౧౮. కుముదవగ్గో

౧. కుముదమాలియత్థేరఅపదానం

౧. ‘‘పబ్బతే హిమవన్తమ్హి, మహాజాతస్సరో అహు;

తత్థజో రక్ఖసో ఆసిం, ఘోరరూపో మహబ్బలో.

౨. ‘‘కుముదం పుప్ఫతే తత్థ, చక్కమత్తాని జాయరే;

ఓచినామి చ తం పుప్ఫం, బలినో సమితిం తదా.

౩. ‘‘అత్థదస్సీ తు భగవా, ద్విపదిన్దో నరాసభో;

పుప్ఫసఙ్కోచితం [పుప్ఫం సఙ్కోచితం (సీ. స్యా.), పుప్ఫం సమోచితం (?)] దిస్వా, ఆగచ్ఛి మమ సన్తికం.

౪. ‘‘ఉపాగతఞ్చ సమ్బుద్ధం, దేవదేవం నరాసభం;

సబ్బఞ్చ పుప్ఫం పగ్గయ్హ, బుద్ధస్స అభిరోపయిం.

౫. ‘‘యావతా హిమవన్తన్తా, పరిసా సా [హిమవన్తస్మిం, యావ మాలా (స్యా.)] తదా అహు;

తావచ్ఛదనసమ్పన్నో, అగమాసి తథాగతో.

౬. ‘‘అట్ఠారసే కప్పసతే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౭. ‘‘ఇతో పన్నరసే కప్పే, సత్తాహేసుం జనాధిపా;

సహస్సరథనామా తే, చక్కవత్తీ మహబ్బలా.

౮. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా కుముదమాలియో థేరో ఇమా గాథాయో అభాసిత్థాతి.

కుముదమాలియత్థేరస్సాపదానం పఠమం.

౨. నిస్సేణిదాయకత్థేరఅపదానం

౯. ‘‘కోణ్డఞ్ఞస్స భగవతో, లోకజేట్ఠస్స తాదినో;

ఆరోహత్థాయ పాసాదం, నిస్సేణీ కారితా మయా.

౧౦. ‘‘తేన చిత్తప్పసాదేన, అనుభోత్వాన సమ్పదా;

ధారేమి అన్తిమం దేహం, సమ్మాసమ్బుద్ధసాసనే.

౧౧. ‘‘ఏకత్తింసమ్హి కప్పానం, సహస్సమ్హి తయో అహుం [మహా (సీ. స్యా.)];

సమ్బహులా నామ రాజానో, చక్కవత్తీ మహబ్బలా.

౧౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నిస్సేణిదాయకో థేరో ఇమా గాథాయో అభాసిత్థాతి.

నిస్సేణిదాయకత్థేరస్సాపదానం దుతియం.

౩. రత్తిపుప్ఫియత్థేరఅపదానం

౧౩. ‘‘మిగలుద్దో పురే ఆసిం, అరఞ్ఞే కాననే అహం;

విపస్సిం అద్దసం బుద్ధం, దేవదేవం నరాసభం.

౧౪. ‘‘రత్తికం పుప్ఫితం దిస్వా, కుటజం ధరణీరుహం;

సమూలం పగ్గహేత్వాన, ఉపనేసిం మహేసినో.

౧౫. ‘‘ఏకనవుతితో కప్పే, యం పుప్ఫమభిరోపయిం;

దుగ్గతిం నాభిజానామి, పుప్ఫదానస్సిదం ఫలం.

౧౬. ‘‘ఇతో చ అట్ఠమే కప్పే, సుప్పసన్నసనామకో;

సత్తరతనసమ్పన్నో, రాజాహోసిం మహబ్బలో.

౧౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా రత్తిపుప్ఫియో థేరో ఇమా గాథాయో అభాసిత్థాతి.

రత్తిపుప్ఫియత్థేరస్సాపదానం తతియం.

౪. ఉదపానదాయకత్థేరఅపదానం

౧౮. ‘‘విపస్సినో భగవతో, ఉదపానో కతో మయా;

పిణ్డపాతఞ్చ దత్వాన [గహేత్వాన (స్యా.)], నియ్యాదేసిమహం తదా.

౧౯. ‘‘ఏకనవుతితో కప్పే, యం కమ్మమకరిం తదా;

దుగ్గతిం నాభిజానామి, ఉదపానస్సిదం ఫలం.

౨౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉదపానదాయకో థేరో ఇమా గాథాయో అభాసిత్థాతి.

ఉదపానదాయకత్థేరస్సాపదానం చతుత్థం.

౫. సీహాసనదాయకత్థేరఅపదానం

౨౧. ‘‘నిబ్బుతే లోకనాథమ్హి, పదుముత్తరనాయకే;

పసన్నచిత్తో సుమనో, సీహాసనమదాసహం.

౨౨. ‘‘బహూహి గన్ధమాలేహి, దిట్ఠధమ్మసుఖావహే;

తత్థ పూజఞ్చ కత్వాన, నిబ్బాయతి బహుజ్జనో.

౨౩. ‘‘పసన్నచిత్తో సుమనో, వన్దిత్వా బోధిముత్తమం;

కప్పానం సతసహస్సం, దుగ్గతిం నుపపజ్జహం.

౨౪. ‘‘పన్నరససహస్సమ్హి, కప్పానం అట్ఠ ఆసు తే [అట్ఠ ఆసయుం (క.)];

సిలుచ్చయసనామా చ, రాజానో చక్కవత్తినో.

౨౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సీహాసనదాయకో థేరో ఇమా గాథాయో అభాసిత్థాతి;

సీహాసనదాయకత్థేరస్సాపదానం పఞ్చమం.

౬. మగ్గదత్తికత్థేరఅపదానం

౨౬. ‘‘అనోమదస్సీ భగవా, ద్విపదిన్దో నరాసభో;

దిట్ఠధమ్మసుఖత్థాయ, అబ్భోకాసమ్హి చఙ్కమి.

౨౭. ‘‘ఉద్ధతే పాదే పుప్ఫాని, సోభం ముద్ధని తిట్ఠరే;

పసన్నచిత్తో సుమనో, వన్దిత్వా పుప్ఫమోకిరిం.

౨౮. ‘‘వీసకప్పసహస్సమ్హి, ఇతో పఞ్చ జనా అహుం;

పుప్ఫచ్ఛదనియా నామ, చక్కవత్తీ మహబ్బలా.

౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మగ్గదత్తికో థేరో ఇమా గాథాయో అభాసిత్థాతి.

మగ్గదత్తికత్థేరస్సాపదానం ఛట్ఠం.

౭. ఏకదీపియత్థేరఅపదానం

౩౦. ‘‘పదుముత్తరస్స మునినో, సళలే బోధిముత్తమే;

పసన్నచిత్తో సుమనో, ఏకదీపం అదాసహం.

౩౧. ‘‘భవే నిబ్బత్తమానమ్హి, నిబ్బత్తే పుఞ్ఞసఞ్చయే;

దుగ్గతిం నాభిజానామి, దీపదానస్సిదం ఫలం.

౩౨. ‘‘సోళసే కప్పసహస్సే, ఇతో తే చతురో జనా;

చన్దాభా నామ నామేన, చక్కవత్తీ మహబ్బలా.

౩౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఏకదీపియో థేరో ఇమా గాథాయో అభాసిత్థాతి.

ఏకదీపియత్థేరస్సాపదానం సత్తమం.

నవమం భాణవారం.

౮. మణిపూజకత్థేరఅపదానం

౩౪. ‘‘ఓరేన హిమవన్తస్స, నదికా సమ్పవత్తథ;

తస్సా చానుపఖేత్తమ్హి, సయమ్భూ వసతే తదా.

౩౫. ‘‘మణిం పగ్గయ్హ పల్లఙ్కం, సాధుచిత్తం మనోరమం;

పసన్నచిత్తో సుమనో, బుద్ధస్స అభిరోపయిం.

౩౬. ‘‘చతున్నవుతితో కప్పే, యం మణిం అభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౩౭. ‘‘ఇతో చ ద్వాదసే కప్పే, సతరంసీసనామకా;

అట్ఠ తే ఆసుం రాజానో, చక్కవత్తీ మహబ్బలా.

౩౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మణిపూజకో థేరో ఇమా గాథాయో అభాసిత్థాతి.

మణిపూజకత్థేరస్సాపదానం అట్ఠమం.

౯. తికిచ్ఛకత్థేరఅపదానం

౩౯. ‘‘నగరే బన్ధుమతియా, వేజ్జో ఆసిం సుసిక్ఖితో;

ఆతురానం సదుక్ఖానం, మహాజనసుఖావహో.

౪౦. ‘‘బ్యాధితం సమణం దిస్వా, సీలవన్తం మహాజుతిం;

పసన్నచిత్తో సుమనో, భేసజ్జమదదిం తదా.

౪౧. ‘‘అరోగో ఆసి తేనేవ, సమణో సంవుతిన్ద్రియో;

అసోకో నామ నామేన, ఉపట్ఠాకో విపస్సినో.

౪౨. ‘‘ఏకనవుతితో కప్పే, యం ఓసధమదాసహం;

దుగ్గతిం నాభిజానామి, భేసజ్జస్స ఇదం ఫలం.

౪౩. ‘‘ఇతో చ అట్ఠమే కప్పే, సబ్బోసధసనామకో;

సత్తరతనసమ్పన్నో, చక్కవత్తీ మహబ్బలో.

౪౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తికిచ్ఛకో థేరో ఇమా గాథాయో అభాసిత్థాతి.

తికిచ్ఛకత్థేరస్సాపదానం నవమం.

౧౦. సఙ్ఘుపట్ఠాకత్థేరఅపదానం

౪౫. ‘‘వేస్సభుమ్హి భగవతి, అహోసారామికో అహం;

పసన్నచిత్తో సుమనో, ఉపట్ఠిం సఙ్ఘముత్తమం.

౪౬. ‘‘ఏకత్తింసే ఇతో కప్పే, యం కమ్మమకరిం తదా;

దుగ్గతిం నాభిజానామి, ఉపట్ఠానస్సిదం ఫలం.

౪౭. ‘‘ఇతో తే సత్తమే కప్పే, సత్తేవాసుం సమోదకా;

సత్తరతనసమ్పన్నా, చక్కవత్తీ మహబ్బలా.

౪౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సఙ్ఘుపట్ఠాకో థేరో ఇమా గాథాయో అభాసిత్థాతి.

సఙ్ఘుపట్ఠాకత్థేరస్సాపదానం దసమం.

కుముదవగ్గో అట్ఠారసమో.