ పదం దిస్వా, చక్కాలఙ్కారభూసితం;

పదేనానుపదం యన్తో, విపస్సిస్స మహేసినో.

౩౬. ‘‘కోరణ్డం పుప్ఫితం దిస్వా, సమూలం పూజితం మయా;

హట్ఠో హట్ఠేన చిత్తేన, అవన్దిం పదముత్తమం.

౩౭. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౩౮. ‘‘సత్తపఞ్ఞాసకప్పమ్హి, ఏకో వీతమలో అహుం;

సత్తరతనసమ్పన్నో, చక్కవత్తీ మహబ్బలో.

౩౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కోరణ్డపుప్ఫియో థేరో ఇమా గాథాయో అభాసిత్థాతి.

కోరణ్డపుప్ఫియత్థేరస్సాపదానం అట్ఠమం.

౯. ఆధారదాయకత్థేరఅపదానం

౪౦. ‘‘ఆధారకం మయా దిన్నం, సిఖినో లోకబన్ధునో;

ధారేమి పథవిం సబ్బం, కేవలం వసుధం ఇమం.

౪౧. ‘‘కిలేసా ఝాపితా మయ్హం, భవా సబ్బే సమూహతా;

ధారేమి అన్తిమం దేహం, సమ్మాసమ్బుద్ధసాసనే.

౪౨. ‘‘సత్తవీసే ఇతో కప్పే, అహేసుం చతురో జనా;

సమన్తవరణా నామ, చక్కవత్తీ మహబ్బలా.

౪౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఆధారదాయకో [పరియాదానియో (క.)] థేరో ఇమా గాథాయో అభాసిత్థాతి.

ఆధారదాయకత్థేరస్సాపదానం నవమం.

౧౦. పాపనివారియత్థేరఅపదానం

౪౪. ‘‘తిస్సస్స తు భగవతో, దేవదేవస్స తాదినో;

ఏకచ్ఛత్తం మయా దిన్నం, విప్పసన్నేన చేతసా.

౪౫. ‘‘నివుతం హోతి మే పాపం, కుసలస్సుపసమ్పదా;

ఆకాసే ఛత్తం ధారేన్తి, పుబ్బకమ్మస్సిదం ఫలం.

౪౬. ‘‘చరిమం వత్తతే మయ్హం, భవా సబ్బే సమూహతా;

ధారేమి అన్తిమం దేహం, సమ్మాసమ్బుద్ధసాసనే.

౪౭. ‘‘ద్వేనవుతే ఇతో కప్పే, యం ఛత్తమదదిం తదా;

దుగ్గతిం నాభిజానామి, ఛత్తదానస్సిదం ఫలం.

౪౮. ‘‘ద్వేసత్తతిమ్హితో కప్పే, అట్ఠాసింసు జనాధిపా;

మహానిదాననామేన, రాజానో చక్కవత్తినో.

౪౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పాపనివారియో [వాతాతపనివారియో (సీ.)] థేరో ఇమా గాథాయో అభాసిత్థాతి;

పాపనివారియత్థేరస్సాపదానం దసమం.

కణికారపుప్ఫియవగ్గో ఏకవీసతిమో.