౩-౨. మహామోగ్గల్లానత్థేరఅపదానం

౩౭౫. ‘‘అనోమదస్సీ భగవా, లోకజేట్ఠో నరాసభో;

విహాసి హిమవన్తమ్హి, దేవసఙ్ఘపురక్ఖతో.

౩౭౬. ‘‘వరుణో నామ నామేన, నాగరాజా అహం తదా;

కామరూపీ వికుబ్బామి, మహోదధినివాసహం.

౩౭౭. ‘‘సఙ్గణియం గణం హిత్వా, తూరియం పట్ఠపేసహం;

సమ్బుద్ధం పరివారేత్వా, వాదేసుం అచ్ఛరా తదా.

౩౭౮. ‘‘వజ్జమానేసు తూరేసు, దేవా తూరాని [తురియేసు, దేవా తురియాని (సీ. స్యా.)] వజ్జయుం;

ఉభిన్నం సద్దం సుత్వాన, బుద్ధోపి సమ్పబుజ్ఝథ.

౩౭౯. ‘‘నిమన్తేత్వాన సమ్బుద్ధం, సకం భవనుపాగమిం;

ఆసనం పఞ్ఞపేత్వాన, కాలమారోచయిం అహం.

౩౮౦. ‘‘ఖీణాసవసహస్సేహి, పరివుతో లోకనాయకో;

ఓభాసేన్తో దిసా సబ్బా, భవనం మే ఉపాగమి.

౩౮౧. ‘‘ఉపవిట్ఠం మహావీరం, దేవదేవం నరాసభం;

సభిక్ఖుసఙ్ఘం తప్పేసిం [సన్తప్పేసిం (స్యా.), తప్పేమి (క.)], అన్నపానేనహం తదా.

౩౮౨. ‘‘అనుమోది మహావీరో, సయమ్భూ అగ్గపుగ్గలో;

భిక్ఖుసఙ్ఘే నిసీదిత్వా, ఇమా గాథా అభాసథ.

౩౮౩. ‘‘‘యో సో [యం సో (క.)] సఙ్ఘం అపూజేసి, బుద్ధఞ్చ లోకనాయకం;

తేన చిత్తప్పసాదేన, దేవలోకం గమిస్సతి.

౩౮౪. ‘‘‘సత్తసత్తతిక్ఖత్తుఞ్చ, దేవరజ్జం కరిస్సతి;

పథబ్యా రజ్జం అట్ఠసతం, వసుధం ఆవసిస్సతి.

౩౮౫. ‘‘‘పఞ్చపఞ్ఞాసక్ఖత్తుఞ్చ, చక్కవత్తీ భవిస్సతి;

భోగా అసఙ్ఖియా తస్స, ఉప్పజ్జిస్సన్తి తావదే.

౩౮౬. ‘‘‘అపరిమేయ్యే ఇతో కప్పే, ఓక్కాకకులసమ్భవో;

గోతమో నామ గోత్తేన [నామేన (సీ.)], సత్థా లోకే భవిస్సతి.

౩౮౭. ‘‘‘నిరయా సో చవిత్వాన, మనుస్సతం గమిస్సతి;

కోలితో నామ నామేన, బ్రహ్మబన్ధు భవిస్సతి.

౩౮౮. ‘‘‘సో పచ్ఛా పబ్బజిత్వాన, కుసలమూలేన చోదితో;

గోతమస్స భగవతో, దుతియో హేస్సతి సావకో.

౩౮౯. ‘‘‘ఆరద్ధవీరియో పహితత్తో, ఇద్ధియా పారమిం గతో;

సబ్బాసవే పరిఞ్ఞాయ, నిబ్బాయిస్సతినాసవో’.

౩౯౦. ‘‘పాపమిత్తోపనిస్సాయ, కామరాగవసం గతో;

మాతరం పితరఞ్చాపి, ఘాతయిం దుట్ఠమానసో.

౩౯౧. ‘‘యం యం యోనుపపజ్జామి, నిరయం అథ మానుసం;

పాపకమ్మసమఙ్గితా, భిన్నసీసో మరామహం.

౩౯౨. ‘‘ఇదం పచ్ఛిమకం మయ్హం, చరిమో వత్తతే భవో;

ఇధాపి ఏదిసో మయ్హం, మరణకాలే భవిస్సతి.

౩౯౩. ‘‘పవివేకమనుయుత్తో, సమాధిభావనారతో;

సబ్బాసవే పరిఞ్ఞాయ, విహరామి అనాసవో.

౩౯౪. ‘‘ధరణిమ్పి సుగమ్భీరం, బహలం దుప్పధంసియం;

వామఙ్గుట్ఠేన ఖోభేయ్యం, ఇద్ధియా పారమిం గతో.

౩౯౫. ‘‘అస్మిమానం న పస్సామి, మానో మయ్హం న విజ్జతి;

సామణేరే ఉపాదాయ, గరుచిత్తం కరోమహం.

౩౯౬. ‘‘అపరిమేయ్యే ఇతో కప్పే, యం కమ్మమభినీహరిం;

తాహం భూమిమనుప్పత్తో, పత్తోమ్హి ఆసవక్ఖయం.

౩౯౭. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా మహామోగ్గల్లానో థేరో ఇమా గాథాయో అభాసిత్థాతి.

మహామోగ్గల్లానత్థేరస్సాపదానం దుతియం.