౪. పుప్ఫచ్ఛదనియత్థేరఅపదానం

౨౬. ‘‘సునన్దో నామ నామేన, బ్రాహ్మణో మన్తపారగూ;

అజ్ఝాయకో యాచయోగో, వాజపేయ్యం అయాజయి.

౨౭. ‘‘పదుముత్తరో లోకవిదూ, అగ్గో కారుణికో ఇసి;

జనతం అనుకమ్పన్తో, అమ్బరే చఙ్కమీ తదా.

౨౮. ‘‘చఙ్కమిత్వాన సమ్బుద్ధో, సబ్బఞ్ఞూ లోకనాయకో;

మేత్తాయ అఫరి సత్తే, అప్పమాణే [అప్పమాణం (సీ. స్యా.)] నిరూపధి.

౨౯. ‘‘వణ్టే ఛేత్వాన పుప్ఫాని, బ్రాహ్మణో మన్తపారగూ;

సబ్బే సిస్సే సమానేత్వా, ఆకాసే ఉక్ఖిపాపయి.

౩౦. ‘‘యావతా నగరం ఆసి, పుప్ఫానం ఛదనం తదా;

బుద్ధస్స ఆనుభావేన, సత్తాహం న విగచ్ఛథ.

౩౧. ‘‘తేనేవ సుక్కమూలేన, అనుభోత్వాన సమ్పదా;

సబ్బాసవే పరిఞ్ఞాయ, తిణ్ణో లోకే విసత్తికం.

౩౨. ‘‘ఏకారసే కప్పసతే, పఞ్చతింసాసు ఖత్తియా;

అమ్బరంససనామా తే, చక్కవత్తీ మహబ్బలా.

౩౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పుప్ఫచ్ఛదనియో థేరో ఇమా గాథాయో అభాసిత్థాతి.

పుప్ఫచ్ఛదనియత్థేరస్సాపదానం చతుత్థం.