౮. నాగపుప్ఫియత్థేరఅపదానం

౩౯. ‘‘సువచ్ఛో నామ నామేన, బ్రాహ్మణో మన్తపారగూ;

పురక్ఖతో ససిస్సేహి, వసతే పబ్బతన్తరే.

౪౦. ‘‘పదుముత్తరో నామ జినో, ఆహుతీనం పటిగ్గహో;

మముద్ధరితుకామో సో, ఆగచ్ఛి మమ సన్తికం.

౪౧. ‘‘వేహాసమ్హి చఙ్కమతి, ధూపాయతి జలతే తథా;

హాసం మమం విదిత్వాన, పక్కామి పాచినాముఖో.

౪౨. ‘‘తఞ్చ అచ్ఛరియం దిస్వా, అబ్భుతం లోమహంసనం;

నాగపుప్ఫం గహేత్వాన, గతమగ్గమ్హి ఓకిరిం.

౪౩. ‘‘సతసహస్సితో కప్పే, యం పుప్ఫం ఓకిరిం అహం;

తేన చిత్తప్పసాదేన, దుగ్గతిం నుపపజ్జహం.

౪౪. ‘‘ఏకత్తింసే కప్పసతే [ఏకతింసే ఇతో కమ్మే (స్యా.)], రాజా ఆసి మహారహో;

సత్తరతనసమ్పన్నో, చక్కవత్తీ మహబ్బలో.

౪౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నాగపుప్ఫియో థేరో ఇమా గాథాయో అభాసిత్థాతి.

నాగపుప్ఫియత్థేరస్సాపదానం అట్ఠమం.