౩-౩. మహాకస్సపత్థేరఅపదానం

౩౯౮. ‘‘పదుముత్తరస్స భగవతో, లోకజేట్ఠస్స తాదినో;

నిబ్బుతే లోకనాథమ్హి, పూజం కుబ్బన్తి సత్థునో.

౩౯౯. ‘‘ఉదగ్గచిత్తా జనతా, ఆమోదితపమోదితా;

తేసు సంవేగజాతేసు, పీతి మే ఉదపజ్జథ.

౪౦౦. ‘‘ఞాతిమిత్తే సమానేత్వా, ఇదం వచనమబ్రవిం;

పరినిబ్బుతో మహావీరో, హన్ద పూజం కరోమసే.

౪౦౧. ‘‘సాధూతి తే పటిస్సుత్వా, భియ్యో హాసం జనింసు మే;

బుద్ధస్మిం లోకనాథమ్హి, కాహామ పుఞ్ఞసఞ్చయం.

౪౦౨. ‘‘అగ్ఘియం సుకతం కత్వా, సతహత్థసముగ్గతం;

దియడ్ఢహత్థపత్థటం, విమానం నభముగ్గతం.

౪౦౩. ‘‘కత్వాన హమ్మియం తత్థ, తాలపన్తీహి చిత్తితం;

సకం చిత్తం పసాదేత్వా, చేతియం పూజయుత్తమం.

౪౦౪. ‘‘అగ్గిక్ఖన్ధోవ జలితో, కింసుకో ఇవ [సాలరాజావ (సీ.)] ఫుల్లితో;

ఇన్దలట్ఠీవ ఆకాసే, ఓభాసేతి చతుద్దిసా.

౪౦౫. ‘‘తత్థ చిత్తం పసాదేత్వా, కత్వాన కుసలం బహుం;

పుబ్బకమ్మం సరిత్వాన, తిదసం ఉపపజ్జహం.

౪౦౬. ‘‘సహస్సయుత్తం హయవాహిం, దిబ్బయానమధిట్ఠితో;

ఉబ్బిద్ధం భవనం మయ్హం, సత్తభూమం సముగ్గతం.

౪౦౭. ‘‘కూటాగారసహస్సాని, సబ్బసోణ్ణమయా అహుం;

జలన్తి సకతేజేన, దిసా సబ్బా పభాసయం.

౪౦౮. ‘‘సన్తి అఞ్ఞేపి నియ్యూహా, లోహితఙ్గమయా తదా;

తేపి జోతన్తి ఆభాయ, సమన్తా చతురో దిసా.

౪౦౯. ‘‘పుఞ్ఞకమ్మాభినిబ్బత్తా, కూటాగారా సునిమ్మితా;

మణిమయాపి జోతన్తి, దిసా దస [దిసోదిసం (స్యా.)] సమన్తతో.

౪౧౦. ‘‘తేసం ఉజ్జోతమానానం, ఓభాసో విపులో అహు;

సబ్బే దేవే అభిభోమి, పుఞ్ఞకమ్మస్సిదం ఫలం.

౪౧౧. ‘‘సట్ఠికప్పసహస్సమ్హి, ఉబ్బిద్ధో నామ ఖత్తియో;

చాతురన్తో విజితావీ, పథవిం ఆవసిం అహం.

౪౧౨. ‘‘తథేవ భద్దకే కప్పే, తింసక్ఖత్తుం అహోసహం;

సకకమ్మాభిరద్ధోమ్హి, చక్కవత్తీ మహబ్బలో.

౪౧౩. ‘‘సత్తరతనసమ్పన్నో, చతుదీపమ్హి ఇస్సరో;

తత్థాపి భవనం మయ్హం, ఇన్దలట్ఠీవ ఉగ్గతం.

౪౧౪. ‘‘ఆయామతో చతుబ్బీసం, విత్థారేన చ ద్వాదస;

రమ్మణం [రమ్మకం (సీ. స్యా.)] నామ నగరం, దళ్హపాకారతోరణం.

౪౧౫. ‘‘ఆయామతో పఞ్చసతం, విత్థారేన తదడ్ఢకం;

ఆకిణ్ణం జనకాయేహి, తిదసానం పురం వియ.

౪౧౬. ‘‘యథా సూచిఘరే సూచీ, పక్ఖిత్తా పణ్ణవీసతి;

అఞ్ఞమఞ్ఞం పఘట్టేన్తి, ఆకిణ్ణం హోతి లఙ్కతం [తం తదా (సీ.), సతతా (స్యా.), సఙ్కరం (?)].

౪౧౭. ‘‘ఏవమ్పి నగరం మయ్హం, హత్థిస్సరథసంకులం;

మనుస్సేహి సదాకిణ్ణం, రమ్మణం నగరుత్తమం.

౪౧౮. ‘‘తత్థ భుత్వా పివిత్వా చ, పున దేవత్తనం గతో [పునపి దేవతఙ్గతో (క.)].

భవే పచ్ఛిమకే మయ్హం, అహోసి కులసమ్పదా.

౪౧౯. ‘‘బ్రాహ్మఞ్ఞకులసమ్భూతో, మహారతనసఞ్చయో;

అసీతికోటియో హిత్వా, హిరఞ్ఞస్సాపి పబ్బజిం.

౪౨౦. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా మహాకస్సపో థేరో ఇమా గాథాయో అభాసిత్థాతి.

మహాకస్సపత్థేరస్సాపదానం తతియం.