(౨౩) ఉణ్హీససీసలక్ఖణం

౨౩౦. ‘‘యమ్పి, భిక్ఖవే, తథాగతో పురిమం జాతిం పురిమం భవం పురిమం నికేతం పుబ్బే మనుస్సభూతో సమానో బహుజనపుబ్బఙ్గమో అహోసి కుసలేసు ధమ్మేసు బహుజనపామోక్ఖో కాయసుచరితే వచీసుచరితే మనోసుచరితే దానసంవిభాగే సీలసమాదానే ఉపోసథుపవాసే మత్తేయ్యతాయ పేత్తేయ్యతాయ సామఞ్ఞతాయ బ్రహ్మఞ్ఞతాయ కులే జేట్ఠాపచాయితాయ అఞ్ఞతరఞ్ఞతరేసు చ అధికుసలేసు ధమ్మేసు. సో తస్స కమ్మస్స కటత్తా…పే… సో తతో చుతో ఇత్థత్తం ఆగతో సమానో ఇమం మహాపురిసలక్ఖణం పటిలభతి – ఉణ్హీససీసో హోతి.

‘‘సో తేన లక్ఖణేన సమన్నాగతో సచే అగారం అజ్ఝావసతి, రాజా హోతి చక్కవత్తీ…పే… రాజా సమానో కిం లభతి? మహాస్స జనో అన్వాయికో హోతి, బ్రాహ్మణగహపతికా నేగమజానపదా గణకమహామత్తా అనీకట్ఠా దోవారికా అమచ్చా పారిసజ్జా రాజానో భోగియా కుమారా. రాజా సమానో ఇదం లభతి… బుద్ధో సమానో కిం లభతి? మహాస్స జనో అన్వాయికో హోతి, భిక్ఖూ భిక్ఖునియో ఉపాసకా ఉపాసికాయో దేవా మనుస్సా అసురా నాగా గన్ధబ్బా. బుద్ధో సమానో ఇదం లభతి’’. ఏతమత్థం భగవా అవోచ.

౨౩౧. తత్థేతం వుచ్చతి –

‘‘పుబ్బఙ్గమో సుచరితేసు అహు,

ధమ్మేసు ధమ్మచరియాభిరతో;

అన్వాయికో బహుజనస్స అహు,

సగ్గేసు వేదయిత్థ పుఞ్ఞఫలం.

‘‘వేదిత్వా సో సుచరితస్స ఫలం,

ఉణ్హీససీసత్తమిధజ్ఝగమా;

బ్యాకంసు బ్యఞ్జననిమిత్తధరా,

పుబ్బఙ్గమో బహుజనం హేస్సతి.

‘‘పటిభోగియా మనుజేసు ఇధ,

పుబ్బేవ తస్స అభిహరన్తి తదా;

యది ఖత్తియో భవతి భూమిపతి,

పటిహారకం బహుజనే లభతి.

‘‘అథ చేపి పబ్బజతి సో మనుజో,

ధమ్మేసు హోతి పగుణో విసవీ;

తస్సానుసాసనిగుణాభిరతో,

అన్వాయికో బహుజనో భవతీ’’తి.