౧౬. బన్ధుజీవకవగ్గో

౧. బన్ధుజీవకత్థేరఅపదానం

౧. ‘‘చన్దంవ విమలం సుద్ధం, విప్పసన్నమనావిలం;

నన్దీభవపరిక్ఖీణం, తిణ్ణం లోకే విసత్తికం.

౨. ‘‘నిబ్బాపయన్తం జనతం, తిణ్ణం [దిస్వా (?)] తారయతం వరం [తారయతం మునిం (స్యా.)];

మునిం వనమ్హి ఝాయన్తం [వనస్మిం ఝాయమానం తం (సీ. స్యా.)], ఏకగ్గం సుసమాహితం.

౩. ‘‘బన్ధుజీవకపుప్ఫాని, లగేత్వా సుత్తకేనహం;

బుద్ధస్స అభిరోపయిం, సిఖినో లోకబన్ధునో.

౪. ‘‘ఏకత్తింసే ఇతో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౫. ‘‘ఇతో సత్తమకే కప్పే, మనుజిన్దో మహాయసో;

సమన్తచక్ఖు నామాసి, చక్కవత్తీ మహబ్బలో.

౬. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా బన్ధుజీవకో థేరో ఇమా గాథాయో అభాసిత్థాతి.

బన్ధుజీవకత్థేరస్సాపదానం పఠమం.

౨. తమ్బపుప్ఫియత్థేరఅపదానం

౭. ‘‘పరకమ్మాయనే యుత్తో, అపరాధం అకాసహం;

వనన్తం అభిధావిస్సం, భయవేరసమప్పితో.

౮. ‘‘పుప్ఫితం పాదపం దిస్వా, పిణ్డిబన్ధం సునిమ్మితం;

తమ్బపుప్ఫం గహేత్వాన, బోధియం ఓకిరిం అహం.

౯. ‘‘సమ్మజ్జిత్వాన తం బోధిం, పాటలిం పాదపుత్తమం;

పల్లఙ్కం ఆభుజిత్వాన, బోధిమూలే ఉపావిసిం.

౧౦. ‘‘గతమగ్గం గవేసన్తా, ఆగచ్ఛుం మమ సన్తికం;

తే చ దిస్వానహం తత్థ, ఆవజ్జిం బోధిముత్తమం.

౧౧. ‘‘వన్దిత్వాన అహం బోధిం, విప్పసన్నేన చేతసా;

అనేకతాలే పపతిం, గిరిదుగ్గే భయానకే.

౧౨. ‘‘ఏకనవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బోధిపూజాయిదం ఫలం.

౧౩. ‘‘ఇతో చ తతియే కప్పే, రాజా సుసఞ్ఞతో అహం [సంథుసితో అహుం (సీ.)];

సత్తరతనసమ్పన్నో, చక్కవత్తీ మహబ్బలో.

౧౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తమ్బపుప్ఫియో థేరో ఇమా గాథాయో అభాసిత్థాతి.

తమ్బపుప్ఫియత్థేరస్సాపదానం దుతియం.

౩. వీథిసమ్మజ్జకత్థేరఅపదానం

౧౫. ‘‘ఉదేన్తం సతరంసింవ, పీతరంసింవ [సితరంసింవ (సీ. స్యా.)] భాణుమం;

పన్నరసే యథా చన్దం, నియ్యన్తం లోకనాయకం.

౧౬. ‘‘అట్ఠసట్ఠిసహస్సాని, సబ్బే ఖీణాసవా అహుం;

పరివారింసు సమ్బుద్ధం, ద్విపదిన్దం నరాసభం.

౧౭. ‘‘సమ్మజ్జిత్వాన తం వీథిం, నియ్యన్తే లోకనాయకే;

ఉస్సాపేసిం ధజం తత్థ, విప్పసన్నేన చేతసా.

౧౮. ‘‘ఏకనవుతితో కప్పే, యం ధజం అభిరోపయిం;

దుగ్గతిం నాభిజానామి, ధజదానస్సిదం ఫలం.

౧౯. ‘‘ఇతో చతుత్థకే కప్పే, రాజాహోసిం మహబ్బలో;

సబ్బాకారేన సమ్పన్నో, సుధజో ఇతి విస్సుతో.

౨౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వీథిసమ్మజ్జకో థేరో ఇమా గాథాయో అభాసిత్థాతి.

వీథిసమ్మజ్జకత్థేరస్సాపదానం తతియం.

౪. కక్కారుపుప్ఫపూజకత్థేరఅపదానం

౨౧. ‘‘దేవపుత్తో అహం సన్తో, పూజయిం సిఖినాయకం;

కక్కారుపుప్ఫం పగ్గయ్హ, బుద్ధస్స అభిరోపయిం.

౨౨. ‘‘ఏకత్తింసే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౨౩. ‘‘ఇతో చ నవమే కప్పే, రాజా సత్తుత్తమో అహుం;

సత్తరతనసమ్పన్నో, చక్కవత్తీ మహబ్బలో.

౨౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కక్కారుపుప్ఫపూజకో థేరో ఇమా గాథాయో అభాసిత్థాతి.

కక్కారుపుప్ఫపూజకత్థేరస్సాపదానం చతుత్థం.

౫. మన్దారవపుప్ఫపూజకత్థేరఅపదానం

౨౫. ‘‘దేవపుత్తో అహం సన్తో, పూజయిం సిఖినాయకం;

మన్దారవేన పుప్ఫేన, బుద్ధస్స అభిరోపయిం.

౨౬. ‘‘సత్తాహం ఛదనం ఆసి, దిబ్బం మాలం తథాగతే;

సబ్బే జనా సమాగన్త్వా, నమస్సింసు తథాగతం.

౨౭. ‘‘ఏకత్తింసే ఇతో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౨౮. ‘‘ఇతో చ దసమే కప్పే, రాజాహోసిం జుతిన్ధరో;

సత్తరతనసమ్పన్నో, చక్కవత్తీ మహబ్బలో.

౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మన్దారవపుప్ఫపూజకో థేరో ఇమా గాథాయో అభాసిత్థాతి.

మన్దారవపుప్ఫపూజకత్థేరస్సాపదానం పఞ్చమం.

౬. కదమ్బపుప్ఫియత్థేరఅపదానం

౩౦. ‘‘హిమవన్తస్సావిదూరే, కుక్కుటో నామ పబ్బతో;

తమ్హి పబ్బతపాదమ్హి, సత్త బుద్ధా వసన్తి తే.

౩౧. ‘‘కదమ్బం పుప్ఫితం దిస్వా, దీపరాజంవ ఉగ్గతం;

ఉభో హత్థేహి పగ్గయ్హ, సత్త బుద్ధే సమోకిరిం.

౩౨. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౩౩. ‘‘ద్వేనవుతే ఇతో కప్పే, సత్తాసుం పుప్ఫనామకా;

సత్తరతనసమ్పన్నా, చక్కవత్తీ మహబ్బలా.

౩౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కదమ్బపుప్ఫియో థేరో ఇమా గాథాయో అభాసిత్థాతి;

కదమ్బపుప్ఫియత్థేరస్సాపదానం ఛట్ఠం.

౭. తిణసూలకత్థేరఅపదానం

౩౫. ‘‘హిమవన్తస్సావిదూరే, భూతగణో నామ పబ్బతో;

వసతేకో జినో తత్థ, సయమ్భూ లోకనిస్సటో.

౩౬. ‘‘తిణసూలం గహేత్వాన, బుద్ధస్స అభిరోపయిం;

ఏకూనసతసహస్సం, కప్పం న వినిపాతికో.

౩౭. ‘‘ఇతో ఏకాదసే కప్పే, ఏకోసిం ధరణీరుహో;

సత్తరతనసమ్పన్నో, చక్కవత్తీ మహబ్బలో.

౩౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిణసూలకో థేరో ఇమా గాథాయో అభాసిత్థాతి.

తిణసూలకత్థేరస్సాపదానం సత్తమం.

౮. నాగపుప్ఫియత్థేరఅపదానం

౩౯. ‘‘సువచ్ఛో నామ నామేన, బ్రాహ్మణో మన్తపారగూ;

పురక్ఖతో ససిస్సేహి, వసతే పబ్బతన్తరే.

౪౦. ‘‘పదుముత్తరో నామ జినో, ఆహుతీనం పటిగ్గహో;

మముద్ధరితుకామో సో, ఆగచ్ఛి మమ సన్తికం.

౪౧. ‘‘వేహాసమ్హి చఙ్కమతి, ధూపాయతి జలతే తథా;

హాసం మమం విదిత్వాన, పక్కామి పాచినాముఖో.

౪౨. ‘‘తఞ్చ అచ్ఛరియం దిస్వా, అబ్భుతం లోమహంసనం;

నాగపుప్ఫం గహేత్వాన, గతమగ్గమ్హి ఓకిరిం.

౪౩. ‘‘సతసహస్సితో కప్పే, యం పుప్ఫం ఓకిరిం అహం;

తేన చిత్తప్పసాదేన, దుగ్గతిం నుపపజ్జహం.

౪౪. ‘‘ఏకత్తింసే కప్పసతే [ఏకతింసే ఇతో కమ్మే (స్యా.)], రాజా ఆసి మహారహో;

సత్తరతనసమ్పన్నో, చక్కవత్తీ మహబ్బలో.

౪౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నాగపుప్ఫియో థేరో ఇమా గాథాయో అభాసిత్థాతి.

నాగపుప్ఫియత్థేరస్సాపదానం అట్ఠమం.

౯. పున్నాగపుప్ఫియత్థేరఅపదానం

౪౬. ‘‘కాననం వనమోగయ్హ, వసామి లుద్దకో అహం;

పున్నాగం పుప్ఫితం దిస్వా, బుద్ధసేట్ఠం అనుస్సరిం.

౪౭. ‘‘తం పుప్ఫం ఓచినిత్వాన, సుగన్ధం గన్ధితం సుభం;

థూపం కరిత్వా పులినే, బుద్ధస్స అభిరోపయిం.

౪౮. ‘‘ద్వేనవుతే ఇతో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౪౯. ‘‘ఏకమ్హి నవుతే కప్పే, ఏకో ఆసిం తమోనుదో;

సత్తరతనసమ్పన్నో, చక్కవత్తీ మహబ్బలో.

౫౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పున్నాగపుప్ఫియో థేరో ఇమా గాథాయో అభాసిత్థాతి.

పున్నాగపుప్ఫియత్థేరస్సాపదానం నవమం.

౧౦. కుముదదాయకత్థేరఅపదానం

౫౧. ‘‘హిమవన్తస్సావిదూరే, మహాజాతస్సరో అహు;

పదుముప్పలసఞ్ఛన్నో, పుణ్డరీకసమోత్థటో.

౫౨. ‘‘కుకుత్థో నామ నామేన, తత్థాసిం సకుణో తదా;

సీలవా బుద్ధిసమ్పన్నో, పుఞ్ఞాపుఞ్ఞేసు కోవిదో.

౫౩. ‘‘పదుముత్తరో లోకవిదూ, ఆహుతీనం పటిగ్గహో;

జాతస్సరస్సావిదూరే, సఞ్చరిత్థ మహాముని.

౫౪. ‘‘జలజం కుముదం ఛేత్వా, ఉపనేసిం మహేసినో;

మమ సఙ్కప్పమఞ్ఞాయ, పటిగ్గహి మహాముని.

౫౫. ‘‘తఞ్చ దానం దదిత్వాన, సుక్కమూలేన చోదితో;

కప్పానం సతసహస్సం, దుగ్గతిం నుపపజ్జహం.

౫౬. ‘‘సోళసేతో కప్పసతే, ఆసుం వరుణనామకా;

అట్ఠ ఏతే జనాధిపా, చక్కవత్తీ మహబ్బలా.

౫౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కుముదదాయకో థేరో ఇమా గాథాయో అభాసిత్థాతి.

కుముదదాయకత్థేరస్సాపదానం దసమం.

బన్ధుజీవకవగ్గో సోళసమో.