౧౭. సుపారిచరియవగ్గో

౧. సుపారిచరియత్థేరఅపదానం

౧. ‘‘పదుమో నామ నామేన, ద్విపదిన్దో నరాసభో;

పవనా అభినిక్ఖమ్మ, ధమ్మం దేసేతి చక్ఖుమా.

౨. ‘‘యక్ఖానం సమయో ఆసి, అవిదూరే మహేసినో;

యేన కిచ్చేన సమ్పత్తా, అజ్ఝాపేక్ఖింసు తావదే.

౩. ‘‘బుద్ధస్స గిరమఞ్ఞాయ, అమతస్స చ దేసనం;

పసన్నచిత్తో సుమనో, అప్ఫోటేత్వా ఉపట్ఠహిం.

౪. ‘‘సుచిణ్ణస్స ఫలం పస్స, ఉపట్ఠానస్స సత్థునో;

తింసకప్పసహస్సేసు, దుగ్గతిం నుపపజ్జహం.

౫. ‘‘ఊనతింసే కప్పసతే, సమలఙ్కతనామకో;

సత్తరతనసమ్పన్నో, చక్కవత్తీ మహబ్బలో.

౬. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా సుపారిచరియో థేరో ఇమా గాథాయో అభాసిత్థాతి.

సుపారిచరియత్థేరస్సాపదానం పఠమం.

౨. కణవేరపుప్ఫియత్థేరఅపదానం

౭. ‘‘సిద్ధత్థో నామ భగవా, లోకజేట్ఠో నరాసభో;

పురక్ఖతో సావకేహి, నగరం పటిపజ్జథ.

౮. ‘‘రఞ్ఞో అన్తేపురే ఆసిం, గోపకో అభిసమ్మతో;

పాసాదే ఉపవిట్ఠోహం, అద్దసం లోకనాయకం.

౯. ‘‘కణవేరం [కరవీరం (సక్కతానులోమం), కణవీరం (పాకత)] గహేత్వాన, భిక్ఖుసఙ్ఘే సమోకిరిం;

బుద్ధస్స విసుం కత్వాన, తతో భియ్యో సమోకిరిం.

౧౦. ‘‘చతున్నవుతితో కప్పే, యం పుప్ఫమభిపూజయిం [రోపయిం (స్యా.)];

దుగ్గతిం నాభిజానామి, బుద్ధపూజాయిదం ఫలం.

౧౧. ‘‘సత్తాసీతిమ్హితో కప్పే, చతురాసుం మహిద్ధికా;

సత్తరతనసమ్పన్నా, చక్కవత్తీ మహబ్బలా.

౧౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కణవేరపుప్ఫియో థేరో ఇమా గాథాయో అభాసిత్థాతి.

కణవేరపుప్ఫియత్థేరస్సాపదానం దుతియం.

౩. ఖజ్జకదాయకత్థేరఅపదానం

౧౩. ‘‘తిస్సస్స ఖో భగవతో, పుబ్బే ఫలమదాసహం;

నాళికేరఞ్చ పాదాసిం, ఖజ్జకం అభిసమ్మతం.

౧౪. ‘‘బుద్ధస్స తమహం దత్వా, తిస్సస్స తు మహేసినో;

మోదామహం కామకామీ, ఉపపజ్జిం [కామకారీ, ఉపపజ్జం (సీ.)] యమిచ్ఛకం [సబ్బత్థపి ఏవమేవ దిస్సతి].

౧౫. ‘‘ద్వేనవుతే ఇతో కప్పే, యం దానమదదిం తదా;

దుగ్గతిం నాభిజానామి, ఫలదానస్సిదం ఫలం.

౧౬. ‘‘ఇతో తేరసకప్పమ్హి, రాజా ఇన్దసమో అహు;

సత్తరతనసమ్పన్నో, చక్కవత్తీ మహబ్బలో.

౧౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఖజ్జకదాయకో థేరో ఇమా గాథాయో అభాసిత్థాతి.

ఖజ్జకదాయకత్థేరస్సాపదానం తతియం.

౪. దేసపూజకత్థేరఅపదానం

౧౮. ‘‘అత్థదస్సీ తు భగవా, లోకజేట్ఠో నరాసభో;

అబ్భుగ్గన్త్వాన వేహాసం, గచ్ఛతే అనిలఞ్జసే.

౧౯. ‘‘యమ్హి దేసే ఠితో సత్థా, అబ్భుగ్గచ్ఛి మహాముని;

తాహం దేసం అపూజేసిం, పసన్నో సేహి పాణిభి.

౨౦. ‘‘అట్ఠారసే కప్పసతే, అద్దసం యం మహామునిం;

దుగ్గతిం నాభిజానామి, దేసపూజాయిదం ఫలం.

౨౧. ‘‘ఏకాదసే కప్పసతే, గోసుజాతసనామకో;

సత్తరతనసమ్పన్నో, చక్కవత్తీ మహబ్బలో.

౨౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా దేసపూజకో థేరో ఇమా గాథాయో అభాసిత్థాతి.

దేసపూజకత్థేరస్సాపదానం చతుత్థం.

౫. కణికారఛత్తియత్థేరఅపదానం

౨౩. ‘‘వేస్సభూ నామ సమ్బుద్ధో, లోకజేట్ఠో నరాసభో;

దివావిహారాయ ముని, ఓగాహయి మహావనం.

౨౪. ‘‘కణికారం ఓచినిత్వా, ఛత్తం కత్వానహం తదా;

పుప్ఫచ్ఛదనం కత్వాన, బుద్ధస్స అభిరోపయిం.

౨౫. ‘‘ఏకత్తింసే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౨౬. ‘‘ఇతో వీసతికప్పమ్హి, సోణ్ణాభా అట్ఠ ఖత్తియా;

సత్తరతనసమ్పన్నా, చక్కవత్తీ మహబ్బలా.

౨౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కణికారఛత్తియో థేరో ఇమా గాథాయో అభాసిత్థాతి.

కణికారఛత్తియత్థేరస్సాపదానం పఞ్చమం.

౬. సప్పిదాయకత్థేరఅపదానం

౨౮. ‘‘ఫుస్సో నామాసి [నామాథ (సీ.)] భగవా, ఆహుతీనం పటిగ్గహో;

గచ్ఛతే వీథియం వీరో, నిబ్బాపేన్తో మహాజనం.

౨౯. ‘‘అనుపుబ్బేన భగవా, ఆగచ్ఛి మమ సన్తికం;

తతో తం [తతోహం (సీ. స్యా.)] పత్తం పగ్గయ్హ, సప్పితేలమదాసహం.

౩౦. ‘‘ద్వేనవుతే ఇతో కప్పే, యం సప్పిమదదిం తదా;

దుగ్గతిం నాభిజానామి, సప్పిదానస్సిదం ఫలం.

౩౧. ‘‘ఛప్పఞ్ఞాసే ఇతో కప్పే, ఏకో ఆసి సమోదకో;

సత్తరతనసమ్పన్నో, చక్కవత్తీ మహబ్బలో.

౩౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సప్పిదాయకో థేరో ఇమా గాథాయో అభాసిత్థాతి.

సప్పిదాయకత్థేరస్సాపదానం ఛట్ఠం.

౭. యూథికపుప్ఫియత్థేరఅపదానం

౩౩. ‘‘చన్దభాగానదీతీరే, అనుసోతం వజామహం;

సయమ్భుం అద్దసం తత్థ, సాలరాజంవ ఫుల్లితం.

౩౪. ‘‘పుప్ఫం యూథికమాదాయ, ఉపగచ్ఛిం మహామునిం;

పసన్నచిత్తో సుమనో, బుద్ధస్స అభిరోపయిం.

౩౫. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౩౬. ‘‘సత్తసట్ఠిమ్హితో కప్పే, ఏకో సాముద్ధరో అహు;

సత్తరతనసమ్పన్నో, చక్కవత్తీ మహబ్బలో.

౩౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా యూథికపుప్ఫియో థేరో ఇమా గాథాయో అభాసిత్థాతి.

యూథికపుప్ఫియత్థేరస్సాపదానం సత్తమం.

౮. దుస్సదాయకత్థేరఅపదానం

౩౮. ‘‘తివరాయం పురే రమ్మే, రాజపుత్తోసహం [రాజపుత్తో అహం (సీ. స్యా.)] తదా;

పణ్ణాకారం లభిత్వాన, ఉపసన్తస్సదాసహం.

౩౯. ‘‘అధివాసేసి భగవా, వత్థం [నవం (క.)] హత్థేన ఆమసి;

సిద్ధత్థో అధివాసేత్వా, వేహాసం నభముగ్గమి.

౪౦. ‘‘బుద్ధస్స గచ్ఛమానస్స, దుస్సా ధావన్తి పచ్ఛతో;

తత్థ చిత్తం పసాదేసిం, బుద్ధో నో అగ్గపుగ్గలో.

౪౧. ‘‘చతున్నవుతితో కప్పే, యం దుస్సమదదిం తదా;

దుగ్గతిం నాభిజానామి, దుస్సదానస్సిదం ఫలం.

౪౨. ‘‘సత్తసట్ఠిమ్హితో కప్పే, చక్కవత్తీ తదా అహు;

పరిసుద్ధోతి నామేన, మనుజిన్దో మహబ్బలో.

౪౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా దుస్సదాయకో థేరో ఇమా గాథాయో అభాసిత్థాతి.

దుస్సదాయకత్థేరస్సాపదానం అట్ఠమం.

౯. సమాదపకత్థేరఅపదానం

౪౪. ‘‘నగరే బన్ధుమతియా, మహాపూగగణో అహు;

తేసాహం పవరో ఆసిం, మమ బద్ధచరా [పట్ఠచరా (స్యా.)] చ తే.

౪౫. ‘‘సబ్బే తే సన్నిపాతేత్వా, పుఞ్ఞకమ్మే సమాదయిం;

మాళం కస్సామ సఙ్ఘస్స, పుఞ్ఞక్ఖేత్తం అనుత్తరం.

౪౬. ‘‘సాధూతి తే పటిస్సుత్వా, మమ ఛన్దవసానుగా;

నిట్ఠాపేత్వా చ తం మాళం, విపస్సిస్స అదమ్హసే.

౪౭. ‘‘ఏకనవుతితో కప్పే, యం మాళమదదిం తదా;

దుగ్గతిం నాభిజానామి, మాళదానస్సిదం ఫలం.

౪౮. ‘‘ఏకూనసత్తతికప్పే [ఏకూనసట్ఠికప్పమ్హి (సీ. స్యా.)],

ఏకో ఆసి జనాధిపో.

ఆదేయ్యో నామ నామేన, చక్కవత్తీ మహబ్బలో.

౪౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సమాదపకో థేరో ఇమా గాథాయో అభాసిత్థాతి.

సమాదపకత్థేరస్సాపదానం నవమం.

౧౦. పఞ్చఙ్గులియత్థేరఅపదానం

౫౦. ‘‘తిస్సో నామాసి భగవా, లోకజేట్ఠో నరాసభో;

పవిసతి గన్ధకుటిం, విహారకుసలో ముని.

౫౧. ‘‘సుగన్ధమాలమాదాయ, అగమాసిం జినన్తికం;

అపసద్దో చ సమ్బుద్ధే, పఞ్చఙ్గులిమదాసహం.

౫౨. ‘‘ద్వేనవుతే ఇతో కప్పే, యం గన్ధమభిరోపయిం;

దుగ్గతిం నాభిజానామి, పఞ్చఙ్గులిస్సిదం [పఞ్చఙ్గులియిదం (సీ.)] ఫలం.

౫౩. ‘‘ద్వేసత్తతిమ్హితో కప్పే, రాజా ఆసిం సయమ్పభో;

సత్తరతనసమ్పన్నో, చక్కవత్తీ మహబ్బలో.

౫౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పఞ్చఙ్గులియో థేరో ఇమా గాథాయో అభాసిత్థాతి;

పఞ్చఙ్గులియత్థేరస్సాపదానం దసమం.

సుపారిచరియవగ్గో సత్తరసమో.