౩. తతియసిక్ఖాపదవణ్ణనా

౯౪౧. తతియే – ఉళారసమ్భావితాతి ఉళారకులా పబ్బజితత్తా గుణేహి చ ఉళారత్తా ఉళారాతి సమ్భావితా. ఇస్సాపకతాతి ఇస్సాయ అపకతా; అభిభూతాతి అత్థో. సఞ్ఞత్తి బహులా ఏతాసన్తి సఞ్ఞత్తిబహులా; దివసం మహాజనం సఞ్ఞాపయమానాతి అత్థో. విఞ్ఞత్తి బహులా ఏతాసన్తి విఞ్ఞత్తిబహులా. విఞ్ఞత్తీతి హేతూదాహరణాదీహి వివిధేహి నయేహి ఞాపనా వేదితబ్బా, న యాచనా.

౯౪౩. చఙ్కమనే నివత్తనగణనాయ ఆపత్తియో వేదితబ్బా. తిట్ఠతి వాతిఆదీసు పయోగగణనాయ. ఉద్దిసతి వాతిఆదీసు పదాదిగణనాయ. సేసం ఉత్తానమేవ.

తిసముట్ఠానం – కిరియాకిరియం, సఞ్ఞావిమోక్ఖం, సచిత్తకం, లోకవజ్జం, కాయకమ్మం, వచీకమ్మం, అకుసలచిత్తం, దుక్ఖవేదనన్తి.

తతియసిక్ఖాపదం.