౯. సాలపుప్ఫదాయకత్థేరఅపదానం

౬౦. ‘‘మిగరాజా తదా ఆసిం, అభిజాతో సుకేసరీ;

గిరిదుగ్గం గవేసన్తో, అద్దసం లోకనాయకం.

౬౧. ‘‘అయం ను ఖో మహావీరో, నిబ్బాపేతి మహాజనం;

యంనూనాహం ఉపాసేయ్యం, దేవదేవం నరాసభం.

౬౨. ‘‘సాఖం సాలస్స భఞ్జిత్వా, సకోసం పుప్ఫమాహరిం;

ఉపగన్త్వాన సమ్బుద్ధం, అదాసిం పుప్ఫముత్తమం.

౬౩. ‘‘ఏకనవుతితో కప్పే, యం పుప్ఫమభిరోపయిం;

దుగ్గతిం నాభిజానామి, పుప్ఫదానస్సిదం ఫలం.

౬౪. ‘‘ఇతో చ నవమే కప్పే, విరోచనసనామకా;

తయో ఆసింసు రాజానో, చక్కవత్తీ మహబ్బలా.

౬౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సాలపుప్ఫదాయకో థేరో ఇమా గాథాయో అభాసిత్థాతి.

సాలపుప్ఫదాయకత్థేరస్సాపదానం నవమం.