౨౪. ఉదకాసనవగ్గో

౧. ఉదకాసనదాయకత్థేరఅపదానం

౧. ‘‘ఆరామద్వారా నిక్ఖమ్మ, ఫలకం సన్థరిం అహం;

ఉదకఞ్చ ఉపట్ఠాసిం, ఉత్తమత్థస్స పత్తియా.

౨. ‘‘ఏకత్తింసే ఇతో కప్పే, యం కమ్మమకరిం తదా;

దుగ్గతిం నాభిజానామి, ఆసనే చోదకే ఫలం.

౩. ‘‘ఇతో పన్నరసే కప్పే, అభిసామసమవ్హయో;

సత్తరతనసమ్పన్నో, చక్కవత్తీ మహబ్బలో.

౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా ఉదకాసనదాయకో థేరో ఇమా గాథాయో అభాసిత్థాతి.

ఉదకాసనదాయకత్థేరస్సాపదానం పఠమం.

౨. భాజనపాలకత్థేరఅపదానం

౫. ‘‘నగరే బన్ధుమతియా, కుమ్భకారో అహం తదా;

భాజనం అనుపాలేసిం, భిక్ఖుసఙ్ఘస్స తావదే.

౬. ‘‘ఏకనవుతితో కప్పే, భాజనం అనుపాలయిం;

దుగ్గతిం నాభిజానామి, భాజనస్స ఇదం ఫలం.

౭. ‘‘తేపఞ్ఞాసే ఇతో కప్పే, అనన్తజాలినామకో;

సత్తరతనసమ్పన్నో, చక్కవత్తీ మహబ్బలో.

౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా భాజనపాలకో [భాజనదాయకో (సీ. స్యా.)] థేరో ఇమా గాథాయో అభాసిత్థాతి.

భాజనపాలకత్థేరస్సాపదానం దుతియం.

౩. సాలపుప్ఫియత్థేరఅపదానం

౯. ‘‘అరుణవతియా నగరే, అహోసిం పూపికో తదా;

మమ ద్వారేన గచ్ఛన్తం, సిఖినం అద్దసం జినం.

౧౦. ‘‘బుద్ధస్స పత్తం పగ్గయ్హ, సాలపుప్ఫం అదాసహం;

సమ్మగ్గతస్స బుద్ధస్స, విప్పసన్నేన చేతసా.

౧౧. ‘‘ఏకత్తింసే ఇతో కప్పే, యం పుప్ఫమభిదాసహం [యం ఖజ్జకమదాసహం (సీ.), యం ఖజ్జమభిదాసహం (క.) సాలపుప్ఫనామకం ఖజ్జకం వా భవేయ్య];

దుగ్గతిం నాభిజానామి, సాలపుప్ఫస్సిదం ఫలం.

౧౨. ‘‘ఇతో చుద్దసకప్పమ్హి, అహోసిం అమితఞ్జలో;

సత్తరతనసమ్పన్నో, చక్కవత్తీ మహబ్బలో.

౧౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సాలపుప్ఫియో థేరో ఇమా గాథాయో అభాసిత్థాతి.

సాలపుప్ఫియత్థేరస్సాపదానం తతియం.

౪. కిలఞ్జదాయకత్థేరఅపదానం

౧౪. ‘‘తివరాయం పురే రమ్మే, నళకారో అహం తదా;

సిద్ధత్థే లోకపజ్జోతే, పసన్నా జనతా తహిం.

౧౫. ‘‘పూజత్థం లోకనాథస్స, కిలఞ్జం పరియేసతి;

బుద్ధపూజం కరోన్తానం, కిలఞ్జం అదదిం అహం.

౧౬. ‘‘చతున్నవుతితో కప్పే, యం కమ్మమకరిం తదా;

దుగ్గతిం నాభిజానామి, కిలఞ్జస్స ఇదం ఫలం.

౧౭. ‘‘సత్తసత్తతికప్పమ్హి, రాజా ఆసిం జలద్ధరో [జుతిన్ధరో (సీ.)];

సత్తరతనసమ్పన్నో, చక్కవత్తీ మహబ్బలో.

౧౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కిలఞ్జదాయకో థేరో ఇమా గాథాయో అభాసిత్థాతి.

కిలఞ్జదాయకత్థేరస్సాపదానం చతుత్థం.

౫. వేదికారకత్థేరఅపదానం

౧౯. ‘‘విపస్సినో భగవతో, బోధియా పాదపుత్తమే;

పసన్నచిత్తో సుమనో, కారేసిం వేదికం అహం.

౨౦. ‘‘ఏకనవుతితో కప్పే, కారేసిం వేదికం అహం;

దుగ్గతిం నాభిజానామి, వేదికాయ ఇదం ఫలం.

౨౧. ‘‘ఇతో ఏకాదసే కప్పే, అహోసిం సూరియస్సమో;

సత్తరత్తనసమ్పన్నో, చక్కవత్తీ మహబ్బలో.

౨౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వేదికారకో థేరో ఇమా గాథాయో అభాసిత్థాతి.

వేదికారకత్థేరస్సాపదానం పఞ్చమం.

౬. వణ్ణకారత్థేరఅపదానం

౨౩. ‘‘నగరే అరుణవతియా, వణ్ణకారో అహం తదా;

చేతియే దుస్సభణ్డాని, నానావణ్ణం రజేసహం [రజిం అహం (క.), రజేమహం (స్యా.)].

౨౪. ‘‘ఏకత్తింసే ఇతో కప్పే, యం వణ్ణం రజయిం తదా;

దుగ్గతిం నాభిజానామి, వణ్ణదానస్సిదం ఫలం.

౨౫. ‘‘ఇతో తేవీసతికప్పే, వణ్ణసమ [చన్దుపమ (సీ.), చన్దసమ (స్యా.)] సనామకో;

సత్తరతనసమ్పన్నో, చక్కవత్తీ మహబ్బలో.

౨౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వణ్ణకారో థేరో ఇమా గాథాయో అభాసిత్థాతి.

వణ్ణకారత్థేరస్సాపదానం ఛట్ఠం.

౭. పియాలపుప్ఫియత్థేరఅపదానం

౨౭. ‘‘మిగలుద్దో పురే ఆసిం, అరఞ్ఞే కాననే అహం;

పియాలం పుప్ఫితం దిస్వా, గతమగ్గే ఖిపిం అహం.

౨౮. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పియాలపుప్ఫియో థేరో ఇమా గాథాయో అభాసిత్థాతి.

పియాలపుప్ఫియత్థేరస్సాపదానం సత్తమం.

౮. అమ్బయాగదాయకత్థేరఅపదానం

౩౦. ‘‘సకే సిప్పే అపత్థద్ధో, అగమం కాననం అహం;

సమ్బుద్ధం యన్తం దిస్వాన, అమ్బయాగం అదాసహం.

౩౧. ‘‘ఏకనవుతితో కప్పే, యం దానమదదిం తదా;

దుగ్గతిం నాభిజానామి, అమ్బయాగస్సిదం ఫలం.

౩౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అమ్బయాగదాయకో థేరో ఇమా గాథాయో అభాసిత్థాతి.

అమ్బయాగదాయకత్థేరస్సాపదానం అట్ఠమం.

౯. జగతికారకత్థేరఅపదానం

౩౩. ‘‘నిబ్బుతే లోకనాథమ్హి, అత్థదస్సి నరుత్తమే;

జగతీ కారితా మయ్హం, బుద్ధస్స థూపముత్తమే.

౩౪. ‘‘అట్ఠారసే కప్పసతే, యం కమ్మమకరిం తదా;

దుగ్గతిం నాభిజానామి, జగతియా ఇదం ఫలం.

౩౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా జగతికారకో థేరో ఇమా గాథాయో అభాసిత్థాతి.

జగతికారకత్థేరస్సాపదానం నవమం.

౧౦. వాసిదాయకత్థేరఅపదానం

౩౬. ‘‘కమ్మారోహం పురే ఆసిం, తివరాయం పురుత్తమే;

ఏకా వాసి మయా దిన్నా, సయమ్భుం అపరాజితం [సయమ్భుమ్హిపరాజితే (?)].

౩౭. ‘‘చతున్నవుతితో కప్పే, యం వాసిమదదిం తదా;

దుగ్గతిం నాభిజానామి, వాసిదానస్సిదం ఫలం.

౩౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వాసిదాయకో థేరో ఇమా గాథాయో అభాసిత్థాతి.

వాసిదాయకత్థేరస్సాపదానం దసమం.

ఉదకాసనవగ్గో చతువీసతిమో.