(౧౪) కోసోహితవత్థగుయ్హలక్ఖణం

౨౨౦. యమ్పి, భిక్ఖవే, తథాగతో పురిమం జాతిం పురిమం భవం పురిమం నికేతం పుబ్బే మనుస్సభూతో సమానో చిరప్పనట్ఠే సుచిరప్పవాసినో ఞాతిమిత్తే సుహజ్జే సఖినో సమానేతా అహోసి. మాతరమ్పి పుత్తేన సమానేతా అహోసి, పుత్తమ్పి మాతరా సమానేతా అహోసి, పితరమ్పి పుత్తేన సమానేతా అహోసి, పుత్తమ్పి పితరా సమానేతా అహోసి, భాతరమ్పి భాతరా సమానేతా అహోసి, భాతరమ్పి భగినియా సమానేతా అహోసి, భగినిమ్పి భాతరా సమానేతా అహోసి, భగినిమ్పి భగినియా సమానేతా అహోసి, సమఙ్గీకత్వా [సమగ్గిం కత్వా (సీ. స్యా. పీ.)] చ అబ్భనుమోదితా అహోసి. సో తస్స కమ్మస్స కటత్తా…పే… సో తతో చుతో ఇత్థత్తం ఆగతో సమానో ఇమం మహాపురిసలక్ఖణం పటిలభతి – కోసోహితవత్థగుయ్హో హోతి.

‘‘సో తేన లక్ఖణేన సమన్నాగతో సచే అగారం అజ్ఝావసతి, రాజా హోతి చక్కవత్తీ…పే… రాజా సమానో కిం లభతి? పహూతపుత్తో హోతి, పరోసహస్సం ఖో పనస్స పుత్తా భవన్తి సూరా వీరఙ్గరూపా పరసేనప్పమద్దనా. రాజా సమానో ఇదం లభతి… బుద్ధో సమానో కిం లభతి? పహూతపుత్తో హోతి, అనేకసహస్సం ఖో పనస్స పుత్తా భవన్తి సూరా వీరఙ్గరూపా పరసేనప్పమద్దనా. బుద్ధో సమానో ఇదం లభతి’’. ఏతమత్థం భగవా అవోచ.

౨౨౧. తత్థేతం వుచ్చతి –

‘‘పురే పురత్థా పురిమాసు జాతిసు,

చిరప్పనట్ఠే సుచిరప్పవాసినో;

ఞాతీ సుహజ్జే సఖినో సమానయి,

సమఙ్గికత్వా అనుమోదితా అహు.

‘‘సో తేన [స తేన (క.)] కమ్మేన దివం సమక్కమి,

సుఖఞ్చ ఖిడ్డారతియో చ అన్వభి;

తతో చవిత్వా పునరాగతో ఇధ,

కోసోహితం విన్దతి వత్థఛాదియం.

‘‘పహూతపుత్తో భవతీ తథావిధో,

పరోసహస్సఞ్చ [పరోసహస్సస్స (సీ. పీ.)] భవన్తి అత్రజా;

సూరా చ వీరా చ [సూరా చ వీరఙ్గరూపా (క.)] అమిత్తతాపనా,

గిహిస్స పీతింజననా పియంవదా.

‘‘బహూతరా పబ్బజితస్స ఇరియతో,

భవన్తి పుత్తా వచనానుసారినో;

గిహిస్స వా పబ్బజితస్స వా పున,

తం లక్ఖణం జాయతి తదత్థజోతక’’న్తి.

పఠమభాణవారో నిట్ఠితో.