౧౪. సోభితవగ్గో
౧. సోభితత్థేరఅపదానం
౧. ‘‘పదుముత్తరో నామ జినో, లోకజేట్ఠో నరాసభో;
మహతో జనకాయస్స, దేసేతి అమతం పదం.
౨. ‘‘తస్సాహం వచనం సుత్వా, వాచాసభిముదీరితం [వాచాసభిముదీరయిం (?)];
అఞ్జలిం పగ్గహేత్వాన, ఏకగ్గో ఆసహం తదా.
౩. ‘‘యథా సముద్దో ఉదధీనమగ్గో, నేరూ నగానం పవరో సిలుచ్చయో;
తథేవ యే చిత్తవసేన వత్తరే, న బుద్ధఞాణస్స కలం ఉపేన్తి తే.
౪. ‘‘ధమ్మవిధిం [ధమ్మే విధిం (సీ.)] ఠపేత్వాన, బుద్ధో కారుణికో ఇసి;
భిక్ఖుసఙ్ఘే నిసీదిత్వా, ఇమా గాథా అభాసథ.
౫. ‘‘‘యో సో ఞాణం పకిత్తేసి, బుద్ధమ్హి లోకనాయకే;
కప్పానం సతసహస్సం, దుగ్గతిం న గమిస్సతి.
౬. ‘‘‘కిలేసే ఝాపయిత్వాన, ఏకగ్గో సుసమాహితో;
సోభితో నామ నామేన, హేస్సతి సత్థు సావకో’.
౭. ‘‘పఞ్ఞాసే కప్పసహస్సే, సత్తేవాసుం యసుగ్గతా [సముగ్గతా (స్యా.)];
సత్తరతనసమ్పన్నా, చక్కవత్తీ మహబ్బలా.
౮. ‘‘కిలేసా ఝాపితా మయ్హం, భవా సబ్బే సమూహతా;
తిస్సో విజ్జా అనుప్పత్తా, కతం బుద్ధస్స సాసనం.
౯. ‘‘పటిసమ్భిదా చతస్సో, విమోక్ఖాపి చ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనం’’.
ఇత్థం సుదం ఆయస్మా సోభితో థేరో ఇమా గాథాయో అభాసిత్థాతి.
సోభితత్థేరస్సాపదానం పఠమం.
౨. సుదస్సనత్థేరఅపదానం
౧౦. ‘‘వినతా నదియా [విత్థతాయ నదియా (స్యా.)] తీరే, పిలక్ఖు [పిలక్ఖో (సీ. థేరగాథా అట్ఠ.)] ఫలితో అహు;
తాహం రుక్ఖం గవేసన్తో, అద్దసం లోకనాయకం.
౧౧. ‘‘కేతకం పుప్ఫితం దిస్వా, వణ్టే ఛేత్వానహం తదా;
బుద్ధస్స అభిరోపేసిం, సిఖినో లోకబన్ధునో.
౧౨. ‘‘యేన ఞాణేన పత్తోసి, అచ్చుతం అమతం పదం;
తం ఞాణం అభిపూజేమి, బుద్ధసేట్ఠ మహాముని.
౧౩. ‘‘ఞాణమ్హి పూజం కత్వాన, పిలక్ఖుమద్దసం అహం;
పటిలద్ధోమ్హి తం పఞ్ఞం [తం సఞ్ఞం (స్యా.), తం పుఞ్ఞం (క.)], ఞాణపూజాయిదం ఫలం.
౧౪. ‘‘ఏకత్తింసే ఇతో కప్పే, యం పుప్ఫమభిరోపయిం;
దుగ్గతిం నాభిజానామి, ఞాణపూజాయిదం ఫలం.
౧౫. ‘‘ఇతో తేరసకప్పమ్హి, ద్వాదసాసుం ఫలుగ్గతా;
సత్తరతనసమ్పన్నా, చక్కవత్తీ మహప్ఫలా.
౧౬. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా సుదస్సనో థేరో ఇమా గాథాయో అభాసిత్థాతి.
సుదస్సనత్థేరస్సాపదానం దుతియం.
౩. చన్దనపూజనకత్థేరఅపదానం
౧౭. ‘‘చన్దభాగానదీతీరే, అహోసిం కిన్నరో తదా;
పుప్ఫభక్ఖో చహం ఆసిం, పుప్ఫానివసనో తథా [పుప్ఫానం వసనో అహం (స్యా.)].
౧౮. ‘‘అత్థదస్సీ తు భగవా, లోకజేట్ఠో నరాసభో;
విపినగ్గేన నియ్యాసి, హంసరాజావ అమ్బరే.
౧౯. ‘‘నమో తే పురిసాజఞ్ఞ, చిత్తం తే సువిసోధితం;
పసన్నముఖవణ్ణోసి, విప్పసన్నముఖిన్ద్రియో.
౨౦. ‘‘ఓరోహిత్వాన ఆకాసా, భూరిపఞ్ఞో సుమేధసో;
సఙ్ఘాటిం పత్థరిత్వాన, పల్లఙ్కేన ఉపావిసి.
౨౧. ‘‘విలీనం చన్దనాదాయ, అగమాసిం జినన్తికం;
పసన్నచిత్తో సుమనో, బుద్ధస్స అభిరోపయిం.
౨౨. ‘‘అభివాదేత్వాన సమ్బుద్ధం, లోకజేట్ఠం నరాసభం;
పామోజ్జం జనయిత్వాన, పక్కామిం ఉత్తరాముఖో.
౨౩. ‘‘అట్ఠారసే కప్పసతే, చన్దనం యం అపూజయిం;
దుగ్గతిం నాభిజానామి, బుద్ధపూజాయిదం ఫలం.
౨౪. ‘‘చతుద్దసే కప్పసతే, ఇతో ఆసింసు తే తయో;
రోహణీ నామ [రోహితా నామ (సీ.), రోహిణీ నామ (స్యా.)] నామేన, చక్కవత్తీ మహబ్బలా.
౨౫. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా చన్దనపూజనకో థేరో ఇమా గాథాయో అభాసిత్థాతి;
చన్దనపూజనకత్థేరస్సాపదానం తతియం.
అట్ఠమభాణవారం.
౪. పుప్ఫచ్ఛదనియత్థేరఅపదానం
౨౬. ‘‘సునన్దో నామ నామేన, బ్రాహ్మణో మన్తపారగూ;
అజ్ఝాయకో యాచయోగో, వాజపేయ్యం అయాజయి.
౨౭. ‘‘పదుముత్తరో లోకవిదూ, అగ్గో కారుణికో ఇసి;
జనతం అనుకమ్పన్తో, అమ్బరే చఙ్కమీ తదా.
౨౮. ‘‘చఙ్కమిత్వాన సమ్బుద్ధో, సబ్బఞ్ఞూ లోకనాయకో;
మేత్తాయ అఫరి సత్తే, అప్పమాణే [అప్పమాణం (సీ. స్యా.)] నిరూపధి.
౨౯. ‘‘వణ్టే ఛేత్వాన పుప్ఫాని, బ్రాహ్మణో మన్తపారగూ;
సబ్బే సిస్సే సమానేత్వా, ఆకాసే ఉక్ఖిపాపయి.
౩౦. ‘‘యావతా నగరం ఆసి, పుప్ఫానం ఛదనం తదా;
బుద్ధస్స ఆనుభావేన, సత్తాహం న విగచ్ఛథ.
౩౧. ‘‘తేనేవ సుక్కమూలేన, అనుభోత్వాన సమ్పదా;
సబ్బాసవే పరిఞ్ఞాయ, తిణ్ణో లోకే విసత్తికం.
౩౨. ‘‘ఏకారసే కప్పసతే, పఞ్చతింసాసు ఖత్తియా;
అమ్బరంససనామా తే, చక్కవత్తీ మహబ్బలా.
౩౩. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా పుప్ఫచ్ఛదనియో థేరో ఇమా గాథాయో అభాసిత్థాతి.
పుప్ఫచ్ఛదనియత్థేరస్సాపదానం చతుత్థం.
౫. రహోసఞ్ఞకత్థేరఅపదానం
౩౪. ‘‘హిమవన్తస్సావిదూరే, వసభో నామ పబ్బతో;
తస్మిం పబ్బతపాదమ్హి, అస్సమో ఆసి మాపితో.
౩౫. ‘‘తీణి సిస్ససహస్సాని, వాచేసిం బ్రాహ్మణో [బ్రాహ్మణే (సీ.)] తదా;
సంహరిత్వాన [సంసావిత్వాన (స్యా.)] తే సిస్సే, ఏకమన్తం ఉపావిసిం.
౩౬. ‘‘ఏకమన్తం నిసీదిత్వా, బ్రాహ్మణో మన్తపారగూ;
బుద్ధవేదం గవేసన్తో [పవేసన్తో (క.)], ఞాణే చిత్తం పసాదయిం.
౩౭. ‘‘తత్థ చిత్తం పసాదేత్వా, నిసీదిం పణ్ణసన్థరే;
పల్లఙ్కం ఆభుజిత్వాన, తత్థ కాలఙ్కతో అహం.
౩౮. ‘‘ఏకత్తింసే ఇతో కప్పే, యం సఞ్ఞమలభిం తదా;
దుగ్గతిం నాభిజానామి, ఞాణసఞ్ఞాయిదం ఫలం.
౩౯. ‘‘సత్తవీసతికప్పమ్హి, రాజా సిరిధరో అహు;
సత్తరతనసమ్పన్నో, చక్కవత్తీ మహబ్బలో.
౪౦. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా రహోసఞ్ఞకో థేరో ఇమా గాథాయో అభాసిత్థాతి.
రహోసఞ్ఞకత్థేరస్సాపదానం పఞ్చమం.
౬. చమ్పకపుప్ఫియత్థేరఅపదానం
౪౧. ‘‘కణికారంవ జోతన్తం, నిసిన్నం పబ్బతన్తరే;
ఓభాసేన్తం దిసా సబ్బా, ఓసధిం వియ తారకం [ఓసధీ వియ తారకా (క.)].
౪౨. ‘‘తయో మాణవకా ఆసుం, సకే సిప్పే సుసిక్ఖితా;
ఖారిభారం గహేత్వాన, అన్వేన్తి మమ పచ్ఛతో.
౪౩. ‘‘పుటకే సత్త పుప్ఫాని, నిక్ఖిత్తాని తపస్సినా;
గహేత్వా తాని ఞాణమ్హి, వేస్సభుస్సాభిరోపయిం.
౪౪. ‘‘ఏకత్తింసే ఇతో కప్పే, యం పుప్ఫమభిరోపయిం;
దుగ్గతిం నాభిజానామి, ఞాణపూజాయిదం ఫలం.
౪౫. ‘‘ఏకూనతింసకప్పమ్హి, విపులాభ [విహతాభా (స్యా.)] సనామకో;
సత్తరతనసమ్పన్నో, చక్కవత్తీ [రాజా హోసి (క.)] మహబ్బలో.
౪౬. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా చమ్పకపుప్ఫియో థేరో ఇమా గాథాయో అభాసిత్థాతి;
చమ్పకపుప్ఫియత్థేరస్సాపదానం ఛట్ఠం.
౭. అత్థసన్దస్సకత్థేరఅపదానం
౪౭. ‘‘విసాలమాళే ఆసీనో, అద్దసం లోకనాయకం;
ఖీణాసవం బలప్పత్తం, భిక్ఖుసఙ్ఘపురక్ఖతం.
౪౮. ‘‘సతసహస్సా తేవిజ్జా, ఛళభిఞ్ఞా మహిద్ధికా;
పరివారేన్తి సమ్బుద్ధం, కో దిస్వా నప్పసీదతి.
౪౯. ‘‘ఞాణే ఉపనిధా యస్స, న విజ్జతి సదేవకే;
అనన్తఞాణం సమ్బుద్ధం, కో దిస్వా నప్పసీదతి.
౫౦. ‘‘ధమ్మకాయఞ్చ దీపేన్తం, కేవలం రతనాకరం;
వికప్పేతుం [వికోపేతుం (సీ. స్యా.)] న సక్కోన్తి, కో దిస్వా నప్పసీదతి.
౫౧. ‘‘ఇమాహి తీహి గాథాహి, నారదోవ్హయవచ్ఛలో [సరగచ్ఛియో (సీ.), పురగచ్ఛియో (స్యా.)];
పదుముత్తరం థవిత్వాన, సమ్బుద్ధం అపరాజితం.
౫౨. ‘‘తేన చిత్తప్పసాదేన, బుద్ధసన్థవనేన చ;
కప్పానం సతసహస్సం, దుగ్గతిం, నుపపజ్జహం.
౫౩. ‘‘ఇతో తింసకప్పసతే, సుమిత్తో నామ ఖత్తియో;
సత్తరతనసమ్పన్నో, చక్కవత్తీ మహబ్బలో.
౫౪. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా అత్థసన్దస్సకో థేరో ఇమా గాథాయో అభాసిత్థాతి.
అత్థసన్దస్సకత్థేరస్సాపదానం సత్తమం.
౮. ఏకపసాదనియత్థేరఅపదానం
౫౫. ‘‘నారదో ఇతి మే నామం [నారదో ఇతి నామేన (స్యా. క.) ఉపరి తేవీసతిమవగ్గే పన ఛట్ఠాపదానే ‘‘మే నామం‘‘ఇచ్చేవ దిస్సతి], కేసవో ఇతి మం విదూ;
కుసలాకుసలం ఏసం, అగమం బుద్ధసన్తికం.
౫౬. ‘‘మేత్తచిత్తో కారుణికో, అత్థదస్సీ మహాముని;
అస్సాసయన్తో సత్తే సో, ధమ్మం దేసేతి చక్ఖుమా.
౫౭. ‘‘సకం చిత్తం పసాదేత్వా, సిరే కత్వాన అఞ్జలిం;
సత్థారం అభివాదేత్వా, పక్కామిం పాచినాముఖో.
౫౮. ‘‘సత్తరసే కప్పసతే, రాజా ఆసి మహీపతి;
అమిత్తతాపనో నామ, చక్కవత్తీ మహబ్బలో.
౫౯. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఏకపసాదనియో థేరో ఇమా గాథాయో అభాసిత్థాతి.
ఏకపసాదనియత్థేరస్సాపదానం అట్ఠమం.
౯. సాలపుప్ఫదాయకత్థేరఅపదానం
౬౦. ‘‘మిగరాజా తదా ఆసిం, అభిజాతో సుకేసరీ;
గిరిదుగ్గం గవేసన్తో, అద్దసం లోకనాయకం.
౬౧. ‘‘అయం ను ఖో మహావీరో, నిబ్బాపేతి మహాజనం;
యంనూనాహం ఉపాసేయ్యం, దేవదేవం నరాసభం.
౬౨. ‘‘సాఖం సాలస్స భఞ్జిత్వా, సకోసం పుప్ఫమాహరిం;
ఉపగన్త్వాన సమ్బుద్ధం, అదాసిం పుప్ఫముత్తమం.
౬౩. ‘‘ఏకనవుతితో కప్పే, యం పుప్ఫమభిరోపయిం;
దుగ్గతిం నాభిజానామి, పుప్ఫదానస్సిదం ఫలం.
౬౪. ‘‘ఇతో చ నవమే కప్పే, విరోచనసనామకా;
తయో ఆసింసు రాజానో, చక్కవత్తీ మహబ్బలా.
౬౫. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా సాలపుప్ఫదాయకో థేరో ఇమా గాథాయో అభాసిత్థాతి.