౨౨. హత్థివగ్గో

౧. హత్థిదాయకత్థేరఅపదానం

౧. ‘‘సిద్ధత్థస్స భగవతో, ద్విపదిన్దస్స తాదినో;

నాగసేట్ఠో మయా దిన్నో, ఈసాదన్తో ఉరూళ్హవా.

౨. ‘‘ఉత్తమత్థం అనుభోమి, సన్తిపదమనుత్తరం;

నాగదానం [అగ్గదానం (సీ. క.)] మయా దిన్నం, సబ్బలోకహితేసినో.

౩. ‘‘చతున్నవుతితో కప్పే, యం నాగ [దాన (సీ. క.)] మదదిం తదా;

దుగ్గతిం నాభిజానామి, నాగదానస్సిదం ఫలం.

౪. ‘‘అట్ఠసత్తతికప్పమ్హి, సోళసాసింసు ఖత్తియా;

సమన్తపాసాదికా నామ, చక్కవత్తీ మహబ్బలా.

౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా హత్థిదాయకో థేరో ఇమా గాథాయో అభాసిత్థాతి.

హత్థిదాయకత్థేరస్సాపదానం పఠమం.

౨. పానధిదాయకత్థేరఅపదానం

౬. ‘‘ఆరఞ్ఞికస్స ఇసినో, చిరరత్తతపస్సినో [ఝాయినో, మేత్తచిత్తతపస్సినో (స్యా.)];

బుద్ధస్స [ధమ్మస్స (స్యా. క.)] భావితత్తస్స, అదాసిం పానధిం అహం.

౭. ‘‘తేన కమ్మేన ద్విపదిన్ద, లోకజేట్ఠ నరాసభ;

దిబ్బయానం [సబ్బం యానం (సీ.)] అనుభోమి, పుబ్బకమ్మస్సిదం ఫలం.

౮. ‘‘చతున్నవుతే ఇతో కప్పే, యం కమ్మమకరిం తదా;

దుగ్గతిం నాభిజానామి, పానధిస్స ఇదం ఫలం.

౯. ‘‘సత్తసత్తతితో కప్పే, అట్ఠ ఆసింసు ఖత్తియా;

సుయానా నామ నామేన, చక్కవత్తీ మహబ్బలా.

౧౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పానధిదాయకో థేరో ఇమా గాథాయో అభాసిత్థాతి.

పానధిదాయకత్థేరస్సాపదానం దుతియం.

౩. సచ్చసఞ్ఞకత్థేరఅపదానం

౧౧. ‘‘వేస్సభూ తమ్హి సమయే, భిక్ఖుసఙ్ఘపురక్ఖతో;

దేసేతి అరియసచ్చాని, నిబ్బాపేన్తో మహాజనం.

౧౨. ‘‘పరమకారుఞ్ఞపత్తోమ్హి, సమితిం అగమాసహం;

సోహం నిసిన్నకో సన్తో, ధమ్మమస్సోసి సత్థునో.

౧౩. ‘‘తస్సాహం ధమ్మం సుత్వాన, దేవలోకం అగచ్ఛహం;

తింసకప్పాని దేవేసు, అవసిం తత్థహం పురే.

౧౪. ‘‘ఏకత్తింసే ఇతో కప్పే, యం సఞ్ఞమలభిం తదా;

దుగ్గతిం నాభిజానామి, సచ్చసఞ్ఞాయిదం ఫలం.

౧౫. ‘‘ఛబ్బీసమ్హి ఇతో కప్పే, ఏకో ఆసిం జనాధిపో;

ఏకఫుసితనామేన, చక్కవత్తీ మహబ్బలో.

౧౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సచ్చసఞ్ఞకో థేరో ఇమా గాథాయో అభాసిత్థాతి.

సచ్చసఞ్ఞకత్థేరస్సాపదానం తతియం.

౪. ఏకసఞ్ఞకత్థేరఅపదానం

౧౭. ‘‘దుమగ్గే పంసుకూలికం [పంసుకూలకం (?)], లగ్గం దిస్వాన సత్థునో;

అఞ్జలిం పగ్గహేత్వాన, పంసుకూలం అవన్దహం.

౧౮. ‘‘ఏకత్తింసే ఇతో కప్పే, యం సఞ్ఞమలభిం తదా;

దుగ్గతిం నాభిజానామి, బుద్ధపూజాయిదం ఫలం.

౧౯. ‘‘పఞ్చవీసే ఇతో కప్పే, ఏకో ఆసిం జనాధిపో;

అమితాభోతి నామేన, చక్కవత్తీ మహబ్బలో.

౨౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఏకసఞ్ఞకో థేరో ఇమా గాథాయో అభాసిత్థాతి.

ఏకసఞ్ఞకత్థేరస్సాపదానం చతుత్థం.

౫. రంసిసఞ్ఞకత్థేరఅపదానం

౨౧. ‘‘ఉదేన్తం సతరంసింవ, పీతరంసింవ [సితరంసిం వ (సీ. స్యా.)] భాణుమం;

బ్యగ్ఘూసభంవ పవరం, సుజాతం పబ్బతన్తరే.

౨౨. ‘‘బుద్ధస్స ఆనుభావో సో, జలతే పబ్బతన్తరే;

రంసే [రంస్యా (?)] చిత్తం పసాదేత్వా, కప్పం సగ్గమ్హి మోదహం.

౨౩. ‘‘అవసేసేసు కప్పేసు, కుసలం చరితం మయా;

తేన చిత్తప్పసాదేన, బుద్ధానుస్సతియాపి చ.

౨౪. ‘‘తింసకప్పసహస్సేతో, యం సఞ్ఞమలభిం తదా;

దుగ్గతిం నాభిజానామి, బుద్ధసఞ్ఞాయిదం ఫలం.

౨౫. ‘‘సత్తపఞ్ఞాసకప్పమ్హి, ఏకో ఆసిం జనాధిపో;

సుజాతో నామ నామేన, చక్కవత్తీ మహబ్బలో.

౨౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా రంసిసఞ్ఞకో థేరో ఇమా గాథాయో అభాసిత్థాతి.

రంసిసఞ్ఞకత్థేరస్సాపదానం పఞ్చమం.

౬. సన్ధితత్థేరఅపదానం

౨౭. ‘‘అస్సత్థే హరితోభాసే, సంవిరూళ్హమ్హి పాదపే;

ఏకం బుద్ధగతం సఞ్ఞం, అలభింహం [అలభిస్సం (సీ.)] పతిస్సతో.

౨౮. ‘‘ఏకత్తింసే ఇతో కప్పే, యం సఞ్ఞమలభిం తదా;

తస్సా సఞ్ఞాయ వాహసా, పత్తో మే ఆసవక్ఖయో.

౨౯. ‘‘ఇతో తేరసకప్పమ్హి, ధనిట్ఠో నామ ఖత్తియో;

సత్తరతనసమ్పన్నో, చక్కవత్తీ మహబ్బలో.

౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సన్ధితో [సణ్ఠితో (సీ.)] థేరో ఇమా గాథాయో అభాసిత్థాతి.

సన్ధితత్థేరస్సాపదానం ఛట్ఠం.

౭. తాలవణ్టదాయకత్థేరఅపదానం

౩౧. ‘‘తాలవణ్టం మయా దిన్నం, తిస్సస్సాదిచ్చబన్ధునో;

గిమ్హనిబ్బాపనత్థాయ, పరిళాహోపసన్తియా.

౩౨. ‘‘సన్నిబ్బాపేమి రాగగ్గిం, దోసగ్గిఞ్చ తదుత్తరిం;

నిబ్బాపేమి చ మోహగ్గిం, తాలవణ్టస్సిదం ఫలం.

౩౩. ‘‘కిలేసా ఝాపితా మయ్హం, భవా సబ్బే సమూహతా;

ధారేమి అన్తిమం దేహం, సమ్మాసమ్బుద్ధసాసనే.

౩౪. ‘‘ద్వేనవుతే ఇతో కప్పే, యం కమ్మమకరిం తదా;

దుగ్గతిం నాభిజానామి, తాలవణ్టస్సిదం ఫలం.

౩౫. ‘‘తేసట్ఠిమ్హి ఇతో కప్పే, మహానామసనామకో;

సత్తరతనసమ్పన్నో, చక్కవత్తీ మహబ్బలో.

౩౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తాలవణ్టదాయకో థేరో ఇమా గాథాయో అభాసిత్థాతి.

తాలవణ్టదాయకత్థేరస్సాపదానం సత్తమం.

౮. అక్కన్తసఞ్ఞకత్థేరఅపదానం

౩౭. ‘‘కుసాటకం గహేత్వాన, ఉపజ్ఝాయస్సహం పురే;

మన్తఞ్చ అనుసిక్ఖామి, గన్థాదోసస్స [కణ్డభేదస్స (సీ.), గణ్డభేదస్స (స్యా.)] పత్తియా.

౩౮. ‘‘అద్దసం విరజం బుద్ధం, ఆహుతీనం పటిగ్గహం;

ఉసభం పవరం అగ్గం, తిస్సం బుద్ధం గణుత్తమం [గజుత్తమం (స్యా.)].

౩౯. ‘‘కుసాటకం పత్థరితం, అక్కమన్తం నరుత్తమం;

సముగ్గతం మహావీరం, లోకజేట్ఠం నరాసభం.

౪౦. ‘‘దిస్వా తం లోకపజ్జోతం, విమలం చన్దసన్నిభం;

అవన్దిం సత్థునో పాదే, విప్పసన్నేన చేతసా.

౪౧. ‘‘చతున్నవుతితో కప్పే, యం అదాసిం కుసాటకం;

దుగ్గతిం నాభిజానామి, కుసాటకస్సిదం ఫలం.

౪౨. ‘‘సత్తతింసే ఇతో కప్పే, ఏకో ఆసిం జనాధిపో;

సునన్దో నామ నామేన, చక్కవత్తీ మహబ్బలో.

౪౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అక్కన్తసఞ్ఞకో థేరో ఇమా గాథాయో అభాసిత్థాతి;

అక్కన్తసఞ్ఞకత్థేరస్సాపదానం అట్ఠమం.

౯. సప్పిదాయకత్థేరఅపదానం

౪౪. ‘‘నిసిన్నో పాసాదవరే, నారీగణపురక్ఖతో;

బ్యాధితం సమణం దిస్వా, అభినామేసహం ఘరం.

౪౫. ‘‘ఉపవిట్ఠం మహావీరం, దేవదేవం నరాసభం;

సప్పితేలం మయా దిన్నం, సిద్ధత్థస్స మహేసినో.

౪౬. ‘‘పస్సద్ధదరథం దిస్వా, విప్పసన్నముఖిన్ద్రియం;

వన్దిత్వా సత్థునో పాదే, అనుసంసావయిం పురే.

౪౭. ‘‘దిస్వా మం సుప్పసన్నత్తం [సుప్పసన్నన్తం (స్యా. క.) సుప్పసన్నచిత్తన్తి అత్థో], ఇద్ధియా పారమిఙ్గతో;

నభం అబ్భుగ్గమీ ధీరో, హంసరాజావ అమ్బరే.

౪౮. ‘‘చతున్నవుతితో కప్పే, యం దానమదదిం తదా;

దుగ్గతిం నాభిజానామి, సప్పితేలస్సిదం ఫలం.

౪౯. ‘‘ఇతో సత్తరసే కప్పే, జుతిదేవ [దుతిదేవ (స్యా.), తుతిదేవ (క.)] సనామకో;

సత్తరతనసమ్పన్నో, చక్కవత్తీ మహబ్బలో.

౫౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సప్పిదాయకో థేరో ఇమా గాథాయో అభాసిత్థాతి.

సప్పిదాయకత్థేరస్సాపదానం నవమం.

౧౦. పాపనివారియత్థేరఅపదానం

౫౧. ‘‘పియదస్సిస్స భగవతో, చఙ్కమం సోధితం మయా;

నళకేహి పటిచ్ఛన్నం, వాతాతపనివారణం.

౫౨. ‘‘పాపం వివజ్జనత్థాయ, కుసలస్సుపసమ్పదా;

కిలేసానం పహానాయ, పదహిం సత్థు సాసనే.

౫౩. ‘‘ఇతో ఏకాదసే కప్పే, అగ్గిదేవోతి విస్సుతో;

సత్తరతనసమ్పన్నో, చక్కవత్తీ మహబ్బలో.

౫౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పాపనివారియో [వాతాతపనివారియో (?)] థేరో ఇమా గాథాయో అభాసిత్థాతి.

పాపనివారియత్థేరస్సాపదానం దసమం.

హత్థివగ్గో బావీసతిమో.