౩-౧౦. ఆనన్దత్థేరఅపదానం

౬౪౪. ‘‘ఆరామద్వారా నిక్ఖమ్మ, పదుముత్తరో మహాముని;

వస్సేన్తో అమతం వుట్ఠిం, నిబ్బాపేసి మహాజనం.

౬౪౫. ‘‘సతసహస్సం తే ధీరా, ఛళభిఞ్ఞా మహిద్ధికా;

పరివారేన్తి సమ్బుద్ధం, ఛాయావ అనపాయినీ [అనుపాయినీ (స్యా. క.)].

౬౪౬. ‘‘హత్థిక్ఖన్ధగతో ఆసిం, సేతచ్ఛత్తం వరుత్తమం;

సుచారురూపం దిస్వాన, విత్తి మే ఉదపజ్జథ.

౬౪౭. ‘‘ఓరుయ్హ హత్థిఖన్ధమ్హా, ఉపగచ్ఛిం నరాసభం;

రతనామయఛత్తం మే, బుద్ధసేట్ఠస్స ధారయిం.

౬౪౮. ‘‘మమ సఙ్కప్పమఞ్ఞాయ, పదుముత్తరో మహాఇసి;

తం కథం ఠపయిత్వాన, ఇమా గాథా అభాసథ.

౬౪౯. ‘‘‘యో సో ఛత్తమధారేసి, సోణ్ణాలఙ్కారభూసితం;

తమహం కిత్తయిస్సామి, సుణోథ మమ భాసతో.

౬౫౦. ‘‘‘ఇతో గన్త్వా అయం పోసో, తుసితం ఆవసిస్సతి;

అనుభోస్సతి సమ్పత్తిం, అచ్ఛరాహి పురక్ఖతో.

౬౫౧. ‘‘‘చతుత్తింసతిక్ఖత్తుఞ్చ, దేవరజ్జం కరిస్సతి;

బలాధిపో అట్ఠసతం, వసుధం ఆవసిస్సతి.

౬౫౨. ‘‘‘అట్ఠపఞ్ఞాసక్ఖత్తుఞ్చ, చక్కవత్తీ భవిస్సతి;

పదేసరజ్జం విపులం, మహియా కారయిస్సతి.

౬౫౩. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౬౫౪. ‘‘‘సక్యానం కులకేతుస్స, ఞాతిబన్ధు భవిస్సతి;

ఆనన్దో నామ నామేన, ఉపట్ఠాకో మహేసినో.

౬౫౫. ‘‘‘ఆతాపీ నిపకో చాపి, బాహుసచ్చే సుకోవిదో;

నివాతవుత్తి అత్థద్ధో, సబ్బపాఠీ భవిస్సతి.

౬౫౬. ‘‘‘పధానపహితత్తో సో, ఉపసన్తో నిరూపధి;

సబ్బాసవే పరిఞ్ఞాయ, నిబ్బాయిస్సతినాసవో.

౬౫౭. ‘‘‘సన్తి ఆరఞ్ఞకా నాగా, కుఞ్జరా సట్ఠిహాయనా;

తిధాపభిన్నా మాతఙ్గా, ఈసాదన్తా ఉరూళ్హవా.

౬౫౮. ‘‘‘అనేకసతసహస్సా, పణ్డితాపి మహిద్ధికా;

సబ్బే తే బుద్ధనాగస్స, న హోన్తు పణిధిమ్హి తే’ [న హోన్తి పరివిమ్భితా (స్యా.), న హోన్తి పణిధిమ్హి తే (క.)].

౬౫౯. ‘‘ఆదియామే నమస్సామి, మజ్ఝిమే అథ పచ్ఛిమే;

పసన్నచిత్తో సుమనో, బుద్ధసేట్ఠం ఉపట్ఠహిం.

౬౬౦. ‘‘ఆతాపీ నిపకో చాపి, సమ్పజానో పతిస్సతో;

సోతాపత్తిఫలం పత్తో, సేఖభూమీసు కోవిదో.

౬౬౧. ‘‘సతసహస్సితో కప్పే, యం కమ్మమభినీహరిం;

తాహం భూమిమనుప్పత్తో, ఠితా సద్ధమ్మమాచలా [ఠితో సద్ధమ్మమాచలో (సీ.), ఠితా సద్ధా మహప్ఫలా (స్యా.)].

౬౬౨. ‘‘స్వాగతం వత మే ఆసి, బుద్ధసేట్ఠస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౬౬౩. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా ఆనన్దో థేరో ఇమా గాథాయో అభాసిత్థాతి.

ఆనన్దత్థేరస్సాపదానం దసమం.

తస్సుద్దానం –

బుద్ధో పచ్చేకబుద్ధో చ, సారిపుత్తో చ కోలితో;

కస్సపో అనురుద్ధో చ, పుణ్ణత్థేరో ఉపాలి చ.

అఞ్ఞాసికోణ్డఞ్ఞో పిణ్డోలో, రేవతానన్దపణ్డితో;

ఛసతాని చ పఞ్ఞాస, గాథాయో సబ్బపిణ్డితా.

అపదానే బుద్ధవగ్గో పఠమో.