౭. నళమాలియత్థేరఅపదానం

౩౬. ‘‘పదుముత్తరబుద్ధస్స, లోకజేట్ఠస్స తాదినో;

తిణత్థరే నిసిన్నస్స, ఉపసన్తస్స తాదినో.

౩౭. ‘‘నళమాలం గహేత్వాన, బన్ధిత్వా [బీజిత్వా (క.)] బీజనిం అహం;

బుద్ధస్స ఉపనామేసిం, ద్విపదిన్దస్స తాదినో.

౩౮. ‘‘పటిగ్గహేత్వా సబ్బఞ్ఞూ, బీజనిం లోకనాయకో;

మమ సఙ్కప్పమఞ్ఞాయ, ఇమం గాథం అభాసథ.

౩౯. ‘‘‘యథా మే కాయో నిబ్బాతి, పరిళాహో న విజ్జతి;

తథేవ తివిధగ్గీహి, చిత్తం తవ విముచ్చతు’.

౪౦. ‘‘సబ్బే దేవా సమాగచ్ఛుం, యే కేచి వననిస్సితా;

సోస్సామ బుద్ధవచనం, హాసయన్తఞ్చ దాయకం.

౪౧. ‘‘నిసిన్నో భగవా తత్థ, దేవసఙ్ఘపురక్ఖతో;

దాయకం సమ్పహంసేన్తో, ఇమా గాథా అభాసథ.

౪౨. ‘‘‘ఇమినా బీజనిదానేన, చిత్తస్స పణిధీహి చ;

సుబ్బతో నామ నామేన, చక్కవత్తీ భవిస్సతి.

౪౩. ‘‘‘తేన కమ్మావసేసేన, సుక్కమూలేన చోదితో;

మాలుతో నామ నామేన, చక్కవత్తీ భవిస్సతి’.

౪౪. ‘‘‘ఇమినా బీజనిదానేన, సమ్మానవిపులేన చ;

కప్పసతసహస్సమ్పి, దుగ్గతిం నుపపజ్జతి.

౪౫. ‘‘తింసకప్పసహస్సమ్హి, సుబ్బతా అట్ఠతింస తే;

ఏకూనతింససహస్సే, అట్ఠ మాలుతనామకా.

౪౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నళమాలియో థేరో ఇమా గాథాయో అభాసిత్థాతి.

నళమాలియత్థేరస్సాపదానం సత్తమం.

సత్తమభాణవారం.