౧౦. పియాలఫలదాయకత్థేరఅపదానం

౬౬. ‘‘పారావతో [పరోధకో (స్యా.)] తదా ఆసిం, పరం అనుపరోధకో;

పబ్భారే సేయ్యం కప్పేమి, అవిదూరే సిఖిసత్థునో.

౬౭. ‘‘సాయం పాతఞ్చ పస్సామి, బుద్ధం లోకగ్గనాయకం;

దేయ్యధమ్మో చ మే నత్థి, ద్విపదిన్దస్స తాదినో.

౬౮. ‘‘పియాలఫలమాదాయ, అగమం బుద్ధసన్తికం;

పటిగ్గహేసి భగవా, లోకజేట్ఠో నరాసభో.

౬౯. ‘‘తతో పరం ఉపాదాయ, పరిచారిం వినాయకం;

తేన చిత్తప్పసాదేన, తత్థ కాలఙ్కతో అహం.

౭౦. ‘‘ఏకత్తింసే ఇతో కప్పే, యం ఫలం అదదిం అహం;

దుగ్గతిం నాభిజానామి, ఫలదానస్సిదం ఫలం.

౭౧. ‘‘ఇతో పన్నరసే కప్పే, తయో ఆసుం పియాలినో;

సత్తరతనసమ్పన్నా, చక్కవత్తీ మహబ్బలా.

౭౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పియాలఫలదాయకో థేరో ఇమా గాథాయో అభాసిత్థాతి.

పియాలఫలదాయకత్థేరస్సాపదానం దసమం.

సోభితవగ్గో చుద్దసమో.