౩. కోటుమ్బరియత్థేరఅపదానం

౧౨. ‘‘కణికారంవ జోతన్తం, నిసిన్నం పబ్బతన్తరే;

అప్పమేయ్యంవ ఉదధిం, విత్థతం ధరణిం యథా.

౧౩. ‘‘పూజితం [పరేతం (సీ.)] దేవసఙ్ఘేన, నిసభాజానియం యథా;

హట్ఠో హట్ఠేన చిత్తేన, ఉపాగచ్ఛిం నరుత్తమం.

౧౪. ‘‘సత్తపుప్ఫాని పగ్గయ్హ, కోటుమ్బరసమాకులం;

బుద్ధస్స అభిరోపేసిం, సిఖినో లోకబన్ధునో.

౧౫. ‘‘ఏకత్తింసే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౧౬. ‘‘ఇతో వీసతికప్పమ్హి, మహానేలసనామకో;

ఏకో ఆసి మహాతేజో, చక్కవత్తీ మహబ్బలో.

౧౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కోటుమ్బరియో థేరో ఇమా గాథాయో అభాసిత్థాతి.

కోటుమ్బరియత్థేరస్సాపదానం తతియం.