(౨౪-౨౫) ఏకేకలోమతాఉణ్ణాలక్ఖణాని

౨౩౨. ‘‘యమ్పి, భిక్ఖవే, తథాగతో పురిమం జాతిం పురిమం భవం పురిమం నికేతం పుబ్బే మనుస్సభూతో సమానో ముసావాదం పహాయ ముసావాదా పటివిరతో అహోసి, సచ్చవాదీ సచ్చసన్ధో థేతో పచ్చయికో అవిసంవాదకో లోకస్స. సో తస్స కమ్మస్స కటత్తా ఉపచితత్తా…పే… సో తతో చుతో ఇత్థత్తం ఆగతో సమానో ఇమాని ద్వే మహాపురిసలక్ఖణాని పటిలభతి. ఏకేకలోమో చ హోతి, ఉణ్ణా చ భముకన్తరే జాతా హోతి ఓదాతా ముదుతూలసన్నిభా.

‘‘సో తేహి లక్ఖణేహి సమన్నాగతో, సచే అగారం అజ్ఝావసతి, రాజా హోతి చక్కవత్తీ…పే… రాజా సమానో కిం లభతి? మహాస్స జనో ఉపవత్తతి, బ్రాహ్మణగహపతికా నేగమజానపదా గణకమహామత్తా అనీకట్ఠా దోవారికా అమచ్చా పారిసజ్జా రాజానో భోగియా కుమారా. రాజా సమానో ఇదం లభతి… బుద్ధో సమానో కిం లభతి? మహాస్స జనో ఉపవత్తతి, భిక్ఖూ భిక్ఖునియో ఉపాసకా ఉపాసికాయో దేవా మనుస్సా అసురా నాగా గన్ధబ్బా. బుద్ధో సమానో ఇదం లభతి’’. ఏతమత్థం భగవా అవోచ.

౨౩౩. తత్థేతం వుచ్చతి –

‘‘సచ్చప్పటిఞ్ఞో పురిమాసు జాతిసు,

అద్వేజ్ఝవాచో అలికం వివజ్జయి;

న సో విసంవాదయితాపి కస్సచి,

భూతేన తచ్ఛేన తథేన భాసయి [తోసయి (సీ. పీ.)].

‘‘సేతా సుసుక్కా ముదుతూలసన్నిభా,

ఉణ్ణా సుజాతా [ఉణ్ణాస్స జాతా (క. సీ.)] భముకన్తరే అహు;

న లోమకూపేసు దువే అజాయిసుం,

ఏకేకలోమూపచితఙ్గవా అహు.

‘‘తం లక్ఖణఞ్ఞూ బహవో సమాగతా,

బ్యాకంసు ఉప్పాదనిమిత్తకోవిదా;

ఉణ్ణా చ లోమా చ యథా సుసణ్ఠితా,

ఉపవత్తతీ ఈదిసకం బహుజ్జనో.

‘‘గిహిమ్పి సన్తం ఉపవత్తతీ జనో,

బహు పురత్థాపకతేన కమ్మునా;

అకిఞ్చనం పబ్బజితం అనుత్తరం,

బుద్ధమ్పి సన్తం ఉపవత్తతి జనో’’తి.