౮. ఆసనుపట్ఠాహకత్థేరఅపదానం

౪౭. ‘‘కాననం వనమోగయ్హ, అప్పసద్దం నిరాకులం;

సీహాసనం మయా దిన్నం, అత్థదస్సిస్స తాదినో.

౪౮. ‘‘మాలాహత్థం గహేత్వాన, కత్వా చ నం పదక్ఖిణం;

సత్థారం పయిరుపాసిత్వా, పక్కామిం ఉత్తరాముఖో.

౪౯. ‘‘తేన కమ్మేన ద్విపదిన్ద, లోకజేట్ఠ నరాసభ;

సన్నిబ్బాపేమి [సన్దిట్ఠాపేమి (క.)] అత్తానం, భవా సబ్బే సమూహతా.

౫౦. ‘‘అట్ఠారసకప్పసతే, యం దానమదదిం తదా;

దుగ్గతిం నాభిజానామి, సీహాసనస్సిదం ఫలం.

౫౧. ‘‘ఇతో సత్తకప్పసతే, సన్నిబ్బాపక [సన్నిట్ఠో నామ (క.)] ఖత్తియో;

సత్తరతనసమ్పన్నో, చక్కవత్తీ మహబ్బలో.

౫౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఆసనుపట్ఠాహకో థేరో ఇమా గాథాయో అభాసిత్థాతి.

ఆసనుపట్ఠాహకత్థేరస్సాపదానం అట్ఠమం.