౧. మహాపరివారకత్థేరఅపదానం

౧. ‘‘విపస్సీ నామ భగవా, లోకజేట్ఠో నరాసభో;

అట్ఠసట్ఠిసహస్సేహి, పావిసి బన్ధుమం తదా.

౨. ‘‘నగరా అభినిక్ఖమ్మ, అగమం దీపచేతియం;

అద్దసం విరజం బుద్ధం, ఆహుతీనం పటిగ్గహం.

౩. ‘‘చుల్లాసీతిసహస్సాని, యక్ఖా మయ్హం ఉపన్తికే;

ఉపట్ఠహన్తి సక్కచ్చం [మం నిచ్చం (క.)], ఇన్దంవ తిదసా గణా.

౪. ‘‘భవనా అభినిక్ఖమ్మ, దుస్సం పగ్గయ్హహం తదా;

సిరసా అభివాదేసిం, తఞ్చాదాసిం మహేసినో.

౫. ‘‘అహో బుద్ధో అహో ధమ్మో, అహో నో సత్థు సమ్పదా;

బుద్ధస్స ఆనుభావేన, వసుధాయం పకమ్పథ.

౬. ‘‘తఞ్చ అచ్ఛరియం దిస్వా, అబ్భుతం లోమహంసనం;

బుద్ధే చిత్తం పసాదేమి, ద్విపదిన్దమ్హి తాదినే.

౭. ‘‘సోహం చిత్తం పసాదేత్వా, దుస్సం దత్వాన సత్థునో;

సరణఞ్చ ఉపాగచ్ఛిం, సామచ్చో సపరిజ్జనో.

౮. ‘‘ఏకనవుతితో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౯. ‘‘ఇతో పన్నరసే కప్పే, సోళసాసుం సువాహనా [సోళసాసింసు వాహనో (స్యా.)];

సత్తరతనసమ్పన్నా, చక్కవత్తీ మహబ్బలా.

౧౦. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా మహాపరివారకో థేరో ఇమా గాథాయో అభాసిత్థాతి.

మహాపరివారకత్థేరస్సాపదానం పఠమం.