౧౦. బుద్ధుపట్ఠాకత్థేరఅపదానం

౫౬. ‘‘విపస్సిస్స భగవతో, అహోసిం సఙ్ఖధమ్మకో;

నిచ్చుపట్ఠానయుత్తోమ్హి, సుగతస్స మహేసినో.

౫౭. ‘‘ఉపట్ఠానఫలం పస్స, లోకనాథస్స తాదినో;

సట్ఠితూరియసహస్సాని, పరివారేన్తి మం సదా.

౫౮. ‘‘ఏకనవుతితో కప్పే, ఉపట్ఠహిం మహాఇసిం;

దుగ్గతిం నాభిజానామి, ఉపట్ఠానస్సిదం ఫలం.

౫౯. ‘‘చతువీసే [చతునవుతే (స్యా.)] ఇతో కప్పే, మహానిగ్ఘోసనామకా;

సోళసాసింసు రాజానో, చక్కవత్తీ మహబ్బలా.

౬౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా బుద్ధుపట్ఠాకో థేరో ఇమా గాథాయో అభాసిత్థాతి.

బుద్ధుపట్ఠాకత్థేరస్సాపదానం దసమం.

సుధావగ్గో దసమో.

తస్సుద్దానం –

సుధా సుచిన్తి చేళఞ్చ, సూచీ చ గన్ధమాలియో;

తిపుప్ఫియో మధుసేనా, వేయ్యావచ్చో చుపట్ఠకో;

సమసట్ఠి చ గాథాయో, అస్మిం వగ్గే పకిత్తితా.

అథ వగ్గుద్దానం –

బుద్ధవగ్గో హి పఠమో, సీహాసని సుభూతి చ;

కుణ్డధానో ఉపాలి చ, బీజనిసకచిన్తి చ.

నాగసమాలో తిమిరో, సుధావగ్గేన తే దస;

చతుద్దససతా గాథా, పఞ్చపఞ్ఞాసమేవ చ.

బుద్ధవగ్గదసకం.