౫. రహోసఞ్ఞకత్థేరఅపదానం

౩౪. ‘‘హిమవన్తస్సావిదూరే, వసభో నామ పబ్బతో;

తస్మిం పబ్బతపాదమ్హి, అస్సమో ఆసి మాపితో.

౩౫. ‘‘తీణి సిస్ససహస్సాని, వాచేసిం బ్రాహ్మణో [బ్రాహ్మణే (సీ.)] తదా;

సంహరిత్వాన [సంసావిత్వాన (స్యా.)] తే సిస్సే, ఏకమన్తం ఉపావిసిం.

౩౬. ‘‘ఏకమన్తం నిసీదిత్వా, బ్రాహ్మణో మన్తపారగూ;

బుద్ధవేదం గవేసన్తో [పవేసన్తో (క.)], ఞాణే చిత్తం పసాదయిం.

౩౭. ‘‘తత్థ చిత్తం పసాదేత్వా, నిసీదిం పణ్ణసన్థరే;

పల్లఙ్కం ఆభుజిత్వాన, తత్థ కాలఙ్కతో అహం.

౩౮. ‘‘ఏకత్తింసే ఇతో కప్పే, యం సఞ్ఞమలభిం తదా;

దుగ్గతిం నాభిజానామి, ఞాణసఞ్ఞాయిదం ఫలం.

౩౯. ‘‘సత్తవీసతికప్పమ్హి, రాజా సిరిధరో అహు;

సత్తరతనసమ్పన్నో, చక్కవత్తీ మహబ్బలో.

౪౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా రహోసఞ్ఞకో థేరో ఇమా గాథాయో అభాసిత్థాతి.

రహోసఞ్ఞకత్థేరస్సాపదానం పఞ్చమం.