౮. సేనాసనదాయకత్థేరఅపదానం

౪౫. ‘‘సిద్ధత్థస్స భగవతో, అదాసిం పణ్ణసన్థరం;

సమన్తా ఉపహారఞ్చ, కుసుమం ఓకిరిం అహం.

౪౬. ‘‘పాసాదేవం గుణం రమ్మం [పాసాదే చ గుహం రమ్మం (స్యా.)], అనుభోమి మహారహం;

మహగ్ఘాని చ పుప్ఫాని, సయనేభిసవన్తి మే.

౪౭. ‘‘సయనేహం తువట్టామి, విచిత్తే పుప్ఫసన్థతే;

పుప్ఫవుట్ఠి చ సయనే, అభివస్సతి తావదే.

౪౮. ‘‘చతున్నవుతితో కప్పే, అదాసిం పణ్ణసన్థరం;

దుగ్గతిం నాభిజానామి, సన్థరస్స ఇదం ఫలం.

౪౯. ‘‘తిణసన్థరకా నామ, సత్తేతే చక్కవత్తినో;

ఇతో తే పఞ్చమే కప్పే, ఉప్పజ్జింసు జనాధిపా.

౫౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సేనాసనదాయకో థేరో ఇమా గాథాయో అభాసిత్థాతి.

సేనాసనదాయకత్థేరస్సాపదానం అట్ఠమం.