౩-౯. ఖదిరవనియరేవతత్థేరఅపదానం

౬౨౮. ‘‘గఙ్గా భాగీరథీ నామ, హిమవన్తా పభావితా;

కుతిత్థే నావికో ఆసిం, ఓరిమే చ తరిం [ఓరిమం చ తరే (స్యా.)] అహం.

౬౨౯. ‘‘పదుముత్తరో నాయకో, సమ్బుద్ధో ద్విపదుత్తమో;

వసీ సతసహస్సేహి, గఙ్గాతీరముపాగతో [పుబ్బే మయ్హం సుతం ఆసి,§‘‘పదుముత్తరనాయకో; వసీసతసహస్సేహి, గఙ్గాసోతం తరిస్సతి‘‘; (సీ.)].

౬౩౦. ‘‘బహూ నావా సమానేత్వా, వడ్ఢకీహి [చమ్మకేహి (క.)] సుసఙ్ఖతం;

నావాయ [నావానం (క.)] ఛదనం కత్వా, పటిమానిం నరాసభం.

౬౩౧. ‘‘ఆగన్త్వాన చ సమ్బుద్ధో, ఆరూహి తఞ్చ నావకం;

వారిమజ్ఝే ఠితో సత్థా, ఇమా గాథా అభాసథ.

౬౩౨. ‘‘‘యో సో తారేసి సమ్బుద్ధం, సఙ్ఘఞ్చాపి అనాసవం;

తేన చిత్తప్పసాదేన, దేవలోకే రమిస్సతి.

౬౩౩. ‘‘‘నిబ్బత్తిస్సతి తే బ్యమ్హం, సుకతం నావసణ్ఠితం;

ఆకాసే పుప్ఫఛదనం, ధారయిస్సతి సబ్బదా.

౬౩౪. ‘‘‘అట్ఠపఞ్ఞాసకప్పమ్హి, తారకో [తారణో (స్యా.)] నామ ఖత్తియో;

చాతురన్తో విజితావీ, చక్కవత్తీ భవిస్సతి.

౬౩౫. ‘‘‘సత్తపఞ్ఞాసకప్పమ్హి, చమ్మకో [చమ్పకో (సీ.), చమ్బకో (స్యా.)] నామ ఖత్తియో;

ఉగ్గచ్ఛన్తోవ సూరియో, జోతిస్సతి మహబ్బలో.

౬౩౬. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౬౩౭. ‘‘‘తిదసా సో చవిత్వాన, మనుస్సత్తం గమిస్సతి;

రేవతో నామ నామేన, బ్రహ్మబన్ధు భవిస్సతి.

౬౩౮. ‘‘‘అగారా నిక్ఖమిత్వాన, సుక్కమూలేన చోదితో;

గోతమస్స భగవతో, సాసనే పబ్బజిస్సతి.

౬౩౯. ‘‘‘సో పచ్ఛా పబ్బజిత్వాన, యుత్తయోగో విపస్సకో;

సబ్బాసవే పరిఞ్ఞాయ, నిబ్బాయిస్సతినాసవో’.

౬౪౦. ‘‘వీరియం [విరియం (సీ. స్యా.)] మే ధురధోరయ్హం, యోగక్ఖేమాధివాహనం;

ధారేమి అన్తిమం దేహం, సమ్మాసమ్బుద్ధసాసనే.

౬౪౧. ‘‘సతసహస్సే కతం కమ్మం, ఫలం దస్సేసి మే ఇధ;

సుముత్తో సరవేగోవ, కిలేసే ఝాపయీ మమ.

౬౪౨. ‘‘తతో మం వననిరతం, దిస్వా లోకన్తగూ ముని;

వనవాసిభిక్ఖూనగ్గం, పఞ్ఞపేసి మహామతి.

౬౪౩. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా ఖదిరవనియో రేవతో థేరో ఇమా గాథాయో అభాసిత్థాతి.

ఖదిరవనియరేవతత్థేరస్సాపదానం నవమం.