౧౯. కుటజపుప్ఫియవగ్గో

౧. కుటజపుప్ఫియత్థేరఅపదానం

౧. ‘‘సువణ్ణవణ్ణం సమ్బుద్ధం, సతరంసింవ ఉగ్గతం;

దిసం అనువిలోకేన్తం, గచ్ఛన్తం అనిలఞ్జసే.

౨. ‘‘కుటజం పుప్ఫితం దిస్వా, సంవిత్థతసమోత్థతం;

రుక్ఖతో ఓచినిత్వాన, ఫుస్సస్స అభిరోపయిం.

౩. ‘‘ద్వేనవుతే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౪. ‘‘ఇతో సత్తరసే కప్పే, తయో ఆసుం సుపుప్ఫితా;

సత్తరతనసమ్పన్నా, చక్కవత్తీ మహబ్బలా.

౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా కుటజపుప్ఫియో థేరో ఇమా గాథాయో అభాసిత్థాతి.

కుటజపుప్ఫియత్థేరస్సాపదానం పఠమం.

౨. బన్ధుజీవకత్థేరఅపదానం

౬. ‘‘సిద్ధత్థో నామ సమ్బుద్ధో, సయమ్భూ సబ్భి వణ్ణితో;

సమాధిం సో సమాపన్నో, నిసీది పబ్బతన్తరే.

౭. ‘‘జాతస్సరే గవేసన్తో, దకజం పుప్ఫముత్తమం;

బన్ధుజీవకపుప్ఫాని, అద్దసం సమనన్తరం.

౮. ‘‘ఉభో హత్థేహి పగ్గయ్హ, ఉపాగచ్ఛిం మహామునిం;

పసన్నచిత్తో సుమనో, సిద్ధత్థస్సాభిరోపయిం.

౯. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౧౦. ‘‘ఇతో చాతుద్దసే కప్పే, ఏకో ఆసిం జనాధిపో;

సముద్దకప్పో నామేన, చక్కవత్తీ మహబ్బలో.

౧౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా బన్ధుజీవకో థేరో ఇమా గాథాయో అభాసిత్థాతి.

బన్ధుజీవకత్థేరస్సాపదానం దుతియం.

౩. కోటుమ్బరియత్థేరఅపదానం

౧౨. ‘‘కణికారంవ జోతన్తం, నిసిన్నం పబ్బతన్తరే;

అప్పమేయ్యంవ ఉదధిం, విత్థతం ధరణిం యథా.

౧౩. ‘‘పూజితం [పరేతం (సీ.)] దేవసఙ్ఘేన, నిసభాజానియం యథా;

హట్ఠో హట్ఠేన చిత్తేన, ఉపాగచ్ఛిం నరుత్తమం.

౧౪. ‘‘సత్తపుప్ఫాని పగ్గయ్హ, కోటుమ్బరసమాకులం;

బుద్ధస్స అభిరోపేసిం, సిఖినో లోకబన్ధునో.

౧౫. ‘‘ఏకత్తింసే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౧౬. ‘‘ఇతో వీసతికప్పమ్హి, మహానేలసనామకో;

ఏకో ఆసి మహాతేజో, చక్కవత్తీ మహబ్బలో.

౧౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కోటుమ్బరియో థేరో ఇమా గాథాయో అభాసిత్థాతి.

కోటుమ్బరియత్థేరస్సాపదానం తతియం.

౪. పఞ్చహత్థియత్థేరఅపదానం

౧౮. ‘‘తిస్సో నామాసి భగవా, లోకజేట్ఠో నరాసభో;

పురక్ఖతో సావకేహి, రథియం పటిపజ్జథ.

౧౯. ‘‘పఞ్చ ఉప్పలహత్థా చ, చాతురా ఠపితా మయా;

ఆహుతిం దాతుకామోహం, పగ్గణ్హిం వతసిద్ధియా [పుత్తోమ్హి హితసిద్ధియా (స్యా.)].

౨౦. ‘‘సువణ్ణవణ్ణం సమ్బుద్ధం, గచ్ఛన్తం అన్తరాపణే;

బుద్ధరంసీహి ఫుట్ఠోస్మి [బుద్ధరంస్యాభిఫుట్ఠోమ్హి (సీ.), బుద్ధరంసాభిఘుట్ఠోస్మి (క.)], పూజేసిం ద్విపదుత్తమం.

౨౧. ‘‘ద్వేనవుతే ఇతో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౨౨. ‘‘ఇతో తేరసకప్పమ్హి, పఞ్చ సుసభసమ్మతా;

సత్తరతనసమ్పన్నా, చక్కవత్తీ మహబ్బలా.

౨౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పఞ్చహత్థియో థేరో ఇమా గాథాయో అభాసిత్థాతి.

పఞ్చహత్థియత్థేరస్సాపదానం చతుత్థం.

౫. ఇసిముగ్గదాయకత్థేరఅపదానం

౨౪. ‘‘ఉదేన్తం సతరంసింవ, పీతరంసింవ [సితరంసింవ (సీ.)] భాణుమం;

కకుధం విలసన్తంవ, పదుముత్తరనాయకం.

౨౫. ‘‘ఇసిముగ్గాని పిసిత్వా [ఇసిసుగ్గాని పింసేత్వా (సీ.), ఇసిముగ్గం నిమన్తేత్వా (స్యా.)], మధుఖుద్దే అనీళకే;

పాసాదేవ ఠితో సన్తో, అదాసిం లోకబన్ధునో.

౨౬. ‘‘అట్ఠసతసహస్సాని, అహేసుం బుద్ధసావకా;

సబ్బేసం పత్తపూరేన్తం [పత్తపూరం తం (సీ.)], తతో చాపి బహుత్తరం.

౨౭. ‘‘తేన చిత్తప్పసాదేన, సుక్కమూలేన చోదితో;

కప్పానం సతసహస్సం, దుగ్గతిం నుపపజ్జహం.

౨౮. ‘‘చత్తాలీసమ్హి సహస్సే, కప్పానం అట్ఠతింస తే;

ఇసిముగ్గసనామా [మహిసమన్తనామా (స్యా.)] తే, చక్కవత్తీ మహబ్బలా.

౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఇసిముగ్గదాయకో థేరో ఇమా గాథాయో అభాసిత్థాతి.

ఇసిముగ్గదాయకత్థేరస్సాపదానం పఞ్చమం.

౬. బోధిఉపట్ఠాకత్థేరఅపదానం

౩౦. ‘‘నగరే రమ్మవతియా, ఆసిం మురజవాదకో;

నిచ్చుపట్ఠానయుత్తోమ్హి, గతోహం బోధిముత్తమం.

౩౧. ‘‘సాయం పాతం ఉపట్ఠిత్వా, సుక్కమూలేన చోదితో;

అట్ఠారసకప్పసతే, దుగ్గతిం నుపపజ్జహం.

౩౨. ‘‘పన్నరసే కప్పసతే, ఇతో ఆసిం జనాధిపో;

మురజో [దమథో (స్యా.)] నామ నామేన, చక్కవత్తీ మహబ్బలో.

౩౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా బోధిఉపట్ఠాకో థేరో ఇమా గాథాయో అభాసిత్థాతి.

బోధిఉపట్ఠాకత్థేరస్సాపదానం ఛట్ఠం.

౭. ఏకచిన్తికత్థేరఅపదానం

౩౪. ‘‘యదా దేవో [దేవా (క.)] దేవకాయా, చవతే [చవన్తి (క.)] ఆయుసఙ్ఖయా;

తయో సద్దా నిచ్ఛరన్తి, దేవానం అనుమోదతం.

౩౫. ‘ఇతో భో సుగతిం గచ్ఛ, మనుస్సానం సహబ్యతం;

మనుస్సభూతో సద్ధమ్మే, లభ సద్ధం అనుత్తరం.

౩౬. ‘‘‘సా తే సద్ధా నివిట్ఠాస్స, మూలజాతా పతిట్ఠితా;

యావజీవం అసంహీరా, సద్ధమ్మే సుప్పవేదితే.

౩౭. ‘‘‘కాయేన కుసలం కత్వా, వాచాయ కుసలం బహుం;

మనసా కుసలం కత్వా, అబ్యాపజ్జం [అబ్యాపజ్ఝం (స్యా.), అప్పమాణం (ఇతివుత్తకే ౮౩)] నిరూపధిం.

౩౮. ‘‘‘తతో ఓపధికం పుఞ్ఞం, కత్వా దానేన తం బహుం;

అఞ్ఞేపి మచ్చే సద్ధమ్మే, బ్రహ్మచరియే నివేసయ’.

౩౯. ‘‘ఇమాయ అనుకమ్పాయ, దేవా దేవం యదా విదూ;

చవన్తం అనుమోదన్తి, ఏహి దేవ పునప్పునం [దేవపురం పున (స్యా.)].

౪౦. ‘‘సంవేగో మే [సంవిగ్గోహం (స్యా.)] తదా ఆసి, దేవసఙ్ఘే సమాగతే;

కంసు నామ అహం యోనిం, గమిస్సామి ఇతో చుతో.

౪౧. ‘‘మమ సంవేగమఞ్ఞాయ, సమణో భావితిన్ద్రియో;

మముద్ధరితుకామో సో, ఆగచ్ఛి మమ సన్తికం.

౪౨. ‘‘సుమనో నామ నామేన, పదుముత్తరసావకో;

అత్థధమ్మానుసాసిత్వా, సంవేజేసి మమం తదా.

౪౩. ‘‘తస్సాహం వచనం సుత్వా, బుద్ధే చిత్తం పసాదయిం;

తం ధీరం అభివాదేత్వా, తత్థ కాలంకతో అహం.

౪౪. ‘‘ఉపపజ్జిం స [ఉపపజ్జిస్సం (సీ.)] తత్థేవ, సుక్కమూలేన చోదితో;

కప్పానం సతసహస్సం, దుగ్గతిం నుపపజ్జహం.

౪౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఏకచిన్తికో థేరో ఇమా గాథాయో అభాసిత్థాతి.

ఏకచిన్తికత్థేరస్సాపదానం సత్తమం.

౮. తికణ్ణిపుప్ఫియత్థేరఅపదానం

౪౬. ‘‘దేవభూతో అహం సన్తో, అచ్ఛరాహి పురక్ఖతో;

పుబ్బకమ్మం సరిత్వాన, బుద్ధసేట్ఠం అనుస్సరిం.

౪౭. ‘‘తికణ్ణిపుప్ఫం [కింకణిపుప్ఫం (క.)] పగ్గయ్హ, సకం చిత్తం పసాదయిం;

బుద్ధమ్హి అభిరోపేసిం, విపస్సిమ్హి నరాసభే.

౪౮. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౪౯. ‘‘తేసత్తతిమ్హితో కప్పే, చతురాసుం రముత్తమా;

సత్తరతనసమ్పన్నా, చక్కవత్తీ మహబ్బలా.

౫౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తికణ్ణిపుప్ఫియో [కింకణికపుప్ఫియో (క.)] థేరో ఇమా గాథాయో అభాసిత్థాతి.

తికణ్ణిపుప్ఫియత్థేరస్సాపదానం అట్ఠమం.

౯. ఏకచారియత్థేరఅపదానం

౫౧. ‘‘తావతింసేసు దేవేసు, మహాఘోసో తదా అహు;

బుద్ధో చ లోకే నిబ్బాతి, మయఞ్చమ్హ సరాగినో.

౫౨. ‘‘తేసం సంవేగజాతానం, సోకసల్లసమఙ్గినం;

సబలేన ఉపత్థద్ధో, అగమం బుద్ధసన్తికం.

౫౩. ‘‘మన్దారవం గహేత్వాన, సఙ్గీతి [సణ్హితం (సీ.), సఙ్గితం (స్యా.)] అభినిమ్మితం;

పరినిబ్బుతకాలమ్హి, బుద్ధస్స అభిరోపయిం.

౫౪. ‘‘సబ్బే దేవానుమోదింసు, అచ్ఛరాయో చ మే తదా;

కప్పానం సతసహస్సం, దుగ్గతిం నుపపజ్జహం.

౫౫. ‘‘సట్ఠికప్పసహస్సమ్హి, ఇతో సోళస తే జనా;

మహామల్లజనా నామ, చక్కవత్తీ మహబ్బలా.

౫౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఏకచారియో థేరో ఇమా గాథాయో అభాసిత్థాతి.

ఏకచారియత్థేరస్సాపదానం నవమం.

౧౦. తివణ్టిపుప్ఫియత్థేరఅపదానం

౫౭. ‘‘అభిభూతం పనిజ్ఝన్తి [అభిభూతోపనిజ్ఝన్తి (సీ.)], సబ్బే సఙ్గమ్మ తే మమం [అభిభుం థేరం పనిజ్ఝామ, సబ్బే సఙ్గమ్మ తే మయం (స్యా.)];

తేసం నిజ్ఝాయమానానం, పరిళాహో అజాయథ.

౫౮. ‘‘సునన్దో నామ నామేన, బుద్ధస్స సావకో తదా;

ధమ్మదస్సిస్స మునినో, ఆగచ్ఛి మమ సన్తికం.

౫౯. ‘‘యే మే బద్ధచరా ఆసుం, తే మే పుప్ఫం అదుం తదా;

తాహం పుప్ఫం గహేత్వాన, సావకే అభిరోపయిం.

౬౦. ‘‘సోహం కాలంకతో తత్థ, పునాపి ఉపపజ్జహం;

అట్ఠారసే కప్పసతే, వినిపాతం న గచ్ఛహం.

౬౧. ‘‘తేరసేతో కప్పసతే, అట్ఠాసుం ధూమకేతునో;

సత్తరతనసమ్పన్నా, చక్కవత్తీ మహబ్బలా.

౬౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తివణ్టిపుప్ఫియో థేరో ఇమా గాథాయో అభాసిత్థాతి;

తివణ్టిపుప్ఫియత్థేరస్సాపదానం దసమం.

కుటజపుప్ఫియవగ్గో ఏకూనవీసతిమో.