౩-౮. పిణ్డోలభారద్వాజత్థేరఅపదానం

౬౧౩. ‘‘పదుముత్తరో నామ జినో, సయమ్భూ అగ్గపుగ్గలో;

పురతో హిమవన్తస్స, చిత్తకూటే వసీ తదా.

౬౧౪. ‘‘అభీతరూపో తత్థాసిం, మిగరాజా చతుక్కమో;

తస్స సద్దం సుణిత్వాన, విక్ఖమ్భన్తి బహుజ్జనా.

౬౧౫. ‘‘సుఫుల్లం పదుమం గయ్హ, ఉపగచ్ఛిం నరాసభం;

వుట్ఠితస్స సమాధిమ్హా, బుద్ధస్స అభిరోపయిం.

౬౧౬. ‘‘చాతుద్దిసం నమస్సిత్వా, బుద్ధసేట్ఠం నరుత్తమం;

సకం చిత్తం పసాదేత్వా, సీహనాదం నదిం అహం [తదా (స్యా.)].

౬౧౭. ‘‘పదుముత్తరో లోకవిదూ, ఆహుతీనం పటిగ్గహో;

సకాసనే నిసీదిత్వా, ఇమా గాథా అభాసథ.

౬౧౮. ‘‘‘బుద్ధస్స గిరమఞ్ఞాయ, సబ్బే దేవా సమాగతా;

ఆగతో వదతం సేట్ఠో, ధమ్మం సోస్సామ తం మయం.

౬౧౯. ‘‘‘తేసం హాసపరేతానం, పురతో లోకనాయకో;

మమ సద్దం [కమ్మం (?)] పకిత్తేసి, దీఘదస్సీ మహాముని’.

౬౨౦. ‘‘యేనిదం పదుమం దిన్నం, సీహనాదో చ నాదితో;

తమహం కిత్తయిస్సామి, సుణాథ మమ భాసతో.

౬౨౧. ‘‘‘ఇతో అట్ఠమకే కప్పే, చక్కవత్తీ భవిస్సతి;

సత్తరతనసమ్పన్నో చతుదీపమ్హి ఇస్సరో.

౬౨౨. ‘‘‘కారయిస్సతి ఇస్సరియం [ఇస్సరం (స్యా. క.)], మహియా చతుసట్ఠియా;

పదుమో నామ నామేన, చక్కవత్తీ మహబ్బలో.

౬౨౩. ‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౬౨౪. ‘పకాసితే పావచనే, బ్రహ్మబన్ధు భవిస్సతి;

బ్రహ్మఞ్ఞా అభినిక్ఖమ్మ, పబ్బజిస్సతి తావదే’.

౬౨౫. ‘‘పధానపహితత్తో సో, ఉపసన్తో నిరూపధి;

సబ్బాసవే పరిఞ్ఞాయ, నిబ్బాయిస్సతినాసవో.

౬౨౬. ‘‘విజనే పన్తసేయ్యమ్హి, వాళమిగసమాకులే;

సబ్బాసవే పరిఞ్ఞాయ, నిబ్బాయిస్సతినాసవో.

౬౨౭. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా పిణ్డోలభారద్వాజో థేరో ఇమా గాథాయో అభాసిత్థాతి.

పిణ్డోలభారద్వాజత్థేరస్సాపదానం అట్ఠమం.