౩. చన్దనపూజనకత్థేరఅపదానం

౧౭. ‘‘చన్దభాగానదీతీరే, అహోసిం కిన్నరో తదా;

పుప్ఫభక్ఖో చహం ఆసిం, పుప్ఫానివసనో తథా [పుప్ఫానం వసనో అహం (స్యా.)].

౧౮. ‘‘అత్థదస్సీ తు భగవా, లోకజేట్ఠో నరాసభో;

విపినగ్గేన నియ్యాసి, హంసరాజావ అమ్బరే.

౧౯. ‘‘నమో తే పురిసాజఞ్ఞ, చిత్తం తే సువిసోధితం;

పసన్నముఖవణ్ణోసి, విప్పసన్నముఖిన్ద్రియో.

౨౦. ‘‘ఓరోహిత్వాన ఆకాసా, భూరిపఞ్ఞో సుమేధసో;

సఙ్ఘాటిం పత్థరిత్వాన, పల్లఙ్కేన ఉపావిసి.

౨౧. ‘‘విలీనం చన్దనాదాయ, అగమాసిం జినన్తికం;

పసన్నచిత్తో సుమనో, బుద్ధస్స అభిరోపయిం.

౨౨. ‘‘అభివాదేత్వాన సమ్బుద్ధం, లోకజేట్ఠం నరాసభం;

పామోజ్జం జనయిత్వాన, పక్కామిం ఉత్తరాముఖో.

౨౩. ‘‘అట్ఠారసే కప్పసతే, చన్దనం యం అపూజయిం;

దుగ్గతిం నాభిజానామి, బుద్ధపూజాయిదం ఫలం.

౨౪. ‘‘చతుద్దసే కప్పసతే, ఇతో ఆసింసు తే తయో;

రోహణీ నామ [రోహితా నామ (సీ.), రోహిణీ నామ (స్యా.)] నామేన, చక్కవత్తీ మహబ్బలా.

౨౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా చన్దనపూజనకో థేరో ఇమా గాథాయో అభాసిత్థాతి;

చన్దనపూజనకత్థేరస్సాపదానం తతియం.

అట్ఠమభాణవారం.