౨. సుదస్సనత్థేరఅపదానం

౧౦. ‘‘వినతా నదియా [విత్థతాయ నదియా (స్యా.)] తీరే, పిలక్ఖు [పిలక్ఖో (సీ. థేరగాథా అట్ఠ.)] ఫలితో అహు;

తాహం రుక్ఖం గవేసన్తో, అద్దసం లోకనాయకం.

౧౧. ‘‘కేతకం పుప్ఫితం దిస్వా, వణ్టే ఛేత్వానహం తదా;

బుద్ధస్స అభిరోపేసిం, సిఖినో లోకబన్ధునో.

౧౨. ‘‘యేన ఞాణేన పత్తోసి, అచ్చుతం అమతం పదం;

తం ఞాణం అభిపూజేమి, బుద్ధసేట్ఠ మహాముని.

౧౩. ‘‘ఞాణమ్హి పూజం కత్వాన, పిలక్ఖుమద్దసం అహం;

పటిలద్ధోమ్హి తం పఞ్ఞం [తం సఞ్ఞం (స్యా.), తం పుఞ్ఞం (క.)], ఞాణపూజాయిదం ఫలం.

౧౪. ‘‘ఏకత్తింసే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, ఞాణపూజాయిదం ఫలం.

౧౫. ‘‘ఇతో తేరసకప్పమ్హి, ద్వాదసాసుం ఫలుగ్గతా;

సత్తరతనసమ్పన్నా, చక్కవత్తీ మహప్ఫలా.

౧౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సుదస్సనో థేరో ఇమా గాథాయో అభాసిత్థాతి.

సుదస్సనత్థేరస్సాపదానం దుతియం.