౧౫. ఛత్తవగ్గో

౧. అతిఛత్తియత్థేరఅపదానం

౧. ‘‘పరినిబ్బుతే భగవతి, అత్థదస్సీనరుత్తమే;

ఛత్తాతిఛత్తం [ఛత్తాధిఛత్తం (సీ.)] కారేత్వా, థూపమ్హి అభిరోపయిం.

౨. ‘‘కాలేన కాలమాగన్త్వా, నమస్సిం లోకనాయకం [సత్థు చేతియం (సీ.)];

పుప్ఫచ్ఛదనం కత్వాన, ఛత్తమ్హి అభిరోపయిం.

౩. ‘‘సత్తరసే కప్పసతే, దేవరజ్జమకారయిం;

మనుస్సత్తం న గచ్ఛామి, థూపపూజాయిదం ఫలం.

౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా అతిఛత్తియో [అధిఛత్తియో (సీ. స్యా.)] థేరో ఇమా గాథాయో అభాసిత్థాతి.

అతిఛత్తియత్థేరస్సాపదానం పఠమం.

౨. థమ్భారోపకత్థేరఅపదానం

౫. ‘‘నిబ్బుతే లోకనాథమ్హి, ధమ్మదస్సీనరాసభే;

ఆరోపేసిం ధజత్థమ్భం, బుద్ధసేట్ఠస్స చేతియే.

౬. ‘‘నిస్సేణిం మాపయిత్వాన, థూపసేట్ఠం సమారుహిం;

జాతిపుప్ఫం గహేత్వాన, థూపమ్హి అభిరోపయిం.

౭. ‘‘అహో బుద్ధో అహో ధమ్మో, అహో నో సత్థు సమ్పదా;

దుగ్గతిం నాభిజానామి, థూపపూజాయిదం ఫలం.

౮. ‘‘చతున్నవుతితో కప్పే, థూపసీఖసనామకా;

సోళసాసింసు రాజానో, చక్కవత్తీ మహబ్బలా.

౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా థమ్భారోపకో థేరో ఇమా గాథాయో అభాసిత్థాతి.

థమ్భారోపకత్థేరస్సాపదానం దుతియం.

౩. వేదికారకత్థేరఅపదానం

౧౦. ‘‘నిబ్బుతే లోకనాథమ్హి, పియదస్సీనరుత్తమే;

పసన్నచిత్తో సుమనో, ముత్తావేదిమకాసహం.

౧౧. ‘‘మణీహి పరివారేత్వా, అకాసిం వేదిముత్తమం;

వేదికాయ మహం కత్వా, తత్థ కాలఙ్కతో అహం.

౧౨. ‘‘యం యం యోనుపపజ్జామి, దేవత్తం అథ మానుసం;

మణీ ధారేన్తి ఆకాసే, పుఞ్ఞకమ్మస్సిదం ఫలం.

౧౩. ‘‘సోళసితో కప్పసతే, మణిప్పభాసనామకా;

ఛత్తింసాసింసు [బాత్తింసాసింసు (సీ. స్యా.)] రాజానో, చక్కవత్తీ మహబ్బలా.

౧౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వేదికారకో థేరో ఇమా గాథాయో అభాసిత్థాతి.

వేదికారకత్థేరస్సాపదానం తతియం.

౪. సపరివారియత్థేరఅపదానం

౧౫. ‘‘పదుముత్తరో నామ జినో, లోకజేట్ఠో నరాసభో;

జలిత్వా అగ్గిక్ఖన్ధోవ, సమ్బుద్ధో పరినిబ్బుతో.

౧౬. ‘‘నిబ్బుతే చ మహావీరే, థూపో విత్థారికో అహు;

దూరతోవ [అహోరత్తం (సీ.), థూపదత్తం (స్యా.)] ఉపట్ఠేన్తి, ధాతుగేహవరుత్తమే.

౧౭. ‘‘పసన్నచిత్తో సుమనో, అకం చన్దనవేదికం;

దిస్సతి థూపఖన్ధో చ [దీయతి ధూమక్ఖన్ధో చ (సీ.), దీయతి ధూపగన్ధో చ (స్యా.)], థూపానుచ్ఛవికో తదా.

౧౮. ‘‘భవే నిబ్బత్తమానమ్హి, దేవత్తే అథ మానుసే;

ఓమత్తం మే న పస్సామి, పుబ్బకమ్మస్సిదం ఫలం.

౧౯. ‘‘పఞ్చదసకప్పసతే, ఇతో అట్ఠ జనా అహుం;

సబ్బే సమత్తనామా తే, చక్కవత్తీ మహబ్బలా.

౨౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సపరివారియో థేరో ఇమా గాథాయో అభాసిత్థాతి.

సపరివారియత్థేరస్సాపదానం చతుత్థం.

౫. ఉమాపుప్ఫియత్థేరఅపదానం

౨౧. ‘‘నిబ్బుతే లోకమహితే [లోకనాథమ్హి (సీ.)], ఆహుతీనం పటిగ్గహే;

సిద్ధత్థమ్హి భగవతి, మహాథూపమహో అహు.

౨౨. ‘‘మహే పవత్తమానమ్హి, సిద్ధత్థస్స మహేసినో;

ఉమాపుప్ఫం [ఉమ్మాపుప్ఫం (సబ్బత్థ)] గహేత్వాన, థూపమ్హి అభిరోపయిం.

౨౩. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, థూపపూజాయిదం [పుప్ఫపూజాయిదం (స్యా.), బుద్ధపూజాయిదం (క.)] ఫలం.

౨౪. ‘‘ఇతో చ నవమే కప్పే, సోమదేవసనామకా;

పఞ్చాసీతిసు రాజానో, చక్కవత్తీ మహబ్బలా.

౨౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉమాపుప్ఫియో థేరో ఇమా గాథాయో అభాసిత్థాతి.

ఉమాపుప్ఫియత్థేరస్సాపదానం పఞ్చమం.

౬. అనులేపదాయకత్థేరఅపదానం

౨౬. ‘‘అనోమదస్సీమునినో, బోధివేదిమకాసహం;

సుధాయ పిణ్డం దత్వాన, పాణికమ్మం అకాసహం.

౨౭. ‘‘దిస్వా తం సుకతం కమ్మం, అనోమదస్సీ నరుత్తమో;

భిక్ఖుసఙ్ఘే ఠితో సత్థా, ఇమం గాథం అభాసథ.

౨౮. ‘‘‘ఇమినా సుధకమ్మేన, చేతనాపణిధీహి చ;

సమ్పత్తిం అనుభోత్వాన, దుక్ఖస్సన్తం కరిస్సతి’.

౨౯. ‘‘పసన్నముఖవణ్ణోమ్హి, ఏకగ్గో సుసమాహితో;

ధారేమి అన్తిమం దేహం, సమ్మాసమ్బుద్ధసాసనే.

౩౦. ‘‘ఇతో కప్పసతే ఆసిం, పరిపుణ్ణే అనూనకే [పరిపుణ్ణో అనూనకో (స్యా.)];

రాజా సబ్బఘనో నామ, చక్కవత్తీ మహబ్బలో.

౩౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అనులేపదాయకో థేరో ఇమా గాథాయో అభాసిత్థాతి.

అనులేపదాయకత్థేరస్సాపదానం ఛట్ఠం.

౭. మగ్గదాయకత్థేరఅపదానం

౩౨. ‘‘ఉత్తరిత్వాన నదికం, వనం గచ్ఛతి చక్ఖుమా;

తమద్దసాసిం సమ్బుద్ధం, సిద్ధత్థం వరలక్ఖణం.

౩౩. ‘‘కుదాల [కుద్దాల (సీ. స్యా.)] పిటకమాదాయ, సమం కత్వాన తం పథం;

సత్థారం అభివాదేత్వా, సకం చిత్తం పసాదయిం.

౩౪. ‘‘చతున్నవుతితో కప్పే, యం కమ్మమకరిం తదా;

దుగ్గతిం నాభిజానామి, మగ్గదానస్సిదం ఫలం.

౩౫. ‘‘సత్తపఞ్ఞాసకప్పమ్హి, ఏకో ఆసిం జనాధిపో;

నామేన సుప్పబుద్ధోతి, నాయకో సో నరిస్సరో.

౩౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మగ్గదాయకో థేరో ఇమా గాథాయో అభాసిత్థాతి.

మగ్గదాయకత్థేరస్సాపదానం సత్తమం.

౮. ఫలకదాయకత్థేరఅపదానం

౩౭. ‘‘యానకారో పురే ఆసిం, దారుకమ్మే సుసిక్ఖితో;

చన్దనం ఫలకం కత్వా, అదాసిం లోకబన్ధునో.

౩౮. ‘‘పభాసతి ఇదం బ్యమ్హం, సువణ్ణస్స సునిమ్మితం;

హత్థియానం అస్సయానం, దిబ్బయానం ఉపట్ఠితం.

౩౯. ‘‘పాసాదా సివికా చేవ, నిబ్బత్తన్తి యదిచ్ఛకం;

అక్ఖుబ్భం [అక్ఖోభం (సీ.)] రతనం మయ్హం, ఫలకస్స ఇదం ఫలం.

౪౦. ‘‘ఏకనవుతితో కప్పే, ఫలకం యమహం దదిం;

దుగ్గతిం నాభిజానామి, ఫలకస్స ఇదం ఫలం.

౪౧. ‘‘సత్తపఞ్ఞాసకప్పమ్హి, చతురో నిమ్మితావ్హయా;

సత్తరతనసమ్పన్నా, చక్కవత్తీ మహబ్బలా.

౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఫలకదాయకో థేరో ఇమా గాథాయో అభాసిత్థాతి.

ఫలకదాయకత్థేరస్సాపదానం అట్ఠమం.

౯. వటంసకియత్థేరఅపదానం

౪౩. ‘‘సుమేధో నామ నామేన, సయమ్భూ అపరాజితో;

వివేకమనుబ్రూహన్తో, అజ్ఝోగహి మహావనం.

౪౪. ‘‘సళలం పుప్ఫితం దిస్వా, గన్థిత్వాన [బన్ధిత్వాన (సీ.)] వటంసకం;

బుద్ధస్స అభిరోపేసిం, సమ్ముఖా లోకనాయకం.

౪౫. ‘‘తింసకప్పసహస్సమ్హి, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౪౬. ‘‘ఊనవీసే కప్పసతే, సోళసాసుం సునిమ్మితా;

సత్తరతనసమ్పన్నా, చక్కవత్తీ మహబ్బలా.

౪౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వటంసకియో థేరో ఇమా గాథాయో అభాసిత్థాతి.

వటంసకియత్థేరస్సాపదానం నవమం.

౧౦. పల్లఙ్కదాయకత్థేరఅపదానం

౪౮. ‘‘సుమేధస్స భగవతో, లోకజేట్ఠస్స తాదినో;

పల్లఙ్కో హి మయా దిన్నో, సఉత్తరసపచ్ఛదో.

౪౯. ‘‘సత్తరతనసమ్పన్నో, పల్లఙ్కో ఆసి సో తదా;

మమ సఙ్కప్పమఞ్ఞాయ, నిబ్బత్తతి సదా మమ.

౫౦. ‘‘తింసకప్పసహస్సమ్హి, పల్లఙ్కమదదిం తదా;

దుగ్గతిం నాభిజానామి, పల్లఙ్కస్స ఇదం ఫలం.

౫౧. ‘‘వీసకప్పసహస్సమ్హి, సువణ్ణాభా తయో జనా;

సత్తరతనసమ్పన్నా, చక్కవత్తీ మహబ్బలా.

౫౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పల్లఙ్కదాయకో థేరో ఇమా గాథాయో అభాసిత్థాతి.

పల్లఙ్కదాయకత్థేరస్సాపదానం దసమం.

ఛత్తవగ్గో పన్నరసమో.